Ermənistanın baş naziri Nikol Paşinyan mətbuata açıqlamasında bildirib ki, Xankəndi ilə Ermənistan arasında əlaqəni təmin edən yeni yolun tikintisi ilə əlaqədar Laçının hazırda Rusiya hərbçilərinin nəzarətində olan bir sıra yaşayış məntəqələri Azərbaycan tərəfinə təhvil veriləcək.
Paşinyan qeyd edib ki, “Laçın dəhlizi”nə çəkilən alternativ yol istifadəyə veriləndən sonra Laçın şəhəri və Zabux kəndi ilə yanaşı, bir qrup erməninin qanunsuz yaşadığı Sus kəndi də Azərbaycan Silahlı Qüvvələrinin nəzarətinə keçəcək. Paşinyan deyib ki, hazırda Laçın şəhərində yaşayan ermənilərin problemi Ermənistan hökumətinin qərarları ilə həll edilir: “Onlar mənzillə təmin olunmalıdırlar. Bu gün Laçında faktiki olaraq ailələr yaşamır”.
Zabux kəndində yaşayan ermənilərə gəlincə, Paşinyanın sözlərinə görə, onların problemi Qarabağ separatçıları tərəfindən həll olunacaq: “Sus kəndinə gəlincə, məndə heç bir məlumat yoxdur. Problem həmin ərazilərin DQMV sərhədlərinin daxilində və ya xaricində olmasıdır”.
Burada təəccüb doğuran məqam Zabux erməniləri ilə bağlıdır. Çünki Paşinyanın açıqlamasından belə məlum olur ki, Zabuxda yaşayan ermənilər oradan çıxmalı olsalar, Qarabağın dağlıq hissəsinə - separatçıların olduğu ərazilərə köçürüləcək. Belə baxanda həmin ermənilər əvvəllər Qarabağda yaşamayıblar. Yəni yerli Qarabağ ermənisi deyillər. Onlar bura Suriya, Livan və başqa yerlərdən köçüb gəliblər. Belə olan halda nəyə əsasən onlar Qarabağda yerləşdirilməlidir?
“Qarabağda Suriya ermənilərinin yerləşdirilməsi yolverilməzdir”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, bu, Ermənistanın növbəti təxribatlara hazırlaşmağından xəbər verir: “Paşinyan keçirdiyi mətbuat konfransında bir sıra sərsəm fikirlər səsləndirdi. O cümlədən qeyd etdi ki, Zabux kəndindəki ermənilər Qarabağda yerləşdiriləcək. Hətta belə fikir səsləndirdi ki, həmin kənddən çıxarılan ermənilər Azərbaycanın hesabına yerləşdiriləcək. O baxımdan hesab edirəm ki, bütün bunlar Ermənistanın növbəti təxribat hazırlığıdır. Çünki məsələ ondadır ki, Zabux ermənilərinin əksəriyyəti Suriya və Livandan olan ermənilərdir. Ərazillərimiz işğal olunandan bir neçə il sonra qanunsuz olaraq həmin ermənilər Zabuxa köçürülüb. Suriyada vətəndaş müharibəsi başlayandan sonra ermənilər Laçına, Zəngilana və digər rayonlara yerləşdirilib. Ərazilərimiz işğaldan azad olunanda qanunsuz olaraq yerləşdirilən ermənilər qaçıb getdilər. Zabuxda ermənilərin qalması “Laçın dəhlizi”nin həmin kənddən keçməsi ilə əlaqədar idi. Zabux Rusiya sülhməramlılarının məsuliyyət zonasına düşdüyü üçün ermənilər orada qaldı. Ancaq yeni yol çəkildiyi üçün onlar oranı tərk edəcəklər. Lakin bu heç də o demək deyil ki, Suriya ermənisi Qarabağda yerləşməlidir. Qəti olaraq buna yol vermək olmaz. Hardan gəliblərsə, ya ora getməlidilər, ya da Ermənistana. Qarabağda Suriya ermənilərinin yerləşdirilməsi yolverilməzdir. Fikrimcə, Paşinyan həm də gündəmdə qalmaq üçün belə təxribatçı, populist açıqlama ilə çıxış edir”.
Bir sözlə, partiya sədri hesab edir ki, bu kimi məsələlərə son dərəcə diqqətlə yanaşmalıyıq.
Vidadi ORDAHALLI
