Azərbaycan Xəzərin ekologiyası üzrə 6-cı konfrans təşəbbüsü irəli sürdü..

Elçin Bayramlı: “Konvensiya çərçivəsində konfransların təşkili və müzakirəsi olduqca əhəmiyyətlidir”

img

“Bu ilin sonunda Bakıda “Xəzər dənizinin dəniz ətraf mühitinin mühafizəsi haqqında” Çərçivə Konvensiyasının tərəflərinin VI konfransının keçirilməsi nəzərdə tutulub”.

Bu sözləri Prezident İlham Əliyev iyunun 29-da Aşqabadda Xəzəryanı Dövlətlərin Dövlət Başçılarının VI Zirvə Toplantısında çıxışı zamanı bildirib. Ölkə başçısı çıxışı zamanı onu da qeyd edib ki, ətraf mühitin bugünkü vəziyyəti ilə əlaqədar sahilyanı dövlətlərin narahatlığına şərikik. Azərbaycan Xəzər dənizinin ekoloji problemlərinin həlli üçün əməkdaşlığın genişləndirilməsində maraqlıdır. Xəzərin bioloji su ehtiyatlarının qorunub saxlanması və səmərəli istifadəsi üzrə komissiya çərçivəsində Xəzəryanı dövlətlərin uğurlu qarşılıqlı fəaliyyəti davam edir.

“Xəzər dənizinin dəniz ətraf mühitinin mühafizəsi haqqında” Çərçivə Konvensiyasının tərəflərinin VI konfransının keçirilməsi ətraf mühitin qorunmasına necə təsir edəcək?

  • Rövşən Abbasov: “Bu konfrans Azərbaycan iqtisadiyyatına, ekologiyasına müsbət təsir edəcək”

Ekoloq, Xəzər Universitetinin Coğrafiya və ətraf mühit departamentinin müdiri Rövşən Abbasov “Bakı-Xəbər”ə açıqlamasında qeyd etdi ki, Aşqabadda Xəzəryanı Dövlətlərin Dövlət Başçılarının VI Zirvə Toplantısında Xəzər dənizində suyun səviyyəsinin azalması əsas müzakirə olundu. Xəzər dənizində suyun azalma səbəbi hövzədə çay sularından çox istifadə olunmasıdır: “Cənab Prezident çıxışı zamanı qeyd etdi ki, bu problemin həlli yolları axtarılmalıdır, ekspert qrupu yaradılmalıdır. Bu problemin həll yolu Xəzər dənizi su hövzəsində su ehtiyatlarından səmərəli istifadə etməkdir. Kür, Araz, Volqa, Terek kimi iri çayların əvvəlki sululuq dərəcəsi özünə qaytarılsa Xəzərin səviyyəsində əmələ gəlmiş aşağı düşmə tədricən bərpa olunacaq”.

Həmsöhbətimiz onu da əlavə etdi ki, “Xəzər dənizinin dəniz ətraf mühitinin mühafizəsi haqqında” Çərçivə Konvensiyasının tərəflərinin VI konfransında onlayn olaraq qatılacaq və iştirak edəcək: “Bu konfrans Azərbaycan iqtisadiyyatına, ekologiyasına müsbət təsir edəcək”.

Sağlam Cəmiyyət Hərəkatının rəhbəri, sosioloq-jurnalist Elçin Bayramlı bildirdi ki, konvensiya çərçivəsində konfransların təşkili və müzakirəsi olduqca əhəmiyyətlidir: “Nəzərə almaq lazımdır ki, Xəzər dünyanın ən böyük gölü olaraq ekosistemin pozulması çox böyük fəsadlar verə bilər. Axıdılan tullantılar dövr etmədiyi üçün çirklənmə artır. Çirklənmə artdıqca dənizdə ekoloji faciələr baş verə bilər. Bu səbəbdən də sahilyanı ölkələr məlum məsələ ilə bağlı daha sərt tədbirlərə əl atmalıdır. Dənizi çirkləndirən mənbələr araşdırılmalı, balıq ovunun kvotalarına yenidən baxılmalıdır”.

Həmsöhbətimiz onu da əlavə etdi ki, son vaxtlar Xəzər dənizində suyun azalmasında başqa kimyəvi çirklənmə müşahidə olunur. Ən böyük çirklənmə Volqa və Kür çayları ətrafında müşahidə olunur.  Nəticədə dənizdə bakterioloji çirklənmə artır. Bu hal dənizin flora və faunasını da sıradan çıxarır: “Son vaxtlar Xəzər dənizində balıq növlərinin yoxa çıxması da məhz qeyd etdiyim səbəblə bağlıdır”.

Ekspertin sözlərinə görə, konfransların keçirilməsi vacibdir. Bu konfranslar ekosistemin mühafizəsi üçün gündəmdə qalır.

Günel CƏLİLOVA

Peşə etikası

Son xəbərlər