Azərbaycanla Ermənistan arasında münasibətlərin normallaşma prosesinin uzanması özü ilə risqlər gətirir. Bunu xarici işlər naziri Ceyhun Bayramov Bakıda rusiyalı həmkarı Sergey Lavrovla birgə mətbuat konfransı zamanı deyib.
"Azərbaycan tərəfinin mövqeyi ondan ibarətdir ki, dövlətlərarası münasibətlərin normallaşması üçün bütün üçtərəfli bəyanatların tam və qeyd-şərtsiz icra olunması lazımdır. Bu, regionda inkişafın rəhnidir, çünki normallaşma prosesinin süni şəkildə ləngidilməsi bu prosesə mənfi effekt qatır və özü ilə ciddi risklər gətirir", - nazir deyib.
C.Bayramov, həmçinin, Azərbaycan, Rusiya və Ermənistan liderlərinin əldə etdiyi üçtərəfli bəyanatlarda vurğulanan razılaşmalara nail olunmasında Rusiyanın xüsusi rolunu vurğulayıb.
Rusiya və Azərbaycanın nəqliyyat əlaqələrinin inkişafına xüsusi əhəmiyyət verdiyini deyən nazir bildirib ki, bu kontekstdə "Şimal-Cənub" layihəsi xüsusi əhəmiyyət daşıyır. “O, son illər ərzində öz səmərəliliyini sübut edib və inkişaf üçün böyük perspektivlərə malikdir. Bu məsələ bugünkü danışıqlar zamanı müzakirə olunub", - C.Bayramov deyib.
Bakı ilə İrəvan arasında münasibətlərin normallaşması prosesində Rusiyanın roluna toxunan XİN rəhbəri bildirib ki, tərəflər post-münaqişə tənzimlənməsi məsələsinə də toxunublar, regionda sülh və əməkdaşlıq mühitinin formalaşdırılmasının zəruriliyi xüsusi vurğulanıb.
"Azərbaycan o mövqedən çıxış edir ki, münaqişə geridə qalıb və regionda dayanıqlı sülh və rifah üçün əldə olunan razılaşmaları icra etmək lazımdır. Biz Azərbaycan, Rusiya və Ermənistan liderlərinin əldə etdiyi üçtərəfli bəyanatlarda vurğulanan razılaşmalara nail olunmasında Rusiyanın xüsusi rolunu qeyd edir və bunu yüksək qiymətləndiririk", - deyə o bildirib.
Ceyhun Bayramov deyib ki, Azərbaycan və Rusiyanın Qarabağın bərpasında birgə iştirakı əməkdaşlığımızda vacib məqamdır.
"Azərbaycan üçün başlıca prioritet işğaldan azad edilmiş ərazilərin bərpasıdır ki, buna dövlət səviyyəsində birinci dərəcəli əhəmiyyət verilir. Çoxlu sayda layihə icra olunur, bərpa yüksək sürətlə davam edir və artıq yaxın zamanlarda biz ilk məcburi köçkünlərin azad edilmiş ərazilərə qayıtmasını görəcəyik", - nazir deyib.
C.Bayramov qeyd edib ki, bu baxımdan, azad edilmiş ərazilərin bərpası üzrə layihələrdə birgə iştirak Azərbaycan və Rusiya arasında əməkdaşlığın vacib məqamıdır.
Ceyhun Bayramov qeyd edib ki, Azərbaycanla Ermənistan arasında münasibətlərin normallaşmasına nail olmaq üçün unikal imkan yaranıb. "Çünki işğal vaxtında mövcud olmuş fundamental problem aradan qaldırılıb. Azərbaycan bunu tək sözdə deyil, həm də real addımlarda nəzərə alır", - deyə nazir bildirib.
Ceyhun Bayramov onu da qeyd edib ki, Azərbaycan-Ermənistan münasibətlərinin normallaşması prosesi hansısa formatın girovuna çevrilməməlidir.
"2022-ci ilin fevralından başlayaraq məlum səbəblərlə əlaqədar ATƏT Minsk qrupu həmsədrlərinin qarşılıqlı fəaliyyəti tam iflic olub. Və biz bu məlumatı rusiyalı tərəfdaşlarımız da daxil olmaqla müxtəlif mənbələrdən almışıq. Bu vəziyyətdə Azərbaycanın mövqeyi ondan ibarətdir ki, bizim üçün regionda uzunmüddətli, möhkəm və dayanıqlı sülhün əldə olunması prioritetdir. Bu prizmadan baxarkən proses formatın girovuna çevrilməməlidir. Təbii ki, biz mövcud olmayan formata yönələ bilmərik", - deyə nazir bildirib.
