Ermənistan TŞ katibindən Zəngəzur dəhlizinə qarşı kəskin mövqe - “dəhliz deyil, yol”...

Aydın Hüseynov: “Ermənistan buna əməl etməyəcəksə, o zaman Azərbaycan da adekvat addım atacaq”

img

“Ermənistan ərazisindən Naxçıvana gedən Azərbaycan mallarına vergi tətbiq olunacaq”. Bunu Ermənistan Təhlükəsizlik Şurasının katibi Armen Qriqoryan deyib.

Erməni rəsmisi, ümumiyyətlə, dəhliz məsələsini inkar edir: “Birmənalı olaraq sərhəd nəzarəti olacaq. Dəfələrlə demişik ki, Ermənistandan keçən yolu dəhliz saymırıq. Bizim siyasətimiz olduğu kimi qalır. Mövqelərimizin yaxınlaşdığını bəyan edəndə demək istəyirik ki, biz sərhəd nəzarətinin olması yolunu tutmuşuq”.

Onun sözlərinə görə, nəqliyyatın açılması həm Moskvada, həm də Brüsseldə müzakirə olunub: “Azərbaycan uzun müddətdir ki, dəhlizin müzakirə olunduğunu deyir, lakin ötən il noyabrın 6-da Rusiya Baş nazirinin müavini bildirib ki, dəhliz məntiqində heç bir məsələ müzakirə olunmur. Brüssel danışıqlarında da eyni hadisə baş verdi. Bakı dəhliz məsələsinin müzakirə olunduğunu deyəndə, Şarl Mişel heç bir dəhlizin müzakirə olunmadığını bildirdi”.

A.Qriqoryan onu da qeyd edib ki, Azərbaycan mallarının Ermənistan ərazisindən tranziti zamanı müvafiq vergitutma tətbiq ediləcək: “Ermənistan ərazisi İrandan Gürcüstana hər hansı malın getməsi üçün istifadə olunursa, bu, gömrük rəsmiləşdirilməsi deyil, başqa vergi növüdür. Təbii ki, Azərbaycanın timsalında da vergi növləri tətbiq olunacaq”.

Görünən odur ki, Ermənistan rəsmiləri dəhliz məsələsində güzəştə getmək istəmir.

  • “Paşinyan hakimiyyəti regionda gedən prosesləri yenidən təhlil etməyə və geri addım atmağa məcbur olacaq”

Məsələyə münasibət bildirən millət vəkili Aydın Hüseynovun fikrincə, bu bir daha Ermənistanın Zəngəzur dəhlizi məsələsində pozucu mövqedən çıxış etdiyini ortaya qoyur: “Ermənistan bütün vasitələrlə çalışır ki, gedən prosesləri tormozlasın. Lakin onların bu pozuculuğu cavabsız qalmayacaq. Ermənistan anlamalıdır ki, Zəngəzurdan keçən yol dəhliz statusuna malik olmayacaqsa, o zaman Laçın dəhlizi də olmayacaq. Məsələ ondadır ki, 10 noyabr 2020-ci ildə əldə olunan üçtərəfli razılaşmada Naxçıvana maneəsiz gediş-gəlişin təmin olunması öz əksini tapıb. Maneəsiz gediş-gəliş o deməkdir ki, dəhliz olmalıdır. Ermənistan buna əməl etməyəcəksə, o zaman Azərbaycan da adekvat addım atacaq. Bu da Laçın dəhlizinə nəzarətin bərpa olunması deməkdir. Fikrimcə, Paşinyan hakimiyyəti regionda gedən prosesləri yenidən təhlil etməyə və geri addım atmağa məcbur olacaq. Ötən 30 il ərzində Ermənistan regionda terrorçuluq siyasəti apardı və nəticədə dünyadan təcrid olundu. Regiondakı bütün layihələrdən kənarda qaldı. Bəlli olur ki, onlar bundan dərs çıxarmaq istəmir. Bu isə o deməkdir ki, indiki reallıqlar çərçivəsində Azərbaycan daha sərt cavab addımları atacaq. Ona görə də Ermənistan nə qədər tez dünyada gedən prosesləri dərk etsə, bu, bir o qədər onların xeyrinə olacaq. Azərbaycanın regiondakı gücünü onsuz da bilir”.

Bu baxımdan millət vəkili hesab edir ki, birmənalı olaraq Zəngəzur dəhlizi açılmalıdır.

Vidadi ORDAHALLI

Peşə etikası

Son xəbərlər