Fransa Azərbaycanda separatçı elan olunmuş Qarabağdakı terrorçu dəstənin başçısı Arayik Arutyunyan və onun “nümayəndə heyəti”nin nazı ilə oynamağa davam edir.
Bir həftədən çoxdur ki, Fransada səfərdə olan və bu ölkənin müxtəlif rəsmi şəxslərilə görüşlər keçirən separatçılar indi də Marsel şəhərində merin qəbuluna gediblər.
Yerli rəhbərliklə görüşlərdə Azərbaycan əleyhinə müxtəlif fikirlər səsləndirilib, 2020-ci ilin payızında baş vermiş İkinci Qarabağ müharibəsi "ermənilərə qarşı hərbi əməliyyat" kimi qiymətləndirilib.
Arayik Arutyunyan Fransa Senatı və Milli Assambleyasının Azərbaycan əleyhinə qətnamə qəbul etməsindən məmnunuluğunu vurğulayıb, bunu Qarabağ separatçılarına verilən böyük dəstək adlandırıb.
Marsel meri Beyna Payan əmin edib ki, Qarabağ separatçılarına humanitar yardım proqramlarının artırılmasına yönəlmiş səylər davam etdiriləcək.
Separatçıların başçısı Provans-Alp-Kot d'Azur regionunun rəhbəri Renaud Muselier ilə görüşdə Azərbaycanın “Artsaxa və Ermənistana qarşı təcavüzü”nü pisləyən və “Qarabağ ermənilərinin öz müqəddəratını təyinetmə hüququ”nu dəstəkləyən birgə “bəyannamə” imzalayıb.
Göründüyü kimi, Marseldə Azərbaycanın "Artsax" a və Ermənistana "təcavüzünü" pisləyən bəyannamə imzalanıb.
"Artsax" "respublikasının" "prezidenti" Arayik Arutyunyanın başçılıq etdiyi nümayəndə heyəti Marseldə Fransa Respublikasına “işgüzar” səfəri çərçivəsində yerli rəhbərliklə bir sıra görüşlər keçirməsi yeni erməni təxribatıdır. Bütün bunlar Rusiya sülhməramlıları tərəfindən onun geriyə qayıdanda saxlanaraq Azərbaycana təhvil verilməsi üçün əsas ola bilərmi?
Təhlükəsizlik üzrə ekspert Elşən Həsənov “Bakı-Xəbər”ə açıqlamasında bildirdi ki, əslində, sülhməramlılar bu addımı çoxdan atmalıdırlar: “Çünki onlar bölgəyə yerləşəndə üzərlərinə separatçıların tərkislah edilməsi ilə bağlı öhdəlik götütüblər. Arayik Arutunyan həmin separatçıların lideri sayılır. Bundan əlavə, Arutunyan özü etiraf edib ki, 44 günlük müharibənin gedişində Azərbaycanın dinc əhalisinə raketlə atəş açmaq əmrini şəxsən o verib. Bu da onun cinayətkar, terrorçu olduğuna şübhə yeri qoymur. Bu cür adam mütləq mənada cinayət məsuliyyətinə cəlb edilməlidir. Sülhməramlılar isə bunun əvəzində ona “prezident” kimi fəaliyyət göstərməyə şərait yaradır.
Özünü qondarma respublikanın rəhbəri kimi təqdim edən Araik Arutunyanın qısa müddətdə istintaqa təqdim edilməsi ilə bağlı məsələ sülhməramlıların qarşısında sərt tələb kimi qoyulmalıdır. Bütün silahlı ünsürlər ya silahı atıb özlərini könüllü şəkildə Azərbaycanın mühakiməsinə təslim etməlidir, ya da başqa yollarla onların istintaqa cəlbi reallaşacaq. Arutyunyanın bu zamana qədər tutulmadığına gəlincə, bunun səbəblərini müvəqqəti situasiya ilə əlaqələndirmək lazımdır. Rusiya sülhməramlıları bilməlidir ki , Azərbaycan öz ərazilərində hərbi komponentləri də özündə ehtiva edən hüquqi tədbirlər həyata keçirmək səlahiyyətinə malikdir. Amma Bakı bu məsələni sülhməramlılarla konfliktə girmədən həll etmək istəyir və bu mövzuda Rusiya ilə danışıqlar aparır. Yəni Arutunyanın Azərbaycan Baş Prokurorluğunun sanksiyası ilə həbsi, yaxud əməliyyatla tutulması istisna deyil. Ancaq biz görürük ki, sülhməramlılar bu işin öhdəsindən gələ bilmir. İndi də Arutunyanı sülhməramlılar öz əlləri ilə Fransaya yola salıblar. O isə gedib orada açıq şəkildə separtizmlə məşğul olur. Azərbaycan bununla bağlı sülhməramlıların qarşısında son tələbi qoymalıdır ki, Arayik Arutunyan ya Qarabağa buraxılmamalıdır, ya da həbs edilərək Azərbaycana təhvil verməlidir. Bunun üçün kifayət qədər hüquqi əsaslar var. Sülhməramlılar bunu etməsələr, Azərbaycan onların nəzərinə çatdırmalıdır ki, özü antiterror əməliyyatı ilə bu məsələni həll edəcək. Sülhməramlılar nəhayət öz missiyalarına uyğun fəaliyyət ortaya qoymalıdır”.
Məhəmmədəli QƏRİBLİ
