“Bu sualı Ermənistan hakimiyyətinə ünvanlamısınızmı?” Bunu Rusiya Xarici İşlər Nazirliyinin sözçüsü Mariya Zaxarova Ermənistan və Azərbaycanla danışıqlarda “xalqların öz müqəddəratını təyinetmə hüququ”nun niyə nəzərə alınmaması ilə bağlı erməni jurnalistin sualına cavabında deyib. Jurnalist müvafiq sualı verərkən iddia edib ki, Ermənistan ölkələrin ərazi bütövlüyünü dəstəkləyən Almatı bəyannaməsini imzalayarkən “Dağlıq Qarabağ”ı nəzərə almayıb.
M.Zaxarova yanaşma ilə razı olmayaraq erməni jurnalistin sualına sərt cavab verib: “Sergey Viktoroviç Lavrov mətbuat konfransında bütün nüansları, bütün vurğuları izah etdi. Əlavə ediləcək bir şey yoxdur. Həmin sözlərlə kimsə bu sualı hakimiyyətə ünvanlasın ki, dövlətin vahid mövqeyi bəlli olsun. Bundan sonra nəyisə müzakirə etmək olar. Son zamanlarda bəzi şeylərin müxtəlif cür yozulmasını, çox fərqli şərh edilməsini görürük. İrəvanın əsas rəsmi mövqeyini anlamaq istərdik”.
Məlumat üçün qeyd edək ki, bundan əvvəl Rusiya xarici işlər naziri Sergey Lavrov Azərbaycan və Ermənistanın 1991-ci il Almatı bəyannaməsi və BMT Nizamnaməsi ilə bir-birinin ərazi bütövlüyünü tanıdığını bildirib. Onun sözlərinə görə, Ermənistan bununla Qarabağın Azərbaycanın bir hissəsi olduğunu tanıyıb.
“İstisna deyil ki, Zaxarovaya o cür sualın verilməsi rəsmi İrəvanın təlimatı əsasında olub”
Məsələyə münasibət bildirən Yeni Yol Partiyasının sədri Ramil Hüseynovun fikrincə, ermənilər yaxşı bilir ki, Qarabağın statusu ilə bağlı qatar çoxdan gedib: “Sadəcə, müharibədə məğlub olduqları üçün bütün günahları Rusiyanın üzərinə atırlar. Nədir ki, Rusiya gərək bunların yerinə vuruşub Qarabağın azad olunmasına mane olaydı. Bu günlərdə KTMT-nin İrəvan sammitində yaşanan biabırçı vəziyyət də bunun tərkib hissəsidir. Zaxarova və digər Rusiya rəsmiləri yaxşı bilirlər ki, Paşinyan hakimiyyəti Moskvadan uzaqlaşmaq yolunu seçib. Erməni ictimai rəyi Rusiyaya qarşı davamlı olaraq köklənir. Guya ki, müharibədə üzləşdikləri məğlubiyyətin səbəbkarı Rusiyadır. Halbuki, Rusiya müharibə zamanı Ermənistana kifayət qədər həm hava yolu ilə, həm də Gümrüdəki hərbi bazalardan silah yardımı etdi. İstisna deyil ki, Zaxarovaya o cür sualın verilməsi rəsmi İrəvanın təlimatı əsasında olub. 1991-ci il Almatı bəyannaməsi ilə Ermənistan Azərbaycanın ərazi bütövlüyünü tanıyıb. Sonra Ermənistan nümayişkaranə şəkildə bunu pozaraq ərazilərimizi işğal edib. Azərbaycan güclənəndən sonra işğala son qoyub. İndi Ermənistan məğlubiyyətlə barışa bilmədiyi üçün günahı Rusiyada axtarır”.
Vidadi ORDAHALLI
