Separatçıların başçısı - 9 noyabr sənədinin 6-cı bəndini icra etməsək bizə pis olacaq...

Bəhruz Quliyev: “Yalnız Zabux kəndi və Laçın şəhəri deyil, bütövlükdə Xankəndi və s. ərazilərdə də sözügedən proses reallaşdırılacaq”

img

“9 noyabr 2020-ci il tarixli bəyanatın 6-cı bəndində yazılıb ki, biz Laçın şəhərini tərk etməliyik”. Mətbuatın yaydığı məlumata görə, bunu separatçıların lideri Arayik Arutyunyan Laçın və Zabuxla bağlı açıqlamasında bildirib.

“Qarabağı Ermənistanla birləşdirən yeni marşruta gəlincə, biz Laçından yan keçməliyik. Burada açmaq istəmədiyim sirlər var. Niyə biz bu seçimi etdik? Gələcək təhlükəsizliyimizə əsaslanır. Zabuxdan ermənilərin deportasiyası məsələsi müzakirə olunmayıb. Lakin 9 noyabr 2020-ci il tarixli bəyanatın 6-cı bəndində yazılıb ki, biz Laçın şəhərini tərk etməliyik. Zabux ilə bağlı danışıqları davam etdiririk”...

Separatçıbaşı sərsəmləyib ki, guya istəsələr müvafiq tələbləri yerinə yetirməyə bilərlər, lakin bunun onlara baha başa gələcəyini də unutmurlar, bu səbəbdən də yerinə yetirəcəklər: “Biz bəyanatın 6-cı bəndini yerinə yetirməkdən imtina edə bilərik, lakin bunun nəticələri pis ola bilər. Mən də Laçından çıxmaq siyasətinə qarşıyam, amma 120 min insanımızın taleyini düşünməliyik. Təəssüflər olsun, ölkədə elə bir xain şəbəkə var ki, azərbaycanlılar hətta mənim kabinetdən çıxıb parlamentə nə vaxt gəldiyimi bilirlər”...

Separatçı tör-töküntüsünün rəhbəri hər zaman sərsəmləyir və ağlına gələni danışır, özünü “vacib sima” kimi qələmə verməyə çalışır.

  • “Hərbi cinayətkarın və separatçının nə danışmasının bizim üçün heç bir əhəmiyyəti yoxdur...”

Mövzuya  şərh verən “SƏS” qəzetinin baş redaktoru, siyasi ekspert Bəhruz Quliyev bildirdi ki, Azərbaycan üçün separatçıların sərsəmləmələrinin heç bir əhəmiyyəti yoxdur: “Hərbi cinayətkarın və separatçının nə danışmasının bizim üçün heç bir əhəmiyyəti yoxdur və əgər Araik Arutyunyan hər hansı bir mövqe bildirirsə, bunu özü üçün, yaxud digər separatçılar üçün edə bilər. Fakt budur ki, Azərbaycan 44 günlük müharibədə işğalçı Ermənistanı dizə gətirdi və məğlub etdi, o cümlədən, Qarabağın yerdə qalan bəzi əraziləri də qısa müddətdə suveren ərazilərimiz daxilində olacaq. Buna heç kimin şübhəsi olmamalıdır”.

Onun sözlərinə görə, artıq yaxın vaxtlarda, təqribən bir aydan sonra Laçın şəhəri, eləcə də işğal dövrü Livandan qanunsuz şəkildə köçürülən və Zabux kəndində məskunlaşdırılan separatçı tör-töküntüləri həmin ərazilərdən təmizlənəcək: “Bildiyimiz kimi, yeni Laçın yolunun inşası tamamlanmaq üzrədir və yol istifadəyə verilən kimi proses işə düşür, çünki üçtərəfli bəyanatda da həmin məqamlar açıq-aydın vurğulanıb. Əgər terrorçu Araik düşünürsə ki, oralardan çıxarılan Livan erməniləri Qarabağın digər bölgələrinə yerləşdiriləcək, bu məsələdə də kökündən yanılır, çünki yalnız Zabux kəndi və Laçın şəhəri deyil, bütövlükdə Xankəndi və s. ərazilərdə də sözügedən proses reallaşdırılacaq. Əslində onun özü də bu gerçəkliyi çox yaxşı dərk edir, sadəcə manipulyasiyaları ilə həm özünü, həm də separatçıları aldadır”.

B.Quliyevin sözlərinə görə,  Qarabağ ermənilərinin Azərbaycan vətəndaşları olduğunu da unutmamalıyıq və onlara təhlükəsizlik zəmanətini nə Araik Arutyunyan, nə Nikol Paşinyan, nə də qeyriləri deyil, məhz Azərbaycan verə bilər: “Zabuxla bağlı danışıqlar apardığını iddia edən Araik, necə deyərlər, gözə kül üfürməklə məşğuldur, çünki rəsmi Bakı danışıqları İrəvanla aparır və 30 illik işğal dövründə də separatçıları danışıq tərəfi kimi qəbul etməyib, rədd edib”, deyən siyasi ekspert hesab edir ki, “mövqe”, “açıqlama”, “bəyanat” kimi nümayiş etdirilən  bu oyunbazlıqlar nəticə etibarı ilə sabun köpüyü kimi partlayıb yox olur. Ona görə də düşünürəm ki, Araik Arutyunyanın nə danışmasının bizim üçün heç bir əhəmiyyəti, vacibliyi yoxdur, yaxşı olardı ki, o öz aqibəti barədə düşünsün”.

İradə SARIYEVA

Peşə etikası

Son xəbərlər