Deputatlar "uzun davadan” sonra öz maaşlarını xeyli qaldıra bildilər - xoş qarşılanmadı...

İlqar Hüseynli: “Yaxşı olar ki, həmin deputatlar öz seçicilərinin vəziyyətinin yaxşılaşması istiqamətində səylər göstərsin”

img

Milli Məclisin deputatlarının maaşı artırılır. Bununla bağlı "Azərbaycan Respublikası Milli Məclisinin deputatının statusu haqqında" qanuna dəyişiklik edilir. Hazırki qanunvericiliyə əsasən, Milli Məclisin sədri 2475 manat miqdarında aylıq vəzifə maaşı alırdı.

Milli Məclis sədrinin birinci müavini Milli Məclis sədrinin aylıq vəzifə maaşının 90 faizi, Milli Məclis sədrinin müavini - 85 faizi, Milli Məclisin komitə və komissiya sədri - 80 faizi, Milli Məclisin komissiya sədrinin müavini - 75 faizi, Milli Məclisin deputatı isə Milli Məclis sədrinin aylıq vəzifə maaşının 70 faizi miqdarında aylıq vəzifə maaşı alırdı.

Milli Məclisin Sədri, onun birinci müavini və müavinləri, Milli Məclisin komitə və komissiya sədrləri