Azərbaycan gəncləri müzəffər bir dövlətin sabahıdır. Bu səbəbdən də dövlət gənclər siyasətinə xüsusi əhəmiyyət verir, böyük diqqət yetirir. Müasir gənclərin vətənpərvərlik ruhunda yetişdirilməsi siyasəti bütün istiqamətdə davam etdirilməlidir. Bu yöndə dövlətin gördüyü işlər, həyata keçirdiyi strategiya məumdur.
Bu istiqamətdə bütün sahələrdə ciddi iş gedir. Maraqlıdır, ölkədə saysız-hesabsız vətəndaş cəmiyyəti institutları var, onların arasında birbaşa gənclərlə bağlı təşkilatlar da mövcuddur. Bu qurumlar dövlətdən qrant alıb gənclərin vətənpərvərlik tərbiyəsi ilə bağlı layihələr keçirdiklərini bəyan edirlər. Çox yaxşı. Onlar bu istiqamətdə layihələr həyata keçirirlərsə, demək bunun səmərəsi də olmalıdır. Vətəndaş cəmiyyəti institutlarının həyata keçirdiyi maarifçi layihələrin gənclərin inkişafında, vətənpərvərlik hisslərinin tərbiyəsində rolu varmı?
Gənclərlə bağlı QHT layihələri...
Məsələyə münasibət bildirənlər hesab edirlər ki, gənclərin vətənpərvərlik ruhunda inkişaf etməsi işində QHT-lərin də rolu olmalıdır. Belə bir deyim var: vətənpərvərlik təkcə vətəni sevmək deyil, . vətənpərvərlik həm də vətəni qorumağa hər an hazır olmaq, onun yolunda fədakarlıqlar göstərmək, vətənin, xalqın hər bir uğuruna sevinməkdir. Heç şübhəsiz ki, bu kimi keyfiyyətlərin formalaşması üçün daim təbliğat aparılmalıdır. Onu da vurğulayaq ki, Azərbaycan Respublikasının Gənclər Fondu mütamadi olaraq gənclər siyasətinin əsas prinsipləri olan gənclərin vətənpərvərlik, azərbaycançılıq, dövlətçilik, dünyəvilik prinsipləri əsasında, xalqımızın tarixinə, mədəni irsinə, adət-ənənələrinə, dövlət dilinə və rəmzlərinə, milli-mənəvi və ümumbəşəri dəyərlərə hörmət ruhunda tərbiyə olunması istiqamətində layihələrin həyata keçirilməsi üçün qrant müsabiqələri elan edir. Sözümüzün canı odur ki, ölkəmizdə fəaliyyət göstərən gənclər təşkilatları bu müsabiqələrə layihələr təqdim edirlər və müsabiqədən keçən layihələr dövlət büdcəsindən maliyələşir. Bu təşkilatlar da gənclərin vətənpərvərlik tərbiyəsi ilə bağlı layihələr həyata keçirirlər
Qeyd edək ki, Prezident İlham Əliyevin 26 yanvar 2015-ci il tarixli sərəncamı ilə təsdiq edilmiş “2015-2025-ci illərdə Azərbaycan gənclərinin İnkişaf Strategiyası” gənclər siyasətinin yeni mərhələyə qədəm qoyduğunun real təsdiqidir. Onu da qeyd edək ki, strategiyanın məqsədi 2015-2025-ci illərdə Azərbaycan gəncliyinin potensialını müasir dövrün tələblərinə uyğun inkişaf etdirmək, həmin potensialdan Azərbaycan Respublikasının mənafeyi naminə istifadə etmək, yeni nəsildə fəal vətəndaşlıq mövqeyi formalaşdırmaqdan ibarətdir.
“Vətəndaş cəmiyyəti nümayəndələrinin vətənpərvərlik təbliğatına...”
Müstəqil jurnalist , Əsgər Ailələrinə Dəstək ictimai birliyinin sədri Mətanət Əsgərqızı bizimlə söhbətində qeyd etdi ki, QHT-lərin, vətəndaş cəmiyyəti institutunun bu məsələlərdə rolu çox böyük olmalıdır. M.Əsgərqızının sözlərinə görə, bu prosesdə iştirak etmək cəmiyyətin bütün təmsilçilərinin vəzifəsidir: “Vətənpərvərlik işi ilə bütün cəmiyyət məşğul olmalıdır. Müxtəlif nümunələrdə bu öz təsdiqini tapmalıdır.Ailə də, bağça da, məktəb də vətəndaş yetişdirməlidir. Vətəndaş cəmiyyəti nümayəndələrinin vətənpərvərlik təbliğatına yönəlik layihələrinin rolu əvəzsizdir. Bəzən QHT- lərin gördüyü işlərə yanaşma o qədər də ürəkaçan olmur. Amma hər kəs bilməlidir, QHT-nin icra etdiyi layihələr vasitəsi ilə məktəblərdə, gənclərlə aparılan işin nəticəsidir ki, istər aprel döyüşlərində, istərsə də 44 günlük müharibədə qəhrəman oğullar ortaya çıxdılar. Ola bilməz ki, QHT- nin icra etdiyi layihədə 50 nəfər iştirak etsin, istər qəhrəmanlıq, vətənpərvərlik nümunələri təbliğ olunsun, kimsə bunu içində yaratmasın.Bəzən deyirik ailə tərbiyəsi ilə şəhidimiz vətənpərvərlik göstərdi. Mən buna bir əlavə edərəm, şəhidlik də Allah yazısıdır. Şəhidlərimizin içində atılmış, valideynlərini itirmişlər var. Onlar doğmalarından qayğı görməyiblər, amma dövlət,vətən onları yetişdirib, ruhları şad olsun. Lazım olan anda onlarda vətənpərvərlik hissləri qabararaq, ana bildikləri torpağı qoruyublar. Bəli vətənə istək, sevgi məhz sözsüz ki,keçirilən tədbirlərdə gənclərin ürəyinə yol açır. Gənclərlə çox işləmək lazımdır. Onlarla istər şəhid ailələri , istərsə də qazilərlə görüşlər təşkil etmək vacibdir. Bu təkcə tədbir formatında olmamalıdır. Evlərə getmək lazımdır. Şəhidin, doğmalarının doğum günlərində orada olmaq lazımdır. Tənha qalan şəhid valideynlərinin evlərində iməcliklər olunsa bu, həm də bir nümunə olar: şəhid ailəsi qayğı ilə əhatə olunub. Şəkil çəkdirib paylaşmaq xətrinə deyil, əməli iş, nümunələr üçün edilməlidir”.
“Onların icra etdiyi hər layihə vətən sevdalı gənc yetişdirir”
M.Əsgərqızının sözlərinə görə, ölkədə bu sahədə işləyən, maraqlı layihələr həyata keçirən QHT-lər də az deyil: “Belə ciddi fəaliyyətlə məşğul olan QHT- lər var. Onların icra etdiyi hər layihə mütləqdir ki, vətən sevdalı gənc yetişdirir. Bir də elə vətənpərvərlik də, qəhrəmanlıq da bir anda yaranır. Gənclərimizə möhkəm olmağı arzulayıram. Bu vətəni sevsinlər. Yaşasınlar, xoşbəxt olsunlar. Vətənpərvər gənclər yetişdirən QHT- lərə də uğurlar. Yaxşı ki, bizlər varıq!”
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
