Ermənistan prezidenti Vaaqn Xaçaturyan da müxalifətin “Qarabağ Azərbaycanın tərkibində ola bilməz” tələbinə cavab verməkdən imtina etdi. V.Xaçaturyan prezidentliyinin 100 günü münasibətilə ölkə ictimai televiziyasına müsahibəsində deyib ki, əgər siz Dağlıq Qarabağ Azərbaycanın tərkibində ola bilməz deyirsinizsə, özünüzü manevr hüququndan məhrum edirsiniz:
“Biz siyasəti diplomatiyadan, populizmi ictmai bəyanatlardan fərqləndirməyi bacarmalıyıq. Biz bunlara əməl etməyi bacarmır, hamısını qarışdırırıq. Biz realist olmalıyıq. Siz bunu bəyan edəndə manevr hüququnuzu itirirsiniz. Adamları, xüsusilə də danışıqlar prosesində iştirak edən və ölkəmiz üçün məsuliyyət daşıyan şəxsləri belə imkandan məhrum etmək lazım deyil. Baş nazir bunu açıq demək üçün özündə cəsarət tapıb. Bunun nəyi pisdir? Hər şeyi açıq demək olmur. Bizim müxalifətimiz də bunu çox yaxşı bilir. Çünki müxalifətdə elə adamlar var ki, belə situasiyaya düşüblər. Bu mənada onların davranışları məndə suallar yaradır”.
“Hayastan” fraksiyasından deputat Lilit Qalstyan deyib ki, V.Xaçatryan bu müsahibəsi ilə bir daha heç də bütün ermənilərin yox, hakim “Vətəndaş müqaviləsi” partiyasının prezidenti olduğunu isbat edib.
Görünən odur ki, Ermənistan prezidenti müharibədən sonra Qarabağla yaranan reallıqları qəbul edir.
“Ermənistan rəhbərliyi dərk edir ki, yeni qurulan siyasi düzəndə Rusiyanın təsir imkanları getdikcə zəifləyir”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyevin fikrincə, Ermənistanın indiki hakimiyyəti bəzən yeni siyasi reallıqları ciddi mesaj kimi cəmiyyətə ötürmək məcburiyyətində qalır: “Vaxtilə Ermənistanın hakimiyyətində olmuş cinayətkar rejimlər cəmiyyəti mifoloji təsəvvürlərlə o qədər "yükləyib" ki, indi cəmiyyəti yeni reallıqlara inandırmaq çox çətindir. Bunu indiki siyasi hakimiyyət çox yaxşı dərk edir. Ona görə bəzən reallıqları doğru şəkildə təqdim edirlər. Dəqiq deyə bilmərəm, "xəstə təfəkkürə" uğradılmış bu cəmiyyəti necə xilas etmək olar. Əlbəttə, bu onların öz işidir. Aydın məsələdir ki, Ermənistanın hazırki iqtisadi vəziyyəti tənəzzül dövrünü yaşayır. Gələcəkdə də heç bir perspektiv olmadığı üçün hər hansı bir irəliləyişdən danışmaq mümkün deyil. Məhz bunu dərk edən erməni siyasətçiləri bəzən həqiqətləri dilə gətirməklə, özlərini gələcəkdə baş verə biləcək qorxunc hadisələrdən sığortalamış olurlar. Ermənistanın prezidenti Vaaqn Xaçaturyanın bu sualdan imtina etməsinin əsas səbəbi mövcud reallıqlarla bağlıdır. Bu gün Azərbaycanın iqtisadiyyatı, siyasəti, hərbi sənayesi, xarici diplomatiyası biri digərini ən yüksək səviyyədə tamamlayır. Eyni zamanda daxili sabitlik, Azərbaycan cəmiyyətinin vahid “Dəmir Yumruq” halında birliyi düşmənə heç bir şans buraxmaq niyyətində olmayacağımızı bilən erməni rəhbərliyi, bu reallıqları öz cəmiyyətinə mesajlar vasitəsilə örtürmək məcburiyyətində qalır. Bir tərəfindən də bütün varlığı ilə Moskvadan asılı vəziyyətdə olan Ermənistan rəhbərliyi dərk edir ki, yeni qurulan siyasi düzəndə Rusiyanın təsir imkanları getdikcə zəifləyir. Bütün bunlardan o nəticəyə gəlirik ki, Ermənistanın siyasi gündəmini Azərbaycan dövləti diqtə edir. Bu o zamana qədər davam edəcək ki, Ermənistan hakimiyyəti və cəmiyyəti Azərbaycan dövlətilə sülhə razılıq versin, dinc yaşamaq mövqeyinə qatıtsın”.
Sədr müavini onu da əlavə etdi ki, belə olarsa qarşılıqlı etimad yarana bilər.
Vidadi ORDAHALLI
