“Azərbaycanla UN-HABITAT arasında bu il Azərbaycanda, Ağdamda illik Milli Şəhər Forumunun təşkil olunması məsələsi də müzakirə edilir”. Bunu Prezident İlham Əliyev Ümumdünya Şəhər Forumunun 11-ci sessiyasında videoformatda çıxışı zamanı deyib.
Prezident, həmçinin, “Çıxışımın sonunda böyük məmnuniyyətlə elan etmək istəyirəm ki, Azərbaycan Ümumdünya Şəhər Forumunun növbəti sessiyalarının birinə ev sahibliyi etmək arzusundadır və buna hazırdır. Əminəm ki, yüksək səviyyəli beynəlxalq tədbirlərə ev sahibliyi etməkdə böyük təcrübəyə malik ölkə olan Azərbaycanda Ümumdünya Şəhər Forumunun keçirilməsi uğurlu olacaqdır”- deyə bəyan edib.
“Yəqin ki, biz yaxın vaxtlarda artıq növbəti sessiyanın Bakıda keçirilməsi ilə bağlı qərarla tanış ola biləcəyik”
Bəyanatdan da görsəndiyi kimi, Ümumdünya Şəhər Forumunun növbəti sessiyalarından biri Azərbaycanda keçirilə bilər. Ümumdünya Şəhər Forumunun sessiyasının Azərbaycanda keçirilməsinin çox ciddi əhəmiyyəti olduğunu bildirən siyasi ekspert Tural İsmayılov “Bakı-Xəbər”ə şərhində vurğuladı ki, Azərbaycan indiyə qədər saysız beynəlxalq səviyyəli müxtəlif tədbirlərə çox uğurla ev sahibliyi edib: “Azərbaycan indiyə kimi dəfələrlə dünya səviyyəli bir çox tədbirlərə ev sahibliyi edib. Bütövlükdə, ölkəmizin həm geostrateji mövqeyi, həmçinin paytaxtımızın inkişaf edən şəhərlərdən biri halına gəlməsi regionda Bakının dəyərini və əhəmiyyətini artırır. Buna qədər Azərbaycan bir sıra yarışlara ev sahibliyi edib. İlk Avropa Oyunları, İslam Oyunları və bir çox nüfuzlu idman turnirləri və beynəlxalq beyin mərkəzlərinin önəmli siyasi tədbirləri paytaxt Bakıda keçirilib. Bundan əlavə, NATO ilə Rusiya silahlı qüvvələri arasındakı danışıqlarda da neytral şəhər kimi Bakı mühüm əhəmiyyətə malik olub. Hesab edirəm ki, cənab Prezidentin Ümumdünya Şəhər Forumunda səsləndirdiyi fikirlərin böyük əhəmiyyəti var. Azərbaycanda gələcəkdə Ümumdünya Şəhər Forumunun növbəti sessiyası keçirilə və Bakı bu sessiyanın keçirilməsində əhəmiyyətli rollardan birini oynaya bilər. Xüsusən də “Formula-1” yarışlarından sonra paytaxtımızın xüsusən turizm potensiyalı daha da artıb. Bu baxımdan, fikrimcə, Ümumdünya Şəhər Forumunun növəti sessiyalarının ölkəmizdə keçirilməsi labüddür. Yəqin ki, biz yaxın vaxtlarda artıq növbəti sessiyanın Bakıda keçirilməsi ilə bağlı qərarla tanış ola biləcəyik”.
T.İsmayılov həmçinin vurğuladı ki, bütövlükdə həm paytaxt Bakı, həm də işğaldan azad edilən Şuşa şəhəri bu gün dünyanın önəmli müzakirələrinin aparıldığı, mühüm beyin təşkilatlarının tədbirlərinin keçirildiyi önəmli məkanlardan birinə çevrilib. “Hesab edirəm ki, paytaxtımızın qlobal əhəmiyyətinin artması Ümumdünya Şəhər Forumu və bu qəbildən olan bir çox önəmli layihələrin gələcəkdə Bakıda keçirməsilməsinə zəmin yaradır” - deyə T.İsmayılov qyed etdi.
İradə SARIYEVA
