Müstəqil siyasət Azərbaycan və Özbəkistanın strateji münasibətlərinə yeni güc verir...

Abutalıb Səmədov: “Azərbaycan və Özbəkistan müstəqilliyinə dəyər verən və dövlət müstəqilliyini nəyin bahasına olursa olsun qorumağa çalışan dövlətlərdir”

img

Prezident İlham Əliyev Özbəkistanda rəsmi səfərdədir. Prezidentin Özbəkistan səfəri çərçivəsində bir sıra sənədlər imzalanıb, mxtəlif məsələlər müzakirə edilib.

Məlumdur ki, indiki şəraitdə müşahidələrə görə, həm Azərbaycan, həm də Özbəkistan mümkün qədər müstəqil xarici siyasət aparmağa meyilli ölkələrdirlər. Həm müxtəlif beynəlxalq təşkilatlarda iştirak, həm iki tərəfli münasibətlər, əlaqələr qurmaq, həm regional fəaliyyətlərin əlaqələndirilməsi baxımından hər iki ölkə mümkün qədər müstəqil xarici siyasət aparmağa meyllidir. Belə tanınırlar. İkisinin də Ermənistan kimi dövlətlərdən fərqli olaraq müstəqil xarici siyasət aparmağa meylli və iradəli olması Azərbaycan-Özbəkistan münasibətlərinin inkişaf dinamikasına və xarakterinə necə təsir edir?

  • “Bu da Azərbaycan və Özbəkistana imkan verir ki...”

Azərbaycan Naminə Alyans Partiyasının sədri Abutalıb Səmədov “Bakı-Xəbər”ə şərhində bildirdi ki, hər iki dövlət nəyin bahasına olursa olsun öz müstəqilliyini qorumağa çalışır: “Azərbaycan və Özbəkistan müstəqilliyinə dəyər verən və dövlət müstəqilliyini nəyin bahasına olursa olsun qorumağa çalışan dövlətlərdir. Heç kimə sirr deyil ki, həm Azərbaycanın, həm Özbəkistanın, həm də keçmiş ittifaq məkanında mövcud olan digər dövlətlərin müstəqilliyi üçün çox ciddi təhdidlər mövcuddur. Rusiya prezidentinin gənc sahibkarlarla görüşündə I Pyotru xatırlaması, onun Rusiya imperiyasını yenidən toparlamasını xüsusi qeyd etməsi və “bizim də taleyimizə eyni missiya düşüb” deməsi, təbiidir ki, hamını narahat edir”.

A.Səmədovun sözlərinə görə, bu ən çox da öz müstəqilliyinə dəyər verən və dövlət müstəqilliyini qorumağa çalışan dövlətləri və onların başçılarını ciddi şəkildə narahat edir. “Bu səbəbdən də Azərbaycan Prezidentinin Özbəkistana səfərinin əsas mövzusu müstəqilliyi qorumaq və onu daha da möhkəmləndirmək istiqamətində addımların atılması oldu. Bu təbii sayılmalıdır. Strateji tərəfdaşlığın dərinləşməsi barədə bəyannamə imzalandı. Bu çox mühüm sənəddir və bir çox sahələrdə Azərbaycanla Özbəkistan arasında hərtərəfli əməkdaşlığın genişləndirilməsini nəzərdə tutub. Digər mühüm sənəd Azərbaycanla Özbəkistan arasında hərbi-texniki əməkdaşlığın daha da inkişaf etdirilməsi məsələsi barədə imzalandı. Bu da Azərbaycan və Özbəkistana imkan verir ki, gələcəkdə yarana biləcək təhlükələri nəzərə alaraq hərbi sahədə əməkdaşlığı daha da genişləndirsinlər. Rusiyanın Ukrayanaya qarşı apardığı müharibə ətrafda yaşayam bütün dövlətləri ciddi şəkildə düşünməyə məcbur edir. Rusiya region üçün çox ciddi təhlükəyə çevirilib və hər bir dövlət özünü Rusiyadan necə qorumaq, öz müstəqilliyini necə qorumaq barədə düşünür, düşünməlidir. Mən hesab edirəm ki, Azərbaycan Prezidentinin Özbəkistana səfərində də bu məsələlər geniş şəkildə müzakirə olunub. Ona da əminəm ki, bu istiqamətdə müzakirələr digər dövlətlərlə, ilk növbədə türk dövlətləri ilə bundan sonra da aparılacaq. Əməkdaşlığın genişləndirilməsi istiqamətində çox ciddi addımlar atılacaq. Şərait bunu tələb edir və keçmiş itiifaq ərazisində yaşayan türk dölətlərinin müdrik rəhbərləri bu tələbləri vaxtında qimətləndirirlər, düzgün dəyərləndirirlər və düzgün addımlar atmaq, dövlət müstəqilliklərini qorumaq üçün əlillərindən gələni edirlər. Hesab edirəm ki, bu istiqamətdə fəaliyyət bundan sonra da davam etdiriləcək”- deyə A.Səmədov vurğuladı.
İradə SARIYEVA

Peşə etikası

Son xəbərlər