Rusiya Xarici İşlər Nazirliyinin rəsmi nümayəndəsi Mariya Zaxarova Böyük Britaniyanın baş naziri Boris Consonun Ukrayna böhranı ilə bağlı açıqlamalarını dəhşətli adlandırıb. Eyni zamanda, Zaxarovanın fikrincə, Britaniya hökuməti başçısının çıxışı “Britaniya siyasi yumorunun” nə olduğunu ən yaxşı şəkildə izah edir: “Tutqun, hazırcavab və çox vulqar”.
Qeyd edək ki, Boris Conson Almaniyada keçirilən G7 toplantısında Fransa prezidenti Emmanuel Makrona Ukraynadakı münaqişənin həllinə cəhdin yalnız qeyri-sabitliyə gətirib çıxaracağını deyib. İki ölkə liderləri Kiyevə dəstəyi davam etdirməyə hazır olduqlarını bildiriblər.
Maraqlıdır, bununla Conson nə demək istəyib? Necə yəni, münaqişəni tənzimləmək cəhdi dünyada sabitsizliyi daha da artıracaq?
“Boris Consonun belə fikirlə çıxış etməsi İngiltərənin ABŞ-ın əsas müttəfiqi olmasından irəli gəlir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “Nəzərə almaq lazımdır ki, bu il “G7” sammiti Rusiyanın Ukraynaya qarşı hərbi təcavüzü fonunda keçirildi. Həmin sammitdə alınan qərarlar yeni dünya nizamında Rusiyanın izolyasiyasını dərinləşdirəcək. Çünki tədbirdə Rusiya ilə bağlı müzakirələr diqqət mərkəzində idi. Demək olar ki, Rusiya “G7” ölkələri ilə Ukraynada mübarizə aparır. Ukrayna tərəflər arasında mübarizə poliqonuna çevrilib. ABŞ Rusiyaya qarşı koalisiyanı işlək vəziyyətə gətirib və bu səbəbdən Kremlin bu müharibədə qalib gəlməsi mümkün deyil. Vaşinqton Rusiyanı Ukrayna bataqlığına çəkməklə zəiflədir. Müharibə uzandıqca həm Rusiyanın qalib gəlmə şansı sıfıra enir, həm də böyük resurslar itirir. Həm insan resurslarını, həm də iqtisadi resurslarını itirir. Boris Consonun belə fikirlə çıxış eməsi İngiltərənin ABŞ-ın əsas müttəfiqi olmasından irəli gəlir. Ona görə ki, Britaniya da Rusiyanın zəifləməsini istəyir. Bunun üçünsə müharibənin uzanması ən optimal variantdır. “G7” sammitində qəbul edilən qərarlara uyğun olaraq Ukraynaya bütün sahələrdə dəstək veriləcək. Ukrayna Rusiya üçün yeni Əfqanıstan ssenarisidir. Bununla Rusiya siyasi-hərbi baxımdan deqradasiyaya uğrayacaq. Bundan əlavə, Fransa Rusiya ilə danışıqlarda maraqlıdır və çalışır ki, müharibə atəşkəslə dayansın. Bu da indiki status-kvonun dondurulması deməkdir. Ona görə də Conson bunun əleyhinədir və Fransanın müdaxiləsini doğru saymır. İlk növbədə münaqişənin tənzimlənməsi Qərbin Rusiyanı tam zəiflətməsindən ibarətdir. Fransaya təkbaşına buna gedəcəyi halda Qərb tərəfdaşları tərəfindən qəbul edilməyəcəyi mesajını verir. Müharibənin yalnız birgə səylərlə dayandırılmalı olduğunu vurğulayır”.
Politoloq onu da qeyd etdi ki, qarşıdurma hələ davam edəcək.
Vidadi ORDAHALLI
