ABŞ 2023-cü ildə Ermənistana 60 milyon dollar maliyyə yardımı ayıracaq, daha 2 milyon dolların isə Qarabağ separatçılarına verilməsi planlaşdırılır. Bu barədə Amerika Erməni Assambleyasının məlumatında bildirilib.
Bununla bağlı qanun layihəsi ABŞ Nümayəndələr Palatasının Xarici Təxsisatlar Komitəsi tərəfindən irəli sürülüb.
Ermənistana yardım iqtisadi inkişafa, özəl sektorun məhsuldarlığına, enerji müstəqilliyinə, demokratiyaya və qanunun aliliyinə yönələcək:
“Komitənin tövsiyəsinə Qarabağda minatəmizləmə fəaliyyətləri üçün ən azı 2 milyon dollar daxildir... Komitə Qarabağdakı münaqişənin humanitar təsiri, sağlamlıq və digər insan ehtiyacları, mənzil, ərzaq təhlükəsizliyi, su və kanalizasiya sahələrində yaranan problemlərdən narahatdır”.
ABŞ-ın Qarabağdakı separatçılara maliyyə yardımı ayırmasını nə dərəcədə doğru addım saymaq olar?
Politoloq Əhəd Məmmədli “Bakı-Xəbər”ə açıqlamasında bildirdi ki, ABŞ Ermənistana müxtəlif adlarla yardımı uzun illərdir edir: “Bildirilir ki, Ermənistan hökuməti ilə ABŞ Beynəlxalq İnkişaf Agentliyi arasında qrant sazişinin imzalanması planlaşdırılır. Əməkdaşlıq çərçivəsində Vaşinqton İrəvana 120 milyon dollar qrant verəcək. Qrant sazişinin məqsədi Ermənistana demokratiyanın və iqtisadi sabitliyin möhkəmləndirilməsinə yönəlmiş islahatlar prosesində kömək etməkdir.
Müvafiq olaraq demokratiyanın təşviqinə 68,565 milyon dollar, iqtisadi təhlükəsizliyin yaxşılaşdırılmasına isə 51,435 milyon dollar xərclənəcək. ABŞ 30 ildir müxtəlif proqramlar çərçivəsində Ermənistana dəstək verir.
Koronavirus dövründə kifayət qədər ciddi qrant proqramları həyata keçirilib. Belə yardımların reallaşmasının başlıca təşəbbüskarı ABŞ-dakı güclü erməni lobbisi olur. Çox maraqlıdır ki, qanunverici quruma təqdim edilən layihədə Qarabağdakı separatçılara da 2 milyon həcmində yardımın edilməsi planlaşdırılır. Bu, birbaşa Azərbaycanın daxili işlərinə müdaxilədir. Azərbaycanın müvafiq qurumları buna etiraz etməlidir. Hesab edirəm ki, ABŞ-ın ölkəmizdəki səfirini XİN-ə dəvət edib, ona rəsmi olaraq etiraz notamız təqdim edilməlidir. Necə olur ki, uzun illərdi Azərbaycana yardımı qadağan edən “907-ci düzəliş”i ləğv etmirlər, ancaq separatçılara açıq dəstək verirlər? Azərbaycan bizə təzyiq edən bütün böyük dövlətlərə öz təpkisini göstərməlidir. Biz Türkiyə və Pakistanla münasibətəri daha da dərinləşdirməliyik ki, dünya siyasətində olan bu sayaq təzyiqləri neytrallaşdıra bilək”.
Məhəmmədəli QƏRİBLİ
