Azərbaycanla Rusiya arasında informasiya təhlükəsizliyi haqqında saziş imzalanandan bir neçə gün sonra rusiyalı jurnalist Vladimir Solovyov Azərbaycana qarşı növbəti təxribat törədib.
O, bədnam David Babayanı (Qarabağdakı qondarma “Arsax” rejiminin “xarici işlər naziri”) özünün “Tam əlaqə” verilişinin efirinə gətirib. Üstəlik, onu “Dağlıq Qarabağın xarici işlər naziri” kimi təqdim edib. O isə dərhal vəziyyətdən istifadə edərək, “Arsax” Azərbaycanın tərkibində olmayacaq, ermənilər minilliklər boyu burada yaşayıb, Qarabağ həmişə erməni torpağı olub” kimi sərsəm açıqlama verib.
Azərbaycanla Rusiya arasında informasiya təhlükəsizliyi haqqında sazişin mürəkkəbi qurumamış erməni quyruğu Solovyov müqavilənin şərtlərini pozdu.
Onun bu təxribatına şərh verən ekspertlər hesab edir ki, Solovyov Azərbaycanın ərazi bütövlüyünə qarşı sistemli hücumlarına görə hazırda bloklanan “RİA Novosti” saytı ilə eyni şeyi edib.
“Solovyov bu təxribatı ilə Lavrovun özünü də pis vəziyyətdə qoyur”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, Rusiyanın xeyli sayda KİV qurumları açıq şəkildə Azərbaycana qarşı əks mövqe tutur. “Təəssüf ki, onların ermənipərəstlikləri indi də davam edir. Onların fəaliyyəti Qarabağda, Xankəndidə olan terror qrupunun təbliğinə yönəlib və separatçıların “legitimliyini” nümayiş etdirməyə çalışırlar. Bir az əvvəl “RİA Novosti” belə bir təxribata yol verdi və terror qrupunun üzvü Artak Beqlaryanı “dövlət naziri” kimi təqdim etdi. Onunla bağlı Azərbaycan rəsmən müəyyən addımlar atdı və “RİA Novosti” Azərbaycan ərazisində bloklandı. Bu, Rusiyada rezonans doğurdu, amma Azərbaycan mövqeyini əsaslandırdı. Azərbaycanla Rusiya arasında informasiya təhlükəsizliyi haqqında saziş imzalandıqdan qısa müddət sonra Solovyovun təxribat törədəcəyi təəccüblü görsənmir. Çünki o hər zaman belə olub, indi də belədir. Solovyov özbaşına hərəkət etmir, onun şəxsi biznesi də var, bu və digər verilişlərindən pul qazanır. Solovyov Rusiyanın, Putinin rəsmi siyasətinə xidmət edir. Yəni Rusiyada hər kəs onu Putinin qeyri-rəsmi sözçüsü kimi tanıyır. Müəyyən məqamlarda müəyyən məsələlərlə bağlı bu cür mövqeni ortaya qoyur, təbliğ etməyə çalışır. Solovyov indi də Xankəndidəki terror qrupunun “xarici işlər nazirinin” müsahibəsini verib və özlərini təqdim etmək üçün ona şərait yaradıb. Təqdimatda da göstərilir ki, guya orada hansısa qurum var və bu da həmin o qurumun təmsilçisidir. Bu Rusiya siyasətinin göstəricidir. Bir daha aydın olur ki, Rusiya Azərbaycanın müvəqqəti nəzarətindən kənarda qalan ərazisində ermənilərin siyasi mövcudluğunu qoruyub saxlamağa çalışır. Bu artıq Rusiyanın gizlətmədiyi mövqedir. Separatçılar orada mövcud olduqca Rusiya hesab edir ki, sülhməramlı adı altında hərbi kontingenti də orada qalacaq. Burada Ermənistanla Rusiyanın maraqları üst-üstə düşür. Oradakı terror qrupunun birbaşa Ermənistan tərəfindən idarə olunduğu heç kəsdə şübhə doğurmamalıdır. Paşinyan belə görüntü yaratmağa çalışır ki, orada gedən proseslər guya onların nəzarətində deyil, onlar “müstəqil mövqe ortaya qoyurlar”. Tamamilə yanlış mövqedir. Dünyanı, Azərbaycanı aldatmağa çalışırlar. Azərbaycan çox yaxşı bilir ki, orada gedən proseslər İrəvandan idarə olunur. Elə bu günlərdə Araik İrəvana çağırılıb və Paşinyanın onunla görüşü oldu. Təbii ki, hərəkətlərini əlaqələndirirlər, məsləhətləşirlər və Paşinyan belə təsəvvür yaratmaq istəyir ki, guya Ermənistan Azərbaycanla danışıqlara, sərhədlərin demarkasiyasına və delimitasiyasına, sülh müqaviləsi bağlamağa hazırdır və sair, amma “Arsax” bununla “razı” deyil. Belə görüntü yaratmağa çalışır... Paşinyan Azərbaycanın ərazi bütövlüyünü tanımağa hazır olduğunu, amma “Arsax”ın bu məsələyə “dəxli olmadığını” deyir”. A.Nağı vurğuladı ki, Solovyov Ermənistanın, ermənilərin Azərbaycana qarşı apardığı məkrli siyasəti ifadə edir və bunu göstərir. “Buna qətiyyən yol vermək olmaz. Solovyov və başqaları ilə bağlı Azərbaycan sərt mövqe tutmalıdır. Azərbaycan Rusiya tərəfdən informasiya təhlükəsizliyi haqqında sazişin tələblərinin yerinə yetirilməsini və Solovyovun cəzalandırılmasını tələb etməlidir. Əvvəl heç bir saziş yox idi, amma indi informasiya təhlükəsizliyi sahəsində konkret saziş imzalanıb. Lavrov gəlib bu sazişi imzladı, amma Solovyov təxribat törətdi, bununla da Rusiyanın özünə ziyan vurur. Aydın məsələdir ki, o verilişdən biznes məqsədilə istifadə edən Solovyov Lavrovu da, Rusiyanı da pis vəziyyətdə qoyur. O sənəd Rusiya mediasının birdəfəlik erməni separatçılarının üzünə bağlanılması üçün imzalandı. Razılığa da gəlindi separatçılara meydan verilməsin. Amma Solovyov bu təxribatı ilə Lavrovun özünü də pis vəziyyətdə qoyur. O bununla öz dövlətini çıxılmaz vəziyyətə salır. Bundan əlavə, bu sənəd əsas verir ki, Azərbaycan Rusiya qarşısında məsələ qaldırsın və onun bu məsələyə aydınlıq gətirməsini tələb etsin. Rusiyanın səfiri Azərbaycan XİN-ə çağırılmalıdır və bu məsələ ilə bağlı izahat tələb olunmalıdır”.
A.Nağı hesab edir ki, sazişdən sonra belə bir təxribata yol verilibsə, bunun üstündən sükutla keçmək olmaz və buna aydınlıq gətirilməlidir. Azərbaycanın bu məsələdə sərt və konkret addımlar atmalı olduğunu deyən A.Nağı hesab edir ki, Ermənistana qarşı da bu cür sərt davranılmalıdır.
İradə SARIYEVA