“Rusiya və Azərbaycan informasiya təhlükəsizliyi sahəsində saziş imzalayıb”. Bunu isə Rusiya xarici işlər naziri Sergey Lavrov deyib.
"Bu gün bizim informasiya təhlükəsizliyi sahəsində imzaladığımız saziş təkcə KİV-in fəaliyyətini deyil, həm də kiberməkanı hərbi məqsədlərlə istifadə etmək cəhdləri ilə bağlı problemləri də əhatə edir. Bu məsələlər artıq uzun müddətdir ki, BMT-də müzakirə olunur. Rusiya bu müzakirələrin təşəbbüsçüsü olub. KİV-ə gəldikdə isə, biz başa düşürük ki, bu və ya digər qərar hansı səbəblərdən qəbul olunur. Biz, ilk növbədə, aparıcı KİV rəhbərləri ilə tədbirlər silsiləsi keçirəcək və müvafiq qanunlara əsaslanaraq bir-birimizin ərazilərində bu və ya digər hadisələri necə işıqlandırdığımız barədə müzakirələr aparacağıq. Razılıq əldə olunub ki, bu cür iş XİN informasiya xidmətlərinin himayəsi altında aparılsın", - deyə S.Lavrov bildirib.
Ceyhun Bayramov öz növbəsində deyib ki, müvafiq strukturlar arasında qarşılıqlı fəaliyyət yüksək səviyyədədir.
"Sirr deyil ki, son aylarda bir sıra problemli məsələlər olub. Azərbaycanın bir neçə media resursu Rusiyada bağlanıb, bu ayın əvvəlində "RİA Novosti" dövlət informasiya agentliyi Azərbaycanda bloklanıb", - nazir deyib.
O əlavə edib ki, əsas vurğu tərəfləri bu cür halların qarşısını almağa stimullaşdıracaq mexanizmlərin hazırlamasına yönəlib.
Lavrov qeyd edib ki, ATƏT Minsk qrupu öz mövcudluğunu dayandırıb.
Azərbaycanla Rusiya arasında təmasların daim yüksək səviyyədə reallaşdırıldığını deyən Rusiyanın xarici işlər naziri “Bu gün Ceyhun Bayramovla əməkdaşlıq barədə məhsuldar danışıqlar keçirdik. Fevralda əməkdaşlığımızın onsuz da yüksək olan səviyyəsi hüquqi cəhətdən rəsmiləşdirildi. Ölkələrimiz arasında təmaslar ən yüksək səviyyədə daim reallaşdırılır. Ticarət dövriyyəsinin həcmi 3,5 milyard dollar - rekord səviyyədədir", - deyə bildirib.
Lavrov deyib ki, ölkəsi Rusiya şirkətlərinin Qarabağda bərpa işlərində iştirak etməkdə marağını təsdiq edir:
"Biz Rusiyanın iqtisadi operatorlarının Azərbaycan ərazilərinin post-münaqişə bərpasına qoşulmaqda marağını təsdiq edirik”.
Rusiya XİN başçısı bildirib ki, Rusiya tərəfi regionda sülhün qurulması, sərhədin delimitasiyası prosesi üçün zəruri xidmətləri göstərməkdə davam edəcək.
“Rusiya bütün zəruri məsləhət xidmətlərini göstərməyə hazır olacaq. Həmçinin, biz azərbaycanlı dostlarımızın təşəbbüs göstərdiyi Bakı ilə İrəvan arasında sülh müqaviləsinin imzalanmasında kömək göstərməyə hazırıq", - deyə S.Lavrov bildirib.
Nazir onu da bildirib ki, Azərbaycanla Ermənistan arasında sərhədin delimitasiyası üzrə komissiyanın ikinci iclasının vaxtı razılaşdırılır.
"Bir neçə gün əvvəl İrəvana səfərim zamanı baş nazir və xarici işlər nazir ilə danışmışıq. Onlar komissiyanın ikinci görüşündə iştirakla bağlı hazır olduqlarını ifadə ediblər. Bu görüş Moskvada razılaşdırılıb, indi hər iki tərəf üçün uyğun vaxtı seçirik. Mən tərəflərin fikirlərini dəyişdiyi, bu prosesdə iştirak etmək istəmədiyi barədə hər hansı siqnal görməmişəm. Əksinə, mən həm İrəvanda, həm də bu gün burada təsdiq almışam ki, delimitasiya bu mərhələdə bütün səylərin ən vacib komponentidir", - deyə o bildirib.
