“Biz Azərbaycanda rus dilinə göstərilən diqqəti qiymətləndiririk”. Bunu Rusiya Federasiyasının xarici işlər naziri Sergey Lavrov Azərbaycan Prezidenti İlham Əliyevlə görüşündə deyib.
Bir müddət əvvəl isə Lavrov Ermənistanda olarkən bildirirdi ki, orada rusdilli məktəblərin sayını artırmaq istəyirlər. O, Ermənistanda rusdilli məktəblərin sayının az olduğunu dolayısı ilə vurğulayırdı və bu ölkədə yeni məktəblər açmaq niyyətini ortaya qoyurdu. Bildiyimiz kimi, Rusiya xarici işlər nazirinin rus dilli məktəblərlə bağlı bəyanatı Ermənistanda ciddi ictimai narazılıqla qarşılandı.
Rusiya indi baxıb görsün Azərbaycanda rus dilinə, rus dilli təhsilə necə yanaşılır, Ermənistanda necə münasibət göstərilir.
“Görünən odur ki, Rusiya Azərbaycanın düzgün mövqe tutduğunu görməyə başlayıb, bu həm də onun dilə gətirilməsidir”
AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə açıqlamasında bildirdi ki, Lavrovun Azərbaycana gəlməsi, bundan əvvəl Ermənistanda olması və hər iki ölkədə çıxışlar etməsi Rusiyanın Ukraynada müharibə apardığı şəraitdə əvvəlki nüfuzunu müəyyən bölgələrdə bərpa etmək istəyindən irəli gəlir. “Azərbaycan dövləti, Azərbaycan xalqı həmişə tolerant olub. Çünki biz elə bir mühitdə yaşamışıq ki, burada millətlərarası münasibətlər, millətlərarası ünsiyyət həmişə yüksək səviyyədə olub. Bu da xalqımızın mentalitetindən irəli gəlir. Azərbaycanın paytaxtı Bakı XIX əsrdən başlayaraq bütün dünya xalqlarına qucaq açıb. 1907-ci ildə “Yurddaş” qəzeti yazırdı ki, Azərbaycan dünya proletariatının sərgisidir. Yəni Azərbaycana dünyanın hər yerindən, o cümlədən Rusiyanın müxtəlif bölgələrindən insanlar gəlib çörək qazanırdılar. Biz də bunlara həmişə normal münasibət bəsləyirdik. Ona görə də Azərbaycanda milli münaqişə xalqdan gəlmirdi, bu imperiya siyasətindən irəli gəlirdi. Məsələn, 1905-ci il fevralın 6-da və 9-da Bakıda baş verən erməni-müsəlman qırğını birbaşa Çar Rusiyasının jandarm siyasətinin nəticəsi idi. İndi də Azərbaycan xalqı o ənənəni davam etdirir, Azərbaycan vətəndaşı olan ruslara həmişə qayğı ilə yanaşır. Onların dilinə hörmət edir, məktəblər yaradır. Azərbaycanda rus dilinə hər zaman böyük hörmət olub və rusdilli təhsilin inkişafına şərait yaradılıb. Amma çox təəssüf ki, Rusiyanın yeritdiyi imperiya siyasəti bunu düzgün qiymətləndirmir. Ermənistanda bir dənə rus dilində məktəb qalmaya-qalmaya, SSRİ dağılandan sonra rus dili sıxışdırılaraq aradan çıxarıldığı halda Azərbaycan xalqı öz ənənəsinə sadiq qalaraq rus xalqına, rus dilinə hörmətlə yanaşıb. Demək istəyirəm ki, bizim mövqeyimiz düzdür, amma çox təəssüf, Putin, Lavrov başda olmaqla Rusiyanın xarici siyasəti düzgün deyil. Onlar bundan nəticə çıxarıb dinc qonşuluq münasibəti yaratmaq əvəzinə burada V kalon yaradıb dövlətimizi zəiflətmək yolunu tuturlar. Bu da ən çox Rusiyanın özünə ziyandır”.
