Məlum olduğu kimi, Avropada Təhlükəsizlik və Əməkdaşlıq Təşkilatı (ATƏT) 21-27 oktyabr tarixlərində Ermənistana göndərilən və ilkin olaraq “ATƏT-in ehtiyacların qiymətləndirilməsi heyəti” adlandırdıqları qrupun təşkilatla əlaqəsi olmadığını açıqlayıb.
Təşkilatın bildirdiyinə görə, bu qrupun Ermənistana göndərilməsi barədə qərar ATƏT-in müvafiq qərarverici orqanlarının və ya ATƏT-in katibliyi tərəfindən deyil, fəaliyyətdə olan Sədrin şəxsi təşəbbüsü ilə verilib. ATƏT katibliyi vurğulayıb ki, bu qrupun göndərilməsi üçün ATƏT-in qərarverici orqanı olan Daimi Şura tərəfindən qərar qəbul edilməyib, qrup ATƏT mandatına malik deyil, habelə onlar üçün ATƏT-in büdcəsindən hər hansı bir vəsait xərclənməyib. Heyətin xərclərinin büdcədənkənar vəsaitlər hesabına ATƏT-in bəzi iştirakçı dövlətləri tərəfindən fərdi şəkildə ödəndiyi diqqətə çatdırılıb. Məlum olduğu kimi, 20 oktyabr tarixində Azərbaycan XİN-i bu qrupun göndərilməsi barədə ATƏT-in rəsmi internet səhifəsində dərc edilmiş məlumata istinadən sərt reaksiya verib. XİN-dən bildirilib ki, belə bir heyətin göndərilməsi məsələsi ATƏT-in hər hansı bir kollektiv qərar verici orqanı tərəfindən heç zaman müzakirə olunmayıb və nəticədə bu barədə heç bir qərar qəbul edilməyib. Heç bir ATƏT mandatına malik olmadan göndərilən bu heyət, Ermənistanın iddialarının əksinə, ATƏT-lə heç bir şəkildə əlaqələndirilə bilinməyəcəyi vurğulanıb.
Qeyd edək ki, ATƏT-in fəaliyyətdə olan hazırkı sədri Polşadır.
Beləliklə, “ATƏT-in ehtiyacların qiymətləndirilməsi heyəti” qrupunun hansı vəsait hesabına Ermənistana gəldiyi şübhəlidir. Çünki ATƏT-in qərarı ilə gəlməyibsə, aydın məsələdir ki, bu qurumun büdcəsindən maliyyələşmir. Bu günlərdə xarici işlər naziri Ceyhun Bayramov da buna etiraz etdi. Qeyd etdi ki, bu qərar konsensus şəklində qəbul olunmayıb. Hazırda ATƏT sədri Polşadan olduğu üçün bu, Varşavanın qərarıdır.
Maraqlıdır, sözügedən qrupu hansı dövlətlər maliyyələşdirib? Ola bilərmi ki, maliyyələşməni Fransa həyata keçirib?
“Bu dövlət Azərbaycana qarşı açıq düşmənçilik siyasəti həyata keçirir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının fikrincə, böyük ehtimalla, məlum xərcləri Fransa maliyyələşdirib: “Avropanın çoxsaylı qurumları var. Bunların hər birində ikili standartlar var. Məsələn, ATƏT-in Demokratik Təsisatlar və İnsan Hüquqları Bürosu hər zaman Azərbaycana qərəzli münasibət bəsləyib. Digər təsisatlar dəfələrlə Azərbaycana qarşı qərəzli qətnamələr qəbul ediblər. Nəzərə alsaq ki, son illər Fransa Azərbaycana qarşı çox qərəzli mövqedən çıxış edir, o zaman adıçəkilən dövlətin bunda əli olduğu ehtimalı böyükdür. Bu baxımdan, çox güman ki, ATƏT-in məlum qrupunu Fransa maliyyələşdirib. Çünki bu dövlət Azərbaycana qarşı açıq düşmənçilik siyasəti həyata keçirir. Dolayı maliyələşmədə məhz Fransanın xüsusi rol oynadığı ehtimalı daha realdır. Biz nəzərə almalıyıq ki, “ATƏT-in ehtiyacların qiymətləndirilməsi heyəti” qrupu Fransanın mənafeyinə uyğun missiya ilə çıxış edir. Fransanın mənafeyi də Ermənistanı himayə etməkdən ibarətdir. O üzdən, biz çalışmalıyıq ki, hər zaman güclü olaq. Çünki hansı dövlət güclüdürsə öz mövqeyini müdafiə edə bilir. Güclü olmayanda beynəlxalq təsisatlar öz mənafelərinə uyğun qərarlar qəbul edirlər. Bu səbəbdən dəyişən bir şey yoxdur”.
Bir sözlə, professor hesab edir ki, Azərbaycan daim güclü olmalıdır.
Vidadi ORDAHALLI
