Ermənistan Milli Təhlükəsizlik Xidmətinin keçmiş direktoru Artur Vanetsyan deputat mandatından istefa verməklə bağlı ölkə parlamentinin sədri Alen Simonyana ərizə təqdim edib. Parlament sədrinin mətbuat katibi Tsovinar Xaçatryan faktı təsdiq edib.
Parlamentin reqlamenti haqqında qanuna əsasən, Artur Vanetsyan qanunverici orqanın sədrinə ərizə təqdim etdikdən sonra bir həftə ərzində ərizəsini geri götürməsə, səlahiyyətlərinə xitam veriləcək. Vanetsyan isə bildirir ki, artıq özünü indiki parlamentdə görmür: “Ermənistan vətəndaşları bu hakimiyyətin dağıdıcı fəaliyyətinin qarşısını almaq və ölkəni fəlakətdən çıxarmaq üçün bizə səs verdi. Lakin məncə, bu parlament məqsədə çatmaq üçün effektiv platforma ola bilmədi”. Onun sözlərinə görə, rəhbəri olduğu “Hayreniq” (“Vətən”) partiyası fəaliyyətini parlamentdən kənarda davam etdirəcək. Bundan başqa, “Hayreniq” partiyası ölkə parlamentindəki Ermənistan Respublikaçılar Partiyası ilə birgə yaratdığı “Şərəf duyuram” blokunda fəaliyyətini de-fakto olaraq dayandırır. Deputat mandatının onun üçün heç vaxt məqsəd olmadığını, sadəcə “ölkəyə və dövlətə xidmət” aləti olduğunu vurğulayan Vanetsyan hesab edir ki, bu gün bu alət artıq bu məqsəd üçün keçərli deyil: “Bu gün biz vətənimizi itirmək ərəfəsindəyik, daha səhv etməyə haqqımız yoxdur. Mübarizənin alternativi yoxdur və dəfələrlə dediyim kimi, bu gün erməni xalqı, Ermənistan və Qarabağ uğrunda mübarizədə partiya bayraqları, bölücü xətlər və statuslar yoxdur. Bu bizim milli mübarizəmizdir, biz “Hayreniq” Partiyasının üzvləri onu xalqımızla birlikdə davam etdirəcəyik”. Qeyd edək ki, bu il aprelin 17-də İrəvanın Azadlıq meydanında baş nazir Nikol Paşinyanın istefası tələbi ilə oturaq aksiya keçirən Vanetsyan bildirirdi ki, müxalifət bu mübarizədə uğur qazana bilməsə və əvvəlki kimi Nikol Paşinyan baş nazir postunu tutmağa davam edəcəyi təqdirdə parlamentə qayıtmayacaq. Vanetsyan sədri olduğu parlament partiyasının 2021-ci ildə keçirilən növbədənkənar seçkilər zamanı seçicilərin onlara göstərdiyi etimadı doğrultmadığını əsas gətirərək deputat mandatından imtina barədə Mərkəzi Seçki Komissiyasına da ərizə ilə müraciət etdiyini bildirib.