M.Zülfüqarlının sözlərinə görə, Azərbaycan dövləti Həştərxanda məktəb tikdirib, ölkəmizdəki rus mədəniyyət mərkəzinə hər cür qayğı göstərib, rus icmasının nümayəndəsi parlamentdə təmsil olunur. M.Zülfüqarlının fikrincə, bu amilləri düzgün qiymətləndirmək əvəzinə Rusiya faşist rejimi olan Ermənistana dəstək verir, sülhməramlılar da Qarabağa gəldikdən sonra burada münaqişəni yenidən qızışdırmağa çalışır. “Ona görə də, başda Prezident olmaqla, Azərbaycan xalqı bunların hamısını incəliyinə qədər bilir. Lavrovun da gəlişi yenə də dövlətimizin güclü olduğunu sübut etdi. Lavrov kimiləri gəldi-gedərdir. Azərbaycan dövləti inkişafdadır, güclənməkdə davam etməkdədir. Bizim öz siyasətimiz var. Rus dilinə hörmətlə yanaşmağımız Lavrova, Putinə görə deyil, bu rus xalqının özünə verdiyimiz dəyərdən və mentalitetimizdən irəli gəlir. Lavrov da açıq görür ki, Ermənistanda rus dili tapdanır, amma Azərbaycanda rus dilinə çox müsbət münasibət var. Bizim ölkədə rus dilində təhsilə xüsusi önəm verilir, Ermənistanda isə rus dilində təhsil ictimai etirazla qarşılanır. Lavrov hər iki ölkədə rus dilinə münasibəti görüb müqayisə etdikdən sonra bu cür etiraf edir. Bu həqiqəti dilə gətirən rusiyalı nazir və onun təmsil etdiyi Rusiya dövləti bəs nə üçün rus dilini tapdaq altında saxlayan Ermənistanın başına sığal çəkir? Bu sualın da cavabını versəydilər yaxşı olardı. Görsənən odur ki, Rusiya Azərbaycanın düzgün mövqe tutduğunu görməyə başlayıb, bu həm də onun dilə gətirilməsidir”.
M.Zülfüqarlı qeyd etdi ki, biz 44 günlük Vətən müharibəsində qələbə qazanaraq dünyaya gücümüzü göstərdik və beynəlxalq aləmdə imicimizi artırdıq. O vurğuladı ki, bundan sonra da ərazi bütövlüyümüzün bərpası, qorunması, dövlətimizin güclənməsi uğurunda heç kəsə güzəştə gedə bilmərik. Azərbaycanın dünyaya inteqrasiyasının gücləndiyini, Zəngəzur dəhlizi açılandan sonra Şərqlə-Qərb arasında bir dəhlizimiz olacağını deyən M.Zülfüqarlının sözlərinə görə, bundan bütün dünya ölkələri bəhrələnəcək. Onun fikrincə, Rusiya ağıllı siyasət yeridərsə o da bundan bəhrələnər, əvvəlki imperiya siyasətindən əl çəkməzsə kənarda qalar. M.Zülfüqarlının bildirdiyinə görə, necə ki, vaxtilə Ermənistan yürütdüyü işğalçılıq siyasəti ucbatından Bakı-Tbilisi-Ceyhan layihəsindən kənarda qaldı, Rusiya da bundan sonra imperiya siyasətindən əl çəkməsə Azərbaycanın böyük bir dəhlizindən kənarda qala bilər: “Biz gücləndikcə və Rusiya zəiflədikcə bu o demək deyil ki, elə buna uyğun siyasətimizi quracağıq, xeyr, əvvəlki ənənələrimizi davam etdirəcəyik. Azərbaycanda yaşayan bütün xalqlara, milli azlıqlara hörmətlə yanaşacağıq. Bu bizim gücümüzü daha da artırır, dünyaya sübut edir ki, Azərbaycan xalqı tolerant xalqıdır, mentalitetində birbaşa başqa xalqlara hörmət var, dinc yanaşı yaşamaq, xalqların dilinə, mədəniyyətinə ehtiram onun əsas qayəsidir. Bu bizim gücümüzdür. Bu yolda da biz həmişə uğurla addımlayacağıq”.
İradə SARIYEVA
