Qarabağ ermənilərinin hüquq və təhlükəsizliyi ilə bağlı beynəlxalq mexanizmlərin yaradılması haqqında razılığın əldə olunması yalandır.
Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri üzrə şöbə müdiri Hikmət Hacıyev Ermənistan Təhlükəsizlik Şurasının katibi Armen Qriqoryanın Vaşinqtonda Qarabağda yaşayan ermənilərin hüquq və təhlükəsizliyi barədə beynəlxalq mexanizmlərin yaradılması barədə guya razılıq əldə olunduğuna dair bəyanatla çıxış etməsinə münasibət bildirərkən deyib. O, Ermənistan Təhlükəsizlik Şurasının katibi tərəfindən aparılmış müzakirələrin mahiyyətinin birtərəfli qaydada təhrif olunduğunu təəssüflə qeyd edib.
Ermənistan rəhbərliyi belə açıq yalanlarla niyə ictimai rəyi çaşdırır?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Azərbaycan Prezidenti açıq şəkildə, qətiyyətlə Azərbaycanda yaşayan ermənilərin müqqədəratı, onların yaşam tərzinin Azərbaycan dövlətinin üzərində olan məsuliyyət olduğunu bildirib: “Bir şərtlə ki, Ermənistan və digər xarici qüvvələr bu məsələlərə yaxınlaşmırlar. Azərbaycan ümumi qaydada digər vətəndaşların hüquq və azadlıqlarını necə təmin edirsə, eləcə də ermənilərin hüquqları bütün proseslərdə öz həllini tapacaq. Ermənilər tək vahid xalqın nümayəndələri deyillər. Burada ruslar, ləzgilər, talışlar, saxurlar da yaşayır. Azərbaycan dövlətinin multikultiralizm siyasətinə üstünlük verməsi məhz onu göstərir ki, biz artıq vahid Azərbaycan xalqının proseslərdə iştirakını təmin edirik, bütün insanların hüquq və azadlıqlarına ehtiram göstəririk. Bəli, gündəmə yeni məsələlər gəlir. Bəzi məqamlar köhnəlir, onlara bir daha baxmaq lazım gəlir. Bunlar hamısı tədricən öz həllini tapır. O ki qaldı ermənilərin hüquq və azadlıqlarının təmin olunması ilə bağlı beynəlxalq səviyyədə mexanizmlərin işlənməsinə, bu ağ yalandır. Necə ki, indiki məqamda Ermənistanın təhlükəsizlik katibi, xarici işlər naziri bildirirlər ki, güya Azərbaycanla ermənilərin dialoqu başlamaq üzrədir. Birincisi, burada söhbət dialoqdan gedə bilməz. Burda söhbət sadə ünsiyyətdən gedə bilər. Çünki ermənilərin statusu yoxdur. Onlar status əldə etmək niyyəti ilə yaşayırlarsa yanılırlar. Rusiyalı iş adamı Ruben Vardanyan açıq bildirir ki, Bakı Qarabağ ermənilərilə dialoqa hazırlıq görürsə, bu çox müsbət bir haldır. Əsla reallıqda belə bir şey yoxdur. Çünki Azərbaycan dövləti onlarla dialoq yox, ünsiyyət qura bilər. Onlar rəsmi tərəf deyil. Onlar sadə vətəndaşlardır. Onların qayğıları, faktiki olaraq, Azərbaycan tərəfindən təmin olunur. İstifadə etdikləri qaz, su, istilik hamısı Azərbaycan tərəfindən verilir. Necə olur ki, belə söhbətlər ortaya çıxır? Əlbəttə, burda kənar qüvvələrin iştirakı sezilir. Sirr deyil ki, Ermənistan bu işdə canfəşanlıq edir. Diaspor təşkilatları çalışırlar bu işlərdə rol oynasınlar. Amma bu, perspektivi olmayan yanaşmadır. Çünki Azərbaycan tərəfi bu məsələlərdə heç bir digər tərəfə imkan verməyəcək ki, onlar Azərbaycanda yaşayan ermənilərin müqəddəratı ilə bağlı hər hansı bir fəlliyyət göstərsinlər. Bu məsələ bütövlüklə Azərbaycan dövlətinin ixtiyarındadır. Hüquqi baxımdan bizim bütün imkanlarımız var bu prosesləri təmin etməyə. Soçi görüşündə Prezident İlham Əliyev Putinə açıq-aşkar bildirmişdi ki, Azərbaycan dövlətinin artıq yerli ermənilərlə münasibətləri qurulub və danışıqlar gedir. Onlar bildiriblər ki, çoxluq səviyyəsində Azərbaycan vətəndaşlığını qəbul etməyə hazırdırlar. Belə olduğu halda, xarici qüvvələr, eləcə də Rusiyanın bəzi dairələri Xankəndidə uğursuz bir nümayiş keçirdilər. Bu pullu nümayiş idi. Artıq onların niyyətlərinin nədən ibarət olduğu müəyyən olundu. Niyyətləri ondan ibarət idi ki, Azərbaycanın qarşısında belə bir reallığı canlandırsınlar. Güya yerli əhali status uğrunda mübarizəsini davam edir. Onlar çalışırlar ki, Azərbaycanın tərkibində olaraq öz subyektivliklərini reallaşdırsınlar. Bu olan iş deyil. Çünki İlham Əliyev birmənalı olaraq deyib ki, Qarabağın status məsələsi artıq gündəmdə yoxdur. Biz onu silmişik. Ona bir də qayıdış olmayacaq. O cümlədən, hər hansı qüvvə, hər hansı partiya, hər hansı bir hökümət Qarabağda yaşayan ermənilərin hüquq və azadlıqlarının təmin olunması mexanizmlərinin üzərində işləyirsə, bu əbəsdir. Onların bu fəaliyyətinə heç bir ehtiyac yoxdur. Heç bir sosial sifariş də yoxdur. Odur ki, Azərbaycan dövləti bütün bu prosesləri nəzarətində saxlayır və istənilən məqamda da bu işlərin hamısının öhdəsindən özü gələcək. Reallıq bəllidir. Odur ki, heç kim zəhmət çəkib öz vaxtını bu işə sərf etməsin”.
Məhəmmədəli QƏRİBLİ
