Rövşən Rəsulov: “Vətən müharibəsində Azərbaycanın qələbəsini şərtləndirən amillərdən biri məhz güclü, yenilməz orduya sahib olmağımızdır”
1918-ci il iyunun 26-da Azərbaycan Demokratik Respublikası Nazirlər Şurasının qərarı ilə ilk müntəzəm hərbi hissə – əlahiddə Azərbaycan korpusu yaradılıb. Azərbaycan Prezidentinin 22 may 1998-ci il tarixli qərarına əsasən, 26 iyun Silahlı Qüvvələr Günü elan edilib. 104 illik tarixi olan Azərbaycan Silahlı Qüvvələri milli dövlətçilik tariximizə zəfər salnaməsi yazıb.
Azərbaycan ordusu 44 günlük Vətən müharibəsində qazandığı möhtəşəm qələbə ilə müzəffər, yenilməz ordu adını qazanıb. Vətən müharibəsində Azərbaycanın Qələbəsini şərtləndirən bir sıra amillər olub ki, bunlar ölkəmizin iqtisadi gücü, güclü ordu faktoru, milli həmrəylik və birlik, beynəlxalq səviyyədə uğurlardır. Məlumdur ki, bütün bunları təmin və təşkil edən, bütün resursları vahid amal uğrunda səfərbər etməyi bacaran İlham Əliyev kimi liderin olması Azərbaycanın hərbi qüdrətini daha da artırıb və bizi Vətən müharibəsində möhtəşəm qələbə qazanmağa aparıb.
Siyasi ekspert Rövşən Rəsulov baki-xeber.com-a bildirdi ki, Azərbaycanın Vətən müharibəsində tarixi Qələbə qazanmasında milli həmrəylik amili və digər məsələlər də mühüm rol oynayıb. “Hələ 44 günlük Zəfər yürüşündən əvvəl, torpaqlarımız işğal altında qaldığı dövrlərdə xüsusi ilə vurğulanırdı ki, müharibə başa çatmayıb, nə qədər torpaqlarımız işğal altındadır biz torpaqlarımızı işğaldan azad etmək üçün bütün vasitələrdən istifadə edəcəyik. Əlbəttə ki, möhtəşəm qələbəyə gedən yolun əsası ulu öndər Heydər Əliyev tərəfindən qoyulub. Ulu öndər həmişə vurğulayırdı ki, güclü iqtisadiyyatı olmayan dövlət heç vaxt uğur qazana bilməz. Ona görə də ölkəmizdə güclü iqtisadiyyat quruldu. Güclü iqtisadiyyatın qurulması eyni zamanda digər sahələrə transfer olunurdu, iqtisadiyyatdan gələn gəlirlərdən ordu formalaşdırılırdı. Qüdrətli ordunun formalaşdırılması üçün müxtəlif ən yeni nəsil, güclü silah-sursatlar, hərbi təchizatlar əldə olundu ki, bunun nəticəsində ordumuzun müasir standartlara cavab verməsi istiqamətində çox mühüm addımlar atıldı. Əbəs deyil ki, bu gün Azərbaycanın qüdrətli ordusu dünyanın ən güclü silahlı qüvvələri sırasında yer alır, eyni zamanda Cənubi Qafqazda da geosiyasi vəziyyətin dəyişməsinə nail olur. Vətən müharibəsində qazandığımız qələbənin daha bir mühüm faktoru milli həmrəylik idi ki, bunun da əldə olunması üçün vahid amal formalaşdırılıb. O vahid amal müzəffər Ali Baş Komandan, Prezident İlham Əliyevin ətrafında birləşməklə düşmənə qarşı ümumxalq müqaviməti göstərmək idi. Şanlı ordumuzun cəbhədə qazandığı nailiyyətlərin, uğurların hər birinin təməlində məhz xalq-dövlət, xalq-Ali Baş Komandan, xalq–ordu birliyi dayanırdı. Milli həmrəyliyin və birliyin nəticəsində də Azərbaycan ordusu Qarabağ cəbhəsində əzmlə mübarizə apararaq düşməni məhv etdi. Reallıq budur ki, Vətən müharibəsində Azərbaycanın qələbəsini şərtləndirən amillərdən biri məhz güclü, yenilməz orduya sahib olmağımızdır. Başqa bir tərəfdən, burada xarici diplomatiya barədə xüsusi danışmaq lazımdır. Təbii ki, Ali Baş Komandan İlham Əliyev 44 gün boyunca bütün dünyaya Azərbaycanın haqq səsini çatdırdı. Əslində, müharibədən əvvəl də Prezident İlham Əliyev informasiya sahəsində ciddi işlər gördü, bu gün də o işlər davam etdirilir. Heç şübhəsiz ki, Ali Baş Komandan siyasi arenada, diplomatik cəbhədə və informasiya savaşında da ciddi uğurlara imza ataraq ölkəmizə böyük qələbə qazandırdı. Cənab Prezidentin 44 günlük Vətən müharibəsi dövründə dünyanın bir sıra nüfuzlu media qurumlarına müsahibələri Azərbaycanın ədalətli mövqeyini dəfələrə əks etdirdi. Belə deyə bilərik ki, cənab Prezident iki cəbhədə mübarizə aparırdı. Həm müharibə cəbhəsində düşmənə qarşı, həm də düşmənlərin yalanlarına qarşı informasiya cəbhəsində mübarizə apardı. Bütün bunların əsasında dayanan məqsəd Azərbaycanın suveren ərazilərinin bərpası, ərazi bütövlüyünün təmin olunması idi”.
R.Rəsulov qeyd etdi ki, Azərbaycan ordusunun cəbhədə qazandığı qələbə regionda yeni reallıqlar yaratdı və bütün dünya da o reallıqlarla hesablaşmaq məcburiyyətdir. O, hesab edir ki, Azərbaycan regional liderdən beynəlxalq liderə çevrilmək üzrədir. “Azərbaycanın tarixi uğur qazandığı 44 günlük Vətən müharibəsi bölgədə yeni siyasi reallıqlar yaratdı. Biz burada Azərbaycanın yanında dayanan qardaş Türkiyəni də unutmamalıyıq. Bu gün Türkiyə dünyəvi ölkə olaraq artıq öz iradəsini qətiyyətlə ifadə edir. Bütün bunların müqabilində Azərbaycanın da beynəlxalq aləmdəki uğurlu siyasəti bizim yaxın gələcəkdə daha böyük zəfərlərə imza atacağımızdan xəbər verir. Bu baxımdan, bütün bu sadalanan amillər paralellik təşkil edir və bir-birini tamamlayır. Bunlar isə təbii ki, ölkəmizin regional və dünyəvi gücünü daha da artırmış olur. Onu da vurğulayım ki, Azərbaycanın hərbi büdcəsi də yeniləndi, artırıldı və artıq yenə də yeni silahlar alınır, yeni təchizatlar əldə olunur. Bütün bunlar həm də onu deməyə əsas verir ki, Azərbaycan ordusu, Azərbaycanın qüdrətli şanlı Silahlı Qüvvələri qarşıdakı illərdə daha böyük uğurlara imza atmağa hazırlaşır. Təbii ki, bu proseslərin hər birinin təməlində dayanan əsas amil isə regional sülhün əldə olunması və onun müdafiəsidir” - deyə R.Rəsulov qeyd etdi.
İradə SARIYEVA
