Livandan və Rusiyadan Qarabağa gəlmiş ermənilər festival keçirməyə hazırlaşır

Arzuxan Əlizadə: “Sülhməramlılar məqsədli şəkildə belə “tədbirlərə” şərait yaradırlar”

img

Qarabağdakı erməni separatçılarının müxtəlif “mədəni tədbirlər” adı altında zaman-zaman müəyyən fəaliyyətlərlə məşğul olması halları hamıya bəllidir. Bütün bunlarda əsas məqsəd separatçı qurumu təbliğ etməkdir. Düzdür, 44 günlük şanlı Vətən müharibəsindən sonra bununla bağlı separatçılara güclü zərbə endirildi. Ən azından ona görə ki, müharibədən əvvəlki sərbəst gediş-gəliş yoxdur. Ərazilərin böyük hissəsi azad edildiyi üçün erməni separatçıların fəaliyyət dairəsi məhdudlaşıb və s.

Ancaq bütün bunlara baxmayaraq, Qarabağda Rusiya sülhməramlılarının kölgəsinə sığınan separatçılar ara-sıra bu kimi qanunsuz fəaliyyətlə məşğul olmağa çalışırlar. Bu arada Rusiya sülhməramlılarının müvəqqəti xidmət apardıqları ərazilərdə yaşayan ermənilər növbəti təxribata hazırlaşirlar. Belə ki, yayılan məlumatlara görə, separatçılar Xankəndidə festival hazırlığına statrt veriblər. “Sunrise Festival” təşkilatçılarının Livan və Rusiyadan Qarabağa köçmüş ermənilər Şuşan Keşişyan və Lilit Akopyan olduqları bildirilir. Onlar iyunun 24-dən iyulun 3-nə qədər Xankəndidə sərgi, konsertlər, film nümayişləri və s. təşkil etmək fikrinə düşüblər. Üstəlik, burada erməni diasporunun nümayəndələrinin iştirak edəcəkləri də qeyd olunur.

  • “Bununla bütün dünyaya göstərmək istəyirlər ki, Qarabağ məsələsi həll olunmayıb”

Məsələyə münasibət bildirən AMİP sədri Arzuxan Əlizadənin fikrincə, bütün bunlar Qarabağdakı separatçıların öz təxribatçı əmməllərindən əl çəkmək fikrində olmadıqlarından xəbər verir: “Məqsəd odur ki, separatçı fəaliyyətlərini davam etdirsinlər. Hərçənd, onların belə fəaliyyətlə məşğul olması bizim yeni bir şey deyil. Digər tərəfdən, bununla bütün dünyaya göstərmək istəyirlər ki, Qrabağ məsələsi həll olunmayıb. Burada təəssüf doğuran məqam ondan ibarətdir ki, bütün bunlar Rusiya sülhməramlılarının gözü qarşısında baş verir. Onların razılığı olmasa, separatçılar belə qanunsuzluqlara cəsarət etməzlər. Livan ermənisinin Qarabağda nə iti azıb? Məsələ ondadır ki, Rusiya sülhməramlıları məqsədli şəkildə belə “tədbirlərə” şərait yaradırlar. Çünki Qarabağın digər hissəsinin Azərbaycanın nəzarətinə keçməsini istəmirlər. Ona görə ki, bu baş versə, erməni separatçılarının kökü birdəfəlik kəsiləcək. O zaman Qarabağda Rusiya sülhməramlılarının fəaliyyət göstərməsinə ehtiyac qalmayacaq. Bu isə Cənubi Qafqaz ölkələrində Rusiyanın təsirinin əhəmiyyətli dərəcədə azalması deməkdir. Məhz bu səbəbdən Rusiya bütün vasitələrlə çalışır ki, separatçı mövqedən çıxış edən ermənilər Qarabağı tərk etməsin. Bunun nəticəsidir ki, Rusiya bütün vasitələrlə ermənilərin Qarabağı tərk etməsinə mane olur. Separatçıların Qarabağda tədbir keçirməyə hazırlaşmaları ilə bağlı Azərbaycan sülhməramlıları xəbərdar etməli və belə halların yolverilməz olduğunu onların diqqətinə çatdırmalıdır”.

Partiya sədri hesab edir ki, Azərbaycan bununla bağlı öz etirazını bildirməlidir.

Vidadi ORDAHALLI

Peşə etikası

Son xəbərlər