10 noyabr 2020-ci il bəyannaməsinə uyğun olaraq, alternativ yol hazır olan kimi Laçın şəhəri və Laçın yolunun üzərində yerləşən bir neçə kənd də Azərbaycanın tam nəzarətinə keçəcək və oradan rus sülhməramlıları çıxarılacaq. Bu fonda “Sputnik Armenia”nın əməkdaşı, erməni bloger Nairi Oxikyan maraqlı bir məlumat yayaraq bildirib ki, Laçından çıxmağa hazırlaşan ermənilər bu yerləri talan edir.
Onun sözlərindən belə bəlli olur ki, Laçın şəhərinin bu ilin iyulunda və ya ilin sonuna qədər Azərbaycana veriləcəyindən narahat olan ermənilər orada olan evləri söküb materiallarını Ermənistana daşıyırlar. Oxikyan Laçının talandığını bu şəkildə etiraf edib: “Ermənistan hökumətinə və onun rəsmilərinə müraciət edirəm: Laçını talamağı dayandırın. Gözləyin”. Erməni bloger iddia edir ki, Azərbaycan ordusunun Laçına daxil olmasına imkan verməyəcəklər. Halbuki, bunun cəfəngiyayt olduğunu, İrəvanın öhdəlikləri ilə ziddiyyət təşkil etdiyini Oxikyan yaxşı bilir. Xatırladaq ki, Azərbaycan-Rusiya-Ermənistan arasında imzalanan 10 noyabr birgə bəyanatının 6-cı maddəsində Laçın dəhlizinə alternativ yolun çəkilməsi ehtiva edilib. Həmin bənddə qeyd edilir ki, tərəflərin razılığı əsasında növbəti üç il ərzində Dağlıq Qarabağla Ermənistan arasında əlaqəni təmin edən Laçın dəhlizi üzrə yeni hərəkət marşrutunun inşası planı müəyyən ediləcək və bununla da həmin marşrutun mühafizəsi üçün Rusiya sülhməramlı kontingentinin gələcək yerdəyişməsi nəzərdə tutulur. Azərbaycan yolu nəzərdə tutulandan daha tez inşa edir və onun gələn ay istifadəyə verilməsi gözlənilir. Alternativ yol Ermənistanın Qərbi Zəngəzurdakı Sünik rayonunun Gorunzur kəndindən başlayacaq, Laçın rayonunun Zabux kəndi yaxınlığındakı Qayğı qəsəbəsindən, Şuşa rayonunun Aşağı və Yuxarı Qaladərəsi kəndlərindən keçərək dağların arasından Xankəndiyə çatacaq. Bu yolun istifadıyə verilməsi ilə Laçın şəhəri ordumuzun nəzarətinə keçəcək. Məsələ ilə bağlı “armenian.info” portalı yazır ki, Bakı istədiyini alacaq: “Bu günlərdə Nikol Paşinyanın parlamentdə sülh gündəminin uğur qazanacağına heç kimin zəmanət verə bilməyəcəyi barədə bəyanatı, demək olar ki, dərhal İlham Əliyevin yeni hərbi yönümlü bəyanatı ilə müşayiət olunub. İlham Əliyev Zəngəzur dəhlizi haqqında danışaraq deyib ki, dəhliz açılmasa, sülh haqqında danışmaq çətin olacaq. O əmin edib ki, Ermənistan müvafiq bəyanatı imzaladığı üçün Azərbaycanın Zəngəzur dəhlizinin açılmasını tələb etmək hüququ var. Nikolun pis niyyətli açıqlamalarının kökü və motivi üzə çıxmış kimi görünür. Əsas problem Zəngəzur dəhlizi adlı layihədir ki, onun da haqqında Bakı və İrəvanın ən azı formal olaraq fərqli fikirləri var. Erməni tərəfi daim yolları açmağa hazır olmasından danışırsa, lakin həmin yolların dəhlizsiz məntiqlə işləyəcəyini vurğulayırsa, İlham Əliyev niyə hədələyir? Yaxud İlham Əliyev Ermənistanın bəyanat imzaladığını deməklə nəyi nəzərdə tutur? Söhbət 10 noyabr sənədindən gedirsə, o zaman dəhliz ifadəsi sırf Laçın məsələsində işlədilir. Amma elə bu bəyanat da Laçın dəhlizinə alternativ yolun çəkilməsini ehtiva edir. İndi Azərbaycan Ermənistanın bu öhdəliyinə əməl etməsini istəyir”.
