Paşinyan Moskvada “Bakı ilə kommunikasiyaların açılması hamıya faydalıdır” dedi - bəs proses niyə uzanır...

Bəhruz Quliyev: “İrəvanın “siçan-pişik” oyunbazlığı ona çox baha başa gələ bilər”

img

Ermənistanın baş naziri Nikol Paşinyan Rusiyanın baş naziri Mixail Mişustinlə və baş nazirin müavini Aleksey Overçukla görüşüb. Görüşdə bir sıra məsələlər, əsasən də ara-sıra Gürcüstanın Yuxarı Lars yolunda yaranan problemlər müzakirə edilib.

Bununla yanaşı, tərəflər Azərbaycan-Ermənistan-Rusiyanın iştirakı ilə yaradılan Üçtərəfli İşçi Qrupun keçirdikləri görüşləri də müzakirə ediblər. Paşinyan sözügedən görüşlə bağlı bunları deyib: “Ümid edirəm ki, görülən işlər konkret qərarların qəbulu ilə nəticələnəcək, proses sürətlənəcək. Çünki bilirsiniz ki, regionda iqtisadi və nəqliyyat infrastrukturunun açılması bütün region ölkələri üçün vacibdir. İndiki vəziyyətdə bu xüsusi əhəmiyyət kəsb edir”.

Paşinyanın belə danışması təəccüblü görünməyə bilməz. Ən azından ona görə ki, prosesi kimin yubatdığı bəllidir. O zaman konkret qərarların qəbulunun tezləşdirilməsi ilə bağlı fikirlərin səsləndirilməsi nə deməkdir? Paşinyan hansı tezləşmədən dəm vurur ki, indiyə qədər dəmir və avtomobil yolunun keçəcəyi ərazinin koordinatlarını hələ də Azərbaycana verməyib. Halbuki, Azərbaycan bununla bağlı öz ərazisində işləri sürətlə həyata keçirir.

  • “Belə davam edərsə, sülhəməcburetmə əməliyyatları heç də uzaqda deyil və hər an başlaya bilər”

Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev bildirdi ki, Paşinyan, eləcə də onun komanda üzvləri bu və ya digər müzakirə masalarında bir, reallıqda isə başqa cür fikirlər səsləndirirlər və üst-üstə düşməyən bəyanatlar Ermənistanın onsuz da itmiş etimadını daha da itirmiş olur: “İstər üçtərəfli Bəyanatlarda qəbul olunmuş bəndlərin icrası məsələsində, istərsə də sonrakı proseslərdə əldə edilmiş razılaşmalarda biz Ermənisatan tərəfinin sərhədlərin demarkasiyası və delimitasiyasında, həmçinin kommunikasiyaların açılmasında vaxtı uzatdığını müşahidə etməkdəyik. Əlbəttə ki, bu yolverilməzdir və qarşı tərəf, həmçinin vasitəçi olan Rusiya birdəfəlik bunu anlamalıdır. Anlamalıdırlar ki, Azərbaycanın səbri tükənməz deyil. Gəlin mövzuya daha dəqiq yanaşma edək. Azərbaycan tərəfi bir müddət əvvəl qarşı tərəfə beş prinsip təkliflərini irəli sürdü və Ermənistan bu təklifləri qəbul etdiyini bildirdi. Ardınca isə istər Rusiyanın, istərsə də Avropa İttifaqı Şurasının vasitəçilikləri ilə görüşlər keçirildi. Həmin görüşlərdə Bakının irəli sürdüyü şərtlərinin daha səlis müzakirəsi aparıldı. İrəvan bu şərtlərdən imtina etmədi. Ancaq ölkənin rəhbərliyi İrəvana geri dönər-dönməz tamamilə əks bəyanatlar səsləndirirlər ki, bu da mövcud vəziyyətə heç də müsbət təsirlərini göstərmir. Gah Ermənistan Xankəndiyə ölkə büdcəsindən maliyyə ayırır, gah bu ölkənin rəsmi şəxsləri ora qanunsuz səfərlər edir. Gah da kommunikasiyaların keçəcəyi ərazilər də daxil, Kəlbəcər və s. istiqamətlərdə atəşkəs rejimini pozur və bütün bunlardan sonra qərarların qəbulunun tezləşdirilməsi ilə bağlı qeyri-ciddi fikirlər bəyan edirlər. Təbii ki, belə davam edə bilməz və eyni zamanda, İrəvanın “siçan-pişik” oyunbazlığı ona çox baha başa gələ bilər. Unutmamalıyıq ki, ölkə başçısı, Prezident İlham Əliyev cənabları  sonuncu Bakı Forumundakı çıxışı vaxtı da Ermənistanın davranışlarını hədəfə aldı və xəbərdarlıqlarını etdi. Yəni bütün bunlar İrəvan üçün heç də yaxşı nəticə verə bilməz. Ona görə də hesab edirəm ki, əslində vasitəçilər də Ermənistana, onun rəhbərliyinə təzyiqlərini artırmalı, regionda əldə olunmuş zərif sülhün möhkəmlənməsinə zəminlər yaratmalıdırlar”.  

Politoloqun fikrincə, sözügedən məsələdə Prezident İlham Əliyevin qəti mövqeyi ortadadır: “İlham Əliyev qeyd edib ki, qarşıda aparılacaq danışıqlarda İrəvan ayağısürüşkənlik siyasətini davam etdirəcək və Bakı əsla belə siyasətə çox səbr, təmkin nümayiş etdirməyəcək. Bu xüsusda, düşünürəm ki, artıq Ermənistan rəhbərliyi inadkarlıq, siyasi cığallıq və iddialılıq üzərində qurduğu uğursuz taktikalarından əl çəkməli, regionun çiçəklənməsi, tərəqqisi, möhkəm sülhün bərqərar olması istiqamətində yekun addımlarını atmalıdır. Əks halda, dövlət başçımızın da eyham vurduğu kimi, sülhəməcburetmə əməliyyatları heç də uzaqda deyil və hər an başlaya bilər”.

Bu baxımdan politoloq hesab edir ki, Ermənistan rəhbərliyi proseslərin uzadılmasına son qoymalıdır.

Vidadi ORDAHALLI

Peşə etikası

Son xəbərlər