Məlum olduğu kimi, “Azərbaycan Respublikası Milli Məclisinin deputatının statusu haqqında” qanuna dəyişiklik edilir. Dəyişikliklərə əsasən, deputatların maaşı kəskin – 43% artırılır, onlara aylıq maaşlarının bir mislində deyil, iki mislində əlavə veriləcək. Bəs sözügedən təklif parlamentdə qəbul edilərsə, deputatların rəsmi gəlirləri neçə manat artacaq?
Hazırkı qanunvericiliyə əsasən, Milli Məclisin sədri Sahibə Qafarova 2475 manat miqdarında aylıq vəzifə maaşı alırdı. Dəyişiklik olarsa, onun əməkhaqqı nə az, nə çox 43,43 %, yəni 1075 manat artacaq. Bununla da, MM sədrinin aylıq vəzifə maaşı 3550 AZN olacaq.
Bundan əlavə, təklif olunan dəyişikliyə əsasən, Milli Məclisin sədri hər ay vəzifə maaşının iki misli məbləğində maaşa əlavə alacaq. Dəyişiklik qəbul olunarsa, bir ay ərzində Milli Məclisin sədrinin rəsmi gəlirləri 10 650 AZN olacaq.
Maaş artımı sıravı deputatlardan tutmuş, Milli Məclisin sədr müavinləri, komitə sədrlərinə qədər şamil olunacaq. Belə ki, Milli Məclisin sədrinin birinci müavini Əli Hüseynli bu dəyişikliyə qədər aylıq 2227.5 manat əmək haqqı alırdısa, qanun qəbul olunduqdan sonra onun rəsmi maaşı 3195 AZN olacaq. Bu məbləğin üzərinə hər ay vəzifə maaşının iki misli məbləğində vəzifə maaşına əlavəni gələndə isə bu rəqəm 9585 AZN-ə çatacaq.
MM-in sədr müavinləri Adil Əliyev və Fəzail İbrahimlinin maaşları isə 2103.75 manatdan 3017.5 manata qalxacaq. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə gəlinəndə isə onların gəlirləri 9052.5 manata yüksələcək. Milli Məclisin komitə və komissiya sədrlərinin əmək haqları 1980 AZN idisə, bundan sonra bu məbləğ 2840 manat olacaq. Bu məbləğin üzərinə hər ay vəzifə maaşlarının iki misli məbləğində vəzifə maaşına əlavə olunanda isə bu rəqəm 8520 AZN-ə çatacaq. Milli Məclisin komissiya sədrinin müavinlərinin əmək haqları isə 1856,25 manatdan 2662.5 manata çatdırılır. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə olunanda isə onların gəlirləri 7987.5 manat təşkil edəcək. Sıravi deputatların maaşları da 43% artırılır. Belə ki, bu günə qədər 1732.5 AZN əmək haqqı alan deputat, bundan sonra 2485 manat vəsait alacaq. Bu məbləğin üzərinə onların hər ay vəzifə maaşlarının iki misli məbləğində vəzifə maaşına əlavə olunanda isə onların gəlirləri 7455 manata yüksələcək.
Deputatların əmək haqlarının artırılması sosial şəbəkələrdə böyük müzakirələrə səbəb olub. Belə ki, bu artıma qədər deputatla ölkədə minimum əmək haqqı (300 AZN) alan vətəndaşın gəlirləri arasında 11.5 dəfə fərq var idisə, bundan sonra bu rəqəm 24,85 dəfəyə çatacaq.
Məlumat üçün bildirək ki, deputatların gəlirlərinin vergiyə cəlb olunan hissəsi yalnız vəzifə maaşlarıdır. Belə ki, onlara verilən vəzifə maaşına əlavələrdən vergi tutulmur.
Qeyd edək ki, sonuncu dəfə Azərbaycanda əhalinin əmək haqları bu ilin yanvar ayında 10-20% civarında artırılıb.
Deputatların maaşlarının kəskin artırılmasına etiraz edən vətəndaşlar nümunə kimi Prezidenti göstərirlər. Qeyd edık ki, Azərbaycan Prezidenti İlham Əliyevin maaşı 15 000 manatdır. Prezident öz maaşının artırılmasını 2005-ci ildən dayandırıb. İlham Əliyevin təşəbbüsü ilə Azərbaycan Prezidentinin “minimum əmək haqqının 600 misli” qədər maaş alması müddəası Seçki Məcəlləsindən çıxarılıb və dövlət başçısının maaşı 15 min manat müəyyən edilib. Həmin dövrdən bəri ölkədə minimum əmək haqqı dəfələrlə artırılsa da, bu, Prezidentin maaşına təsir etmir.
Demokratik Dəyişim Partiyasının sədri Əli Mustafa “Bakı-Xəbər”ə açıqlamasında bildirdi ki, ölkədə əmək haqqının qaldırılması vacibdir: “Çünki dünyada gedən proseslər bahalaşma, infliyasiya yaradıb. Hazırda mövcud əmək haqqı ilə normal dolanmaq çox çətinləşib. Atılan addımlar bütün əhaliyə şamil olunmalıdır. Ola bilsin ki, deputatların da ehtiyac və tələbatları çoxdur, əmək haqları dolanışıqlarına çatmır. Düşünürəm ki, belə vəziyyətdə deputatlar yalnız özlərini düşünməməlidirlər. Bu artım tələbini bütün xalqa, xüsusilə də aztəminatlı təbəqəyə aid etməlidirlər. Pensiyaçıların, müəllimlərin, həkimlərin də əmək haqları artırılmalıdır. Çünki infliyasiya artıq ikirəqəmlidir. Bahalaşma çox sürətlə gedir. Dövlət xalqın maddi vəziyyətini nəzərə almalıdır. Dünyada neft və qazın qiymətində bahalaşma var. Bunun fonunda bizim büdcə gəlirlərimiz də artıb. Bu yaxınlarda məlumat verdilər ki, 2 milyard 500 min əlavə gəlir yaranıb. Bu vəsait əhalinin sosial vəziyyətinin yaxşılaşmasına yönəlməlidir. Yaxşı olardı ki, deputatlar əvvəlcə sadə xalqın, öz seçicilərinin problemləri ilə məşğul olar, sonra öz güzəranlarından gileylənərdilər. Əhalinin sosial güzəranı barədə təklifləri arxa plana keçirib özləri barədə düşünəndə, təbiidir ki, bu birmənalı qarşılanmayacaq”.
Məhəmmədəli QƏRİBLİ
