Qarabağdakı separatçı tör-töküntülərinin başçısı Araik Arutyunyan hazırda Fransada səfərdədir və orada təxribatçı fəaliyyətlərə davam edir. Üstəlik, Araikə “France 24” başda olmaqla bir çox televiziya kanallarında geniş yer verilir.
Almaniyanın məşhur ZDF televiziya kanalı Ruben Vardanyanla müsahibəni yayımlayır, Ermənistanda isə Azərbaycana qarşı müharibəyə hazırlaşan yarı hərbiləşmiş strukturları buna təşviq edən video-süjetlər çəkir. Maraqlıdır ki, bütün bunlar Avropanın Azərbaycan enerjisinə və Çinlə əlaqə üçün Zəngəzur dəhlizinə strateji ehtiyacı olduğu vaxtda həyata keçirilir.
Qəribə təzaddır, bir tərəfdən Avropa siyasətçiləri qaza görə Azərbaycana yalvarır, digər tərəfdən isə onların məşhur TV-ləri separatçılara qol-qanad verir. Avropa KİV-nin bu davranışına hansı adı vermək olar?
Media eksperti Müşfiq Ələsgərli “Bakı-Xəbər”ə açıqlamasında bildirdi ki, “Fransa-24” televiziyası həmin ölkədə ictimai və dövlət kanalıdır: “Leqal və qeyri-leqal vasitələrlə dövlətin müxtəlif strukturları tərəfindən maliyyələşdirilir və istiqamətləndirilir. Bu baxımdan, həmin kanal həm də Fransanın xarici siyasət idarəsinin əlində bir alətdir. Fransadakı müxtəlif dövlət qurumlarının Azərbaycana olan münasibəti nə qədər ziddiyyətlidirsə, bənzər mövqe həm də həmin kanalın fəaliyyətində özünü göstərmiş olur. Bəllidir ki, hazırda Fransanın müxtəlif dövlət qurumlarının bizə olan münasibəti qərəzli, prinsiplərin tapdanması ilə müşahidə edilir. Qondarma bir qurumun “rəhbəri” Arayik Arutunyanın mövqeyinə yer verilməsi və üstəlik də onun tanınmayan bir qurumun “prezidenti” kimi təqdim olunması da Fransanın ziddiyyətli yanaşmasından qaynaqlanır. Bu, peşəkar jurnalist etikası ilə uzlaşmır. Televiziyanın yanaşması belə olmamalıdır. Bu səviyyə gəlib çatan transmilli KİV qurumu hər şeydən əvvəl obyektiv olmalıdır. Bunlar isə KİV adı ilə manipulyasiya etməklə, əslində qərəzli alət rolunu oynayırlar. Təəssüflər olsun ki, digər Avropa ölkələrinin KİV-ləri də bənzər fəaliyyət ortaya qoyurlar. Terrorçuya, separatizmə dəstək vermək heç bir KİV qurumunun iş prinsipinə uyğun deyil. Öz ölkələri ilə bağlı isə fərqli davranırlar. Fransanın özündə elə etnik qruplar var ki, onlar da müstəqillik istəyirlər. Ancaq nəticədə Fransa dövlətinin sərt təpkisi ilə üzləşməli olurlar. Bu televiziyalar həmin adamları separatçı kimi təqdim edir. Ancaq bizim ölkədə separatçılıq edənləri isə “siyasi xadim”, “prezident” kimi təqdim edirlər. Bu proseslərin iki başı var. Cünki bu televiziyaların sərgilədiyi münasibət sonda onların özü üçün problemə çevriləcək. Fransanım öz daxilində də belə problemlər var. Separatizmi təbliğ etməklə, öz daxillərindəki prosesləri də qızışdırmış olacaqlar. Təbiidir ki, bütün bunlar Azərbaycanın Avropa ölkələri ilə bağlı ortaya qoyduğu yanaşma ilə uzlaşmır. Biz hazırda enerji böhranı keçirən Qərbin enerji təminatında mühüm rol oynayırıq. Onların siyasiləri bizdən bu yöndə dəstək istəyir, televiziyaları isə separatçılığı təbliğ edir”.
Məhəmmədəli QƏRİBLİ
