Moskvada erməni rəssamın tədbirində “Stepanakert” və “Dağlıq Qarabağ” sözlərinə imkan verilmədi...

Yadigar Məmmədli: “Ermənilərin sərgi keçirməsi o demək deyil ki, onlar istədiklərini edə bilərlər”

img

Rusiyada ermənilər gözlənilməz zərbə ilə üzləşib. Belə ki, Moskvada erməni rəssamın sərgisində “Dağlıq Qarabağ” ifadəsi çıxarılıb, “Stepanakert” sözü isə Xankəndi ilə əvəzlənib.

Moskvada Şərq İncəsənəti Muzeyində erməni rəssam Edmond Petrosyanın sərgisi “Edmond Petrosyanın və Dağlıq Qarabağın sərgisi” adı altında keçiriləcəkdi. Lakin sərgidən qabaq Şərq Muzeyində, Azərbaycanın tanınmış ərazisi olduğundan, “Dağlıq Qarabağ” sözləri çıxarılaraq dəyişdirilib. Rusiya tərəfin bu addımı erməniləri əməllicə məyus edib. Sözügedən məsələ ilə bağlı erməni media təmsilçilərinin suallarını cavablandıran Şərq Muzeyinin direktor müavini İlya Vladimiroviç burada təəccüblü bir şey olmadığını qeyd edib. O bunu onunla əsaslandırıb ki, beynəlxalq hüquqa və o cümlədən, Rusiyanın mövqeyinə əsasən Dağlıq Qarabağ Azərbaycan ərazisidir. Erməni jurnalist həyasızlığına salaraq bir sıra provokativ suallar versə də, istəyinə nail ola bilməyib. Muzey rəsmisi bir daha erməni jurnalistin ağzından vuraraq bəyan edib ki, Rusiya tərəfindən Qarabağ Azərbaycanın ərazisi kimi tanınıb. Qeyd edib ki, sərginin siyasiləşdirilməsi doğru deyil.

  • “Rusiyada da artıq başa düşürlər ki, ermənilərin mövqeyindən çıxış etmək bu ölkəyə ziyan gətirir”

Məsələyə münasibət bildirən media eksperti Yadigar Məmmədli hesab edir ki, Rusiya kimi böyük ölkədə bunun baş verməsi müsbət haldır: “Kaş əvvəldən belə təxribatların qarşısı alınaydı. O zaman erməni separatizmi bu qədər boy göstərib başımıza bəla olmazdı. Azərbaycana münasibətdə Rusiyanın müvafiq orqanlarının ortaya qoyduğu iradə müsbət göstəricidir. Ermənilərin növbəti saxtakarlığına bununla dur deyiblər. Moskvada ermənilərin sərgi keçirməsi o demək deyil ki, onlar istədiklərini edə bilərlər. Onlara kimsə belə bir səlahiyyət verməyib və verməyə də haqqı yoxdur. Çünki bu kimi məsələlərdə beynəlxalq qanunlara istinad olunmalıdır. Yaxşı olardı ki, Rusiya hakimiyyət orqanları hər zaman buna əməl etsinlər. Bütün bunlar müəyyən mənada təsadüfi deyil. Məsələ ondadır ki, Azərbaycan Türkiyə ilə müttəfiqlik sazişi imzalayandan sonra bu ilin 22 fevralında Rusiya ilə də analoji saziş imzaladı. Fikrimcə, sərgidə ermənilərə öz yerlərinin göstərilməsi həm də bununla əlaqədardır. Çünki imzalanan sazişdə separatizm təzahürlərinə qarşı birgə əməkdaşlıq öz əksini tapıb. Rusiyada da artıq başa düşürlər ki, ermənilərin mövqeyindən çıxış etmək bu ölkəyə ziyan gətirir. Məhz bu amildən çıxış edərək bu günlərdə “Rossiya1” telekanalı Azərbaycanla bağlı obyektiv reportaj hazırladı. Sözügedən amillərə nə qədər çox diqqətlə yanaşılsa, bu bir o qədər Rusiya-Azərbaycan münasibətlərinin inkişafına öz müsbət təsirini göstərəcək”.

Bu baxımdan media eksperti hesab edir ki, Rusiya bu kimi amilləri nəzərə almalıdır.

Vidadi ORDAHALLI

Peşə etikası

Son xəbərlər