Ermənistan parlamentində "Şərəfim var" deyənlərin sayı bir nəfər azaldı...

Rəşad Bayramov: “Vanetsyanın bu addımı heç bir ciddi perspektiv vəd etmir, siyasi şoudan başqa nəsə deyil”

img

Ermənistanın  “Şərəfim var” blokunun parlament fraksiyasının və  “Vətən” partiyasının rəhbəri Artur Vanetsyan yaydığı bəyanatda bildirib ki,  qanunla müəyyən edilmiş qaydada deputat mandatından istefası ilə bağlı ərizə verib. A.Vanetsyan əlavə edib ki, bir çoxu üçün bu qərar sürpriz olmayıb:

“Mən bir neçə dəfə açıq şəkildə demişəm ki, artıq özümü bu parlamentdə görmürəm. Səbəb bəllidir - Ermənistan Respublikasının vətəndaşı bizə öz səsini verdi ki, biz bu hakimiyyətin destruktiv fəaliyyətinin qarşısını alaq, ölkəni fəlakətdən xilas edək. Lakin məncə, bu parlament məqsədə çatmaq üçün effektiv platforma olmaqdan çıxıb”.

O bildirib ki, “Vətən” Partiyasının Şurası fəaliyyətini parlamentdən kənarda davam etdirmək qərarına gəlib: “Partiyanın qərarı ilə Ermənistan Respublika Partiyası ilə de-yure və de-fakto yaratdığımız “Mənim şərəfim var” bloku öz fəaliyyətini dayandırır, bu blok çərçivəsində həmkarlarımızla nisbətən qısa, lakin hadisələrlə zəngin yol qət etmişik və mən əminəm ki, biz hələ də ölkəni xilas etmək naminə, gələcəkdə isə dövlətçiliyimizi təkmilləşdirmək və möhkəmləndirmək naminə gedəcəyik”. Erməni revanşistlərin nümayəndəsi bəyan edib ki, bu gün onlar Vətəndən məhrum olmaq ərəfəsindədirlər  və artıq səhv etməyə haqları  yoxdur:

“Mübarizənin alternativi yoxdur və bu gün, dəfələrlə dediyim kimi, erməni xalqı, Ermənistan və “Artsax” uğrunda mübarizədə partiya bayraqları, bölücü xətlər və statuslar yoxdur. Bu bizim milli mübarizəmizdir və biz Ana Vətən Partiyasının üzvləri onu xalqımızla birlikdə davam etdirəcəyik”.

Müxalif fraksiya rəhbərinin bu addımı nə ilə izah oluna bilər?

Politoloq Rəşad Bayramov “Bakı-Xəbər”ə açıqlamasında bildirdi ki, Ermənistan müxalifəti  may ayının 2-dən başlayaraq hökümət əleyhinə aksiyalar keçirir: “Daha doğrusu, müxalifətdəki revanşist qüvvələr  baş nazir Nikol Paşinyanı devirməyə çalışır. Düzdür, aksiyalar bir qədər azalmağa doğru getsə də, lakin hələ də mitinqlər davam edir. Bildiyimiz kimi, Ermənistan ordusunda müxalifət nümayəndələri, onların əlaltıları da var. Onlar Azərbaycanla Ermənistan arasında sülh müqaviləsinin imzalanmasına qarşıdırlar və bu yolla həmin prosesə əngəl törədirlər.

Son aylar ərzində Ermənistanda ictimai-siyasi vəziyyətin kifayət qədər gərgin olduğu müşahidə edilir. Artıq müxalif qüvvələr Paşinyan hökumətinə qarşı həftədə bir dəfə aksiya keçirəcəklərini elan ediblər. Əslində, sabiq dövlət başçıları Robert Koçaryan və Serj Sarkisyanın körüklədiyi etiraz aksiları ilk növbədə müxalifətin özünü siyasi gündəmdə saxlaması cəhdindən başqa bir şey deyil. İstefa verən Vanetsyan bunu onlardan da yaxşı anlayır. Bilirlər ki, Qarabağdakı vəziyyəti 2020-ci il 27 sentyabrdan əvvəlki vəziyyətə qaytarmaq mümkün deyil. Eyni zamanda, Paşinyanı hakimiyyətdən uzaqlaşdırmaq da qeyri-realdır. Çünki sonuncu parlament seçkiləri göstərdi ki, ikinci Qarabağ müharibəsini uduzmuş olsa da, xalq Paşinyanı dəstəkləyir. Erməni xalqı müharibədən yorulub. Özü də bütün yolları məğlubiyyətə, itkilərə aparan müharibədən.

Bunu ölkədə mitinqlərlə nəyəsə nail olmağa çalışanlar yaxşı bilir. Odur ki, onlar cəhdlərinin əbəs olduğunu, Azərbaycanın haqlı tələblərinin yerinə yetirilməli olduğunu dərk edirlər. Buna görə də, fərqli manevrlər etməklə gündəmdə qalmağa çalışırlar. Vanetsyanın bu addımı heç bir ciddi petspektiv vəd  etmir, siyasi  şoudan başqa nəsə deyil”.

Məhəmmədəli QƏRLİ

Peşə etikası

Son xəbərlər