Şuşanın məşhur Gövhər Ağa məscidinin Rusiya ermənilərinə nə “isti-soyuğu”?..

Qasım Hacıyev: “Abramyan hansı əsasla bu cəfəng müraciəti edib, anlamıram”

img

Ermənilər, harada yaşamaqlarından asılı olmayaraq, heç zaman öz xislətlərindən əl çəkmək istəmirlər. Dünyanın o başında da olsalar, özlərinə aid olub-olmayan nə varsa hamısına qarışırlar. Şuşa işğaldan azad edildikdən sonra nəinki Ermənistan əhalisi, eləcə də dünya erməniləri Azərbaycana qarşı şər-böhtan kampaniyasını davam etdirir. Şuşanın azadlığından sonra Rusiyadakı erməni icmaları da “qara sancıya” düşüb.

Bu günlərdə Rusiya telekanallarından birində Qarabağla bağlı nümayiş olunan reportaj erməni icmasının yuxusunu ərşə çəkib. Azərbaycan mediasının Rusiya mediasına istinadən yaydığı məlumataa görə, Rusiya Erməniləri İttifaqının rəhbəri Ara Abramyan Rusiya Prezident Administrasiyasına və Ümumrusiya Dövlət Televiziya və Radio Yayımları Şirkətinin direktoruna narazılıq məktubları yazıb. Abramyan məktublarında şikayətlənib ki, jurnalist Aleksandr Buzaladzenin süjeti Qarabağda baş verən hadisələrin “natamam mənzərəsini” təqdim edib.

Ara Abramyan vurğulayıb ki, ermənilər Gövhər Ağa məscidinin taleyindən “narahatdır”. Axı onlar Şuşadakı Gövhər Ağa məscidini işğal dövründə “fars məscidi” kimi təqdim edirdilər. Sual yaranır ki, Şuşadakı Gövhər Ağa Məscidinin ermənilərə nə aidiyyəti var? Ara Abramyan kimdir ki, bu məsələ barədə ermənilər adından “narahatlıq” bildirir? Şuşa Azərbaycan torpağıdır, Gövhər Ağa Məscidi də Azərbaycan məscididir. Onun tarixi də məlumdur, tikdirəni də. Ermənilərin əli hər yerdən çıxıb deyə, indi də müsəlman abidələrinin “qeydinə qalmaq” istəyirlər.

Ermənilər niyə Gövhər Ağa məscidindən “nigaran” qalıb?

  • “Biz onların bu cür çıxışlarının tez-tez şahidi olacağıq”

AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, A.Abramyanın bu müraciəti və iddiaları çox gülünc görünür. Q.Hacıyevin sözlərinə görə, bu gün Şuşanın Azərbaycanın mədəniyyət mərkəzi olması, növbəti ildə Türk Dünyasının Mədəniyyət Paytaxtı seçilməsi, burada keçirilən çeşidli beynəlxalq və yerli əhəmiyyətli tədbirlər ermənilərin bütün təbliğatlarını iflasa uğradır. “Biz onların bu cür çıxışlarının tez-tez şahidi olacağıq. Çünki hazırda onlar elə bir vəziyyətdədirlər ki, nə etdiklərini bilmirlər. Bütün vasitələrdən istifadə edirlər ki, bu gün yaranmaqda olan obyektiv fikrin, rəyin qarşısını alsınlar. Artıq Rusiyanın daxilində də həqiqətləri etiraf edənlər meydana çıxmağa başlayıb, bu da şübhəsiz ki, gücünü itirən ermənilər üçün ağır zərbədir. Təsəvvür edin ki, 2020-ci ilin sentyabrına qədər onlar dünyanı aldada bilirdi. Müharibə onların iç üzünü açıb göstərdi. Mifik orduları da, beynəlxalq arenada söylədikləri yalanlar da iflasa uğradı. Bu gün danışmağa sözləri yoxdur. Ermənilər bütün sahələrdə böhran keçirirlər. Ermənistanda həm iqtisadi - siyasi, həm hərbi, həm də mənəvi cəhətdən ciddi böhran yaşanır. Dünya isə özlərinə sərf etdiyi şəkildə ermənilərə dəstək verir, amma bu dəstək erməniləri xilas etməyə hesablanmayıb, onların öz maraqlarını təmin etməyə yönəlib. Qəribədir ki, ermənilər dünənə qədər Qarabağda xristian abidələrinin "təhlükə altında" olduğunu iddia edirdilər. Yadınızdadırsa, hətta Rusiyanın bir sıra mədəniyyət xadimləri ermənilərin təhriki ilə beynəlxalq təşkilatlara müraciət edib Qarabağdakı xristian abidələrinin "təhlükə altında" olduğunu iddia edirdilər. Ermənilər o zaman onları öz çirkin kampaniyalarına qoşa bildilər. Bu gün də istəyirlər ki, yenə də o çirkin kampaniyanı davam etdirsinlər. Amma alınmır, çünki dünya görür ki, Azərbaycanda xristian abidələrinə necə münasibət var. Bu günlərdə Rusiya kanallarından birində Qarabağ barədə obyektiv bir proqram yayımlandı. Əlbəttə, bu, erməniləri yerindən oynatdı. Moskvadakı erməni icması o reportajdan o qədər hiddətlənib ki, bilmirlər hansı cəfəng iddianı ortaya atsınlar. Məqsəd Azərbaycana qarşı yeni xoşagəlməz rəy yaratmaqdır, amma buna nail ola bilməyəcəklər.  Rusiya Erməniləri İttifaqının rəhbəri Ara Abramyanın bu cəfəng müraciəti çox gülməli görsənir. Abramyan hansı əsasla bu cəfəng müraciəti edib, anlamıram. Gövhər Ağa Məscidi hara, ermənilər hara? Bu məscid Azərbaycanın dini irsidir. Bu gün Ara Abramyan kimiləri “Gövhar Ağa məscidinin taleyindən narahatıq” iddiası ortaya atmaqla Azərbaycana böhtan atmağa cəhd edir. Şuşada Sovet dövrünə qədər 18 məscid vardı və sonra ermənilərin əli ilə yavaş-yavaş dağıdıldı. Ermənilər o məscidləri xüsusi “üsullarla” dağıdırdılar. “Qoç daşların içində qızıl var” deyə şayiə yayıb onları da məhv etdirirdilər”.

Q.Hacıyev hesab edir ki, Abramyan islam dünyasında Azərbaycana qarşı xoşagəlməz rəy yaratmaq məqsədilə o məscidin adını çəkir. “Bilirsiz ki, ermənilər o məscidi “fars məscidi” adlandırırdılar, bu da farsların xoşuna gəlirdi. İran onlara dəstək göstərirdi. Abramyan istəyir ki, indi İranın yaxşılığının əvəzini “qaytarsın”. Ermənilər Rusiyanın özünə qarşı nə qədər təxribatçı fikirlər irəli sürüb. Bunu bilirsiz. Hesab edirəm ki, nəhayət, Rusiya hökuməti ermənilərlə bağlı konkret addım atmalıdır. Çünki onlar bu ölkənin özü üçün də yaxşı heç nə vəd etmir”- deyə Q.Hacıyev vurğuladı.

İradə SARIYEVA

Peşə etikası

Son xəbərlər