Daxil olduğu blokun parlamentdəki fəaliyyətinin səmərəsiz olduğunu deyən Vanetsyan fikrini belə davam etdirib: "Özümü bu parlamentdə görmədiyimi bir neçə dəfə bəyan etmişdim. Səbəb isə sadədir, vətəndaşlar ona görə bizə səs vermişdilər ki, biz hakimiyyətin destruktiv fəaliyyətinin qarşısını alaq, ölkəni indiki vəziyyətdən çıxaraq, lakin fikrimcə, bu alınmadı”. Bütün bunlar o deməkdir ki, erməni müxalifəti Paşinyana uduzduğunu artıq qəbul edir. Artur Vanetsyanın addımları bunun faktiki təsdiqidir. Digər tərəfdən, onun gedişləri sabiq prezident Serj Sarkisyanı da pis vəziyyətdə qoyur. Çünki Artur Vanetsyan Sarkisyanın rəhbəri olduğu Ermənistan Respublikaçılar Partiyası ilə birgə yaratdığı “Şərəf duyuram” blokunun da varlığına son qoyur. Vanetsyan indi onu da iddia edir ki, Paşinyan Qarabağı Azərbaycanın bir hissəsi kimi tanımağa hazırlaşır. Ermənistanın “Qraparak” nəşri yazır ki, Paşinyan müxalifətçilərdən hələ də siyasi dəstək və gedişlər baxımından öndədir: “Paşinyana qarşı müxalifətçilər birləşib, sonra mərkəzdənqaçma mübarizə elan ediblər, bəzən Ermənistan parlamentini mübarizənin səhnəsinə çeviriblər. Yazılmış və yazılmamış üsullarla mübarizə aparmağa çalışırlar, lakin Paşinyan və komandası kreslolara o qədər möhkəm yapışıblar ki, onlara qarşı istənilən taktika və alət acizdir. 2 ay əvvəl, aprelin 17-də Milli Təhlükəsizlik Xidmətinin keçmiş direktoru, “Şərəf duyuram” fraksiyasının rəhbəri Artur Vanetsyan “Azadlıq meydanı”nda oturma aksiyasına başlayan və mübarizənin başlanğıcını qoyan ilk şəxs idi. Bir neçə gün sonra meydan mübarizə mərkəzinə çevrildi. Bir tərəfdə Vanetsyan öz komandası ilə dayanmışdı, digər tərəfdə isə Rüstəm Qasparyanın qardaşının rəhbərlik etdiyi “Qara bəbir” dəstəsi var idi. Müqavimət hərəkatı bir ay yarımlıq mübarizədən sonra “Fransa meydanı”nı açdı və fərqli taktika seçərək başlanğıc mövqelərə qayıtdı. Mübarizənin son mərhələsində iştirak etməyən Artur Vanetsyan müqavimət hərəkatından ayrılaraq başlatdığı mübarizəni davam etdirmək barədə bəyanatla çıxış edir”. Xatırladaq ki, apreldən bu yana İrəvanda müxalifət tərəfdarları müxtəlif küçə etirazları və aksiyaları keçirir, “Fransa meydanı”nda çadırlar qururlar. Lakin iyunun 14-də müxalifət bunun hərəkatın “strukturunu və taktikasını” dəyişdiyini bildirərək, çadırları sökmək qərarına gəlib. Paşinyanın tərəfdarları bildiriblər ki, etiraz hərəkatının faktiki dayandırılması müxalifətin tələblərinin Ermənistan cəmiyyətində geniş dəstək qazanmadığını göstərir. Ermənistanın “1in.am” nəşri də yazır ki, parlament müxalifətinin “Fransa meydanı”nda çadırları yığışdırmaq qərarından sonra verilən ictimai reaksiya artıq bu müxalifətin olmadığı təəssüratını yaradıb. Qeyd olunur ki, Ermənistan cəmiyyəti arasında da belə bir təəssürat və qiymətləndirmə var: “Əlbəttə, de-fakto söz parlament müxalifətinin yaşadığı kifayət qədər səs-küylü fiaskodan gedir. Ancaq bu o demək deyil ki, müxalifət fəaliyyətini dayandırıb. Üstəlik, bu barədə söhbət getsə belə, ən mühüm sual yaranır: Ermənistanın siyasi meydanında bundan sonra nə baş verəcək? Bu sahə hələlik müxalifətsiz qalıb? Ermənistanda daxili siyasi vəziyyətlə bağlı müzakirələrdə ən mühüm suallar açıq qalır. Hələlik “məzmun” “Fransa meydanı” ətrafında fırlanmağa davam edir, sadəcə olaraq müxtəlif forma və tonlarda gedir. Təbii ki, praktik olaraq sıfır nöqtəsindəki məzmun boşluğunun qısa müddətdə doldurula biləcəyini düşünmək sadəlövhlükdür. Problem ondadır ki, hətta bu boşluğu doldurma prosesinə başlamaq cəhdləri də, çox nadir hallar istisna olmaqla, demək olar görünməzdir. Buna görə də Ermənistanda nə qədər çadırlar yığışdırılsa da, “Fransa meydanı”ndakı çadırların ətrafında daxili siyasi həyat hələ də praktiki olaraq davam edir”.
Nahid SALAYEV
