İranın ali dini lideri Əli Xamneyinin ali müşaviri Əli Əkbər Vilayəti Azərbaycan - İsrail əlaqələrini tənqid edib. “Azad İran” “Telegram” kanalı xəbər verir ki, o bu barədə “Təsnim” xəbər agentliyinə açıqlamasında bildirib. “Bizim onlarla yolumuzun ayrılmasının səbəbi Azərbaycanın İsraillə olan əlaqələridir”.
O həmçinin qeyd edib ki, heç bir müsəlman ölkəsinin İsraillə əlaqə qurmasını müsbət qarşılamır: “Biz müsəlman ölkələrinin İsraillə münasibət qurmalarını qəbul edə bilmərik. İsraillə əlaqədə olan ölkə bir o qədər də bizdən uzaq sayılır”.
Başqa müsəlman ölkələrini, o cümlədən də Azərbaycanı ittiham edən İranın özü 30 il məscidlərimizə donuz bağlayan Ermənistanla can bir qəlbdə olub, Ermənistanı “dar günün dostu” adlandırıb. Görəsən İran niyə bu ölkə ilə dostluq edir? Bəs onun müsəlman təəssübkeşliyi harda qalıb? Özü niyə buna indiyə qədər riayət etməyib və bu gün də etmir?
“Vilayətinin Azərbaycanın İsraillə münasibətini əsassız yerə tənqid etməsi bizdə bəzi suallar yaradır”
Siyasi ekspert Rövşən Rəsulov “Bakı-Xəbər”ə bildirdi ki, İranın Azərbaycana münasibətində biz zaman-zaman həm mənfi, həm də müsbət cəhətdən müxtəlif dəyişikliklər müşahidə edirik, bu da İranın özünə sərf edən vaxtlar baş verir. “İstər siyasi, istər iqtisadi tərəfdən yanaşdıqda İrana sərf etdiyi zaman Azərbaycanın xeyrinə, səmərəsinə olan siyasi baxışlarını nümayiş etdirir. Lakin söhbət digər məqamlara gəldikdə isə başqa mövqe göstərir. Elə götürək Ermənistanla münasibətləri. Ermənistana münasibətə gəldikdə, biz İranın Azərbaycanın xeyrinə olmayan davranışlarını, fikirlərini müşahidə edirik. Əli Xamneyinin ali müşaviri Əli Əkbər Vilayətinin Azərbaycanın İsraillə əlaqələrini tənqid etməsi də bu qəbildəndir. Biz deyə bilərik ki, Azərbaycan İsraillə kifayət qədər dostluq, əməkdaşlıq münasibətləri qurub, eləcə də strateji əməkdaşlığa doğru inkişaf edən yolda münasibət saxlayır. Bu münasibət kifayət qədər münbit səmərələrə söykənməkdədir. Digər tərəfdən, biz bilirik ki, 44 günlük müharibə zamanı İsrail mənəvi cəhətdən Azərbaycanın yanında olduğunu nümayiş etdirdi. Eyni zamanda da müxtəlif beynəlxalq qətnamələr, sənədlər qəbul olunarkən Azərbaycanın əleyhinə olan hər bir sənədə imza atmadı. Bununla da Azərbaycana öz dəstəyini ifadə etdi. Bəli, İranın bəzi siyasiləri boğazdan yuxarı deyə bilərlər ki, müsəlman Azərbaycanın mövqeyini, ərazi bütövlüyünü dəstəkləyirlər, lakin əmələ gəldikdə, biz İrandan tamamilə fərqli mövqe görürük. Bu baxımdan Vilayətinin Azərbaycanın İsraillə münasibətini əsassız yerə tənqid etməsi bizdə bəzi suallar yaradır. Biz də Vilayətiyə sual verə bilərik ki, Azərbaycan İsraillə münasibətlərini inkişaf etdirirsə və İran da bundan narahat olursa, onda Azərbaycan niyə İranın Ermənistanla isti münasibətlərindən narahat olmasın? Bu həmin İran deyilmi ki, sərhədlərin delimitasiyası və demarkasiyası məsələsi qaldırılanda “regionda sərhədlərin dəyişdirilməsinə imkan verməyəcəyini” bəyan etdi? Bu o demək deyilmi ki, İran Azərbaycanın daxili işlərinə müdaxilə edir? Azərbaycan müstəqil ölkədir, müstəqil dövlətdir və hansı dövlətlə istəyirsə onunla da əməkdaşlığını qurur. Üçüncü bir tərəfin Azərbaycanın daxili işlərinə qarışması yolverilməzdir. İran bizə “müsəlman təəssübkeşliyi göstərib İsraillə əlaqəni kəs” deyirsə, bəs özü niyə Ermənistanla can bir qəlbdədir? İranın arxa-dayaq durduğu Ermənistan Azərbaycan məscidlərinə donuz bağlayan ölkə deyilmi? Biz hər zaman müsəlman həmrəyliyinə sadiqik, amma təəssüf ki, dar günümüzdə bu təəssübkeşliyi İrandan görə bilmədik. İran rəsmiləri Ermənistanı bir dəfə də olsun müsəlman məscidlərinə donuz bağladığına görə ittiham etmədi”.
R.Rəsulovun sözlərinə görə, Prezident İlham Əliyev dəfələrlə deyib ki, artıq regionda yeni çağırışlar, yeni reallıqlar meydana gəlib və ənənəvi reallıqlar artıq arxivə gömülüb. R.Rəsulov qeyd etdi ki, ənənəvi reallıqdan uzaqlaşmağın artıq vaxtı çatıb və yaxşı olardı ki, İran hələ də Azərbaycana qarşı terror törətmək istəyində olan, bizə kin bəsləyən Ermənistanla isti əlaqələri dayandırsın: “Bu ölkə Ermənistanın xeyrinə hər hansı bir davranış göstərməkdənsə, Azərbaycanla münasibətlərini normal şəkildə qursun və eyni zamanda ölkəmizin daxili işlərinə müdaxilə etməsin”.
İradə SARIYEVA