Bununla yanaşı o da məlumdur ki, Ermənistanın hansısa müqaviməti Azərbaycanın sərt cavab tədbirləri ilə müşayiət ediləcək. Azərbaycan Ordusunun ehtiyatda olan general-leytenantı Yaşar Aydəmirov "publika.az”a açıqlamasında bu xüsusda bildirir: “Azərbaycanın elit qoşunları, yeni yaradılan komando birləşmələri, eləcə də daha əvvəl yaradılmış xüsusi təyinatlı qüvvələrin çox hissəsi Qarabağın dağlıq hissəsindədir. Ona görə də onlar Laçın dəhlizini bağlamağa cəhd göstərə bilməzlər. Laçın şəhəri də bizim nəzarətimizdədir, gediş-gəlişlə bağlı müəyyən tənzimləmələr aparılır. Biz təkcə Laçın haqqında düşünürüksə, bu dünyada yaşamamalıyıq. Artıq Qərbi Azərbaycan məsələsini düşünürük, ona görə də ermənilər sarsaq-sarsaq hərəkətlər eləməsinlər. Əgər xoşluqla verməsələr, dəhlizi də alacağıq, Göyçə gölünü də, İrəvanı da. Ora da Azərbaycanındır. Azərbaycan Prezidenti iki dəfə onların böyüklərinə də, kiçiklərinə də xəbərdarlıq elədi. Hamı gördü ki, 44 günlük müharibədən sonra hansı faciəvi duruma düşdülər. Onların heç nələri yoxdur, bizim qabağımızda nə ilə duracaqlar?! Bəlkə onlar həmin torpaqlarda doğulublar?! Bəlkə ermənilərin normal zabit və hərbi kadrlar hazırlamaq üçün pulları var?! Yoxdur! Öz elit qoşunlarını yaratmaq imkanlarına malik deyillər. Azərbaycan, Ermənistandan fərqli olaraq, mütəmadi qaydada genişmiqyaslı hərbi təlimlər keçirir. Ermənistanın isə bu cür böyük təlimləri keçirməyə pulu və imkanı yoxdur. Qarabağ müharibəsi də göstərdi ki, Azərbaycan ordusu dağlarda, meşələrdə, çətin keçilən yerlərdə, şəhər döyüşlərində böyük təcrübə qazanıb. Biz bu cür döyüşlərə yenə hazırıq. Eləcə də hər bir zabit və əsgərimiz də hazır olmalıdırlar. Lazım olan məqamı isə Ali Baş Komandan bilir. Ermənilərin Laçınla bağlı axmaq fikirləri isə özlərini arxayınlaşdırmaq üçündür, mitinqlərdə xal qazanmaq üçün danışırlar. Azərbaycan heç vaxt Ermənistana uduzmayıb. Bu, heç zaman baş verməyib. Ona görə də Laçın dəhlizini, bir sıra bəzi yaşayış məntəqələrini, eləcə də Qərbi Azərbaycanı işğaldan azad eləmək üçün heç bir problemimiz yoxdur. Laçının özü isə bizim əlimizdədir. Sadəcə olaraq təxliyələr və hərəkət üçün yollardan istifadə ilə bağlı hələlik Ali Baş Komandan icazə verib. Ali Baş Komandan tapşırıq verərsə, qısa müddətdə Xankəndiyə də nəzarəti bərpa edə bilərik” General Aydəmirovun fikrincə, oradakı ağıllı ermənilərin hamısı bizim tabeliyimizə keçmək istəyir: “Çünki yaşayış və təminat yaxşı olacaq. Babat maaş, pensiya da alacaqlar. Bizim ordumuz üçün Qazaxın 7 kəndini, ümumiyyətlə, 7-8 yaşayış məntəqəsini almaq problem deyil”.
Samirə SƏFƏROVA
