Avropa Komissiyasının rəhbəri Ursula fon der Layen Rusiya prezidenti Vladimir Putin iştirak edəcəyi təqdirdə “G20” sammitinin qalan ölkələr tərəfindən boykot edilməsinə qarşı çıxıb. O bu barədə Almaniyanın ZDF telekanalına müsahibəsində bildirib.
Ursula fon der Layen bunu belə əsaslandırıb: “Biz G20-nin iflic vəzyyətə düşüb-düşməyəcəyi barədə diqqətlə düşünməliyik. Buna görə də mən boykot fikrini dəstəkləmirəm”.
Onun sözlərinə görə, Putinin gəlməsi və başqa ölkələrin liderlərinin hər şeyi onun üzünə deməsi daha yaxşı variantdır.
Məlumat üçün qeyd edək ki, “G20” liderlərinin sammiti bu il noyabrın 15-16-sı tarixlərində İndoneziyanın Bali şəhərində keçiriləcək. Tədbirə bütün üzv dövlətlərinin rəhbərləri, o cümlədən Rusiya prezidenti Vladimir Putin dəvət olunub. Sammitdə Ukrayna prezidenti Volodimir Zelenskinin də iştirak etməsi gözlənilir. Bundan əvvəl ABŞ və bir sıra müttəfiq ölkələr Ukraynaya görə “G20” sammitində Rusiyanın iştirakının qarşısını almaq üçün İndoneziyaya təzyiq göstərməyə çalışıblar. Lakin İndoneziya hakimiyyəti cavab olaraq bildirib ki, Rusiyaya dəvət göndərilib və geri götürülə bilməz. Bunu onunla əsaslandırıblar ki, “G20” sammitində iqtisadi məsələlər nəzərdən keçirilir və siyasət onun gündəliyinə təsir edə bilməz. Putinin mətbuat katibi Dmitri Peskov isə Rusiya prezidentinin sözügedən sammitdə iştirak edəcəyi ilə bağlı konkret fikir səsləndirməyib
Maraqlıdır, indiki qarşıdurma vəziyyəti dəyişməsə, Putin bu sammitə gedəcəkmi?
“Putinin sammitdə iştirakı, çox güman, mümkün olmayacaq”
Sözügedən məsələyə aydınlıq gətirən Aydınlar Partiyasının sədri Qulamhüseyn Əlibəyli qarşıdurma davam edəcəyi halda Putinin “G20” sammitində iştirakını istisna etdi: “Əvvəla, vəziyyət dəyişməsə və indiki kimi Rusiyanın Ukraynaya təcavüzü davam etsə, o zaman Putinin sammitdə iştirakının heç bir əhəmiyyəti yoxdur. Çünki “G20” sammiti iqtisadi məsələlərllə bağlı olsa da, orada aktual xarakterli siyasi məsələlər də müzakirə edilir. İndiki məqamda dünyanın bir nömrəli məsələsi Ukraynada yaranmış vəziyyətdir. Adətən həmin tədbirdə dünyanın iqtisadi baxımdan böyük dövlətləri iştirak edir. Ancaq biz nəzərə almalıyıq ki, dünya gündəmini məşğul edən bir nömrəli məsələ Ukraynadır. Rusiyanın Ukraynaya təcavüzü davam etdikcə, bu, Putinin həmin sammitdə iştirakını istisna etməlidir. Ukraynaya təcavüz bu və ya digər formada Rusiyanın beynəlxalq aləmdə təcrid olunmasına xidmət edir. Xarici işlər naziri Sergey Lavrov BMT-də çıxış edəndə zal boş qalmışdı. Bütün bunlardan çıxış edərək hesab edirəm ki, Putinin sammitdə iştirakı çox güman mümkün olmayacaq. Dəvət olunsa da, məlum səbəblərdən tədbirə qatılmayacaq”.
Partiya sədri bunu həm də onunla əsaslandırdı ki, noyabra qədər Ukraynaya hücumun səngiyəcəyi real görünmür.
Vidadi ORDAHALLI
