Təəssüflər olsun ki, Birləşmiş Ştatlar rəsmilərinin ATƏT-in Minsk Qrupunun bərpa olunması ilə bağlı arzuolunmaz və yersiz çağırışları səngimək bilmir.
Bu arada ABŞ Dövlət katibinin Avropa və Avrasiya məsələləri üzrə köməkçisi Karen Donfrid bəyan edib ki, ABŞ Ukraynadakı müharibəyə görə Rusiya ilə münasibətləri kəssə də, sülh və davamlı nizamlanma üçün ATƏT-in Minsk Qrupunda əməkdaşlığı davam etdirməyə hazırdır: “ABŞ Azərbaycanla sülh əldə etməsi üçün Ermənistana hər cür dəstəyi göstərəcək. Birləşmiş Ştatlar bu prosesə dəstəyində sadiqdir: biz həqiqətən də faydalı olmaq istəyirik. ABŞ həm də Dağlıq Qarabağ münaqişəsində əsas rol oynayan Minsk Qrupunda həmsədr ölkədir. Və biz bu prosesə əvvəlkitək sadiq qalırıq. Həmçinin, Avropa İttifaqının da mühüm rol oynadığını görürük. Ona görə də hiss edirəm ki, bu, region üçün bir fürsətdir və biz sülh naminə Ermənistan üçün əlimizdən gələni edəcəyik. Biz Minsk Qrupunun həmsədrliyi prosesini dəstəkləyirik. Biz inanmaqda davam edirik ki, bu, xüsusilə Dağlıq Qarabağ məsələsində çox vacib formatdır. Dünyanı inkişaf etdirməyə çalışarkən fərqli formatları saxlamağımız vacibdir. Azərbaycan Minsk Qrupu həmsədrliyi prosesini dəstəkləmir”.
Görünən odur ki, ABŞ hər vasitə ilə Minsk Qrupunu bərpa etməyə cəhd edir.
“Vaşinqton Minsk Qrupunun bərpasında maraqlı olsaydı, bunu etməzdi”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Donfridin səsləndirdiyi fikirlər formal xarakterlidir. Politoloq bunu belə əsaslandırdı: “Birləşmiş Ştatlar rəsmisinin Minsk Qrupu ilə bağlı mövqeyini əsasən onun subyektiv fikri kimi qiymətləndirirəm. Çünki ABŞ rəsmi şəkildə Minsk Qrupunda nümayəndəsini Cənubi Qafqaz üzrə təyin edib. Vaşinqton Minsk Qrupunun bərpasında maraqlı olsaydı, o zaman bunu etməzdi. Bu onu göstərir ki, ABŞ da Minsk Qrupunun fəaliyyətinin dayandırılmasini prinsipcə qəbul edib. Ümumiyyətlə, biz nəzərə almalıyıq ki, artıq münaqişə bitib. Onlar bu format çərçivəsində nə ilə məşğul olacaq sualını vermək lazımdır. Rusiya və ABŞ artıq soyuq münasibətlərə malikdir. Bu səbəbdən onların bir araya gəlməsi mümkün deyil. Çünki Ukrayna məsələsində müharibə şəraitindədirlər. ABŞ nümayəndəsi sadəcə ermənilərin arzusunu dilə gətirir. Bu isə mümkün deyil ona görə ki, artıq münaqişə bitib. Ermənistan baş naziri də status məsələsini dilə gətirmir. Minsk Qrupu bitib və belə bir format 2020-ci ilin 27 sentyabrına kimi var idi. Yeni geosiyasi reallıqlar var. Azərbaycan özü reallıqlar yaradıb. Vaşinqton da bununla barışır. Ermənistan 90-cı illərin formatını arzulasa da, bu mümkün deyil”.
Politoloq onu da əlavə etdi ki, ABŞ-ın bəzi rəsmiləri erməni lobbisinə xoş olsun deyə belə açıqlamalarla çıxış edirlər.
Vidadi ORDAHALLI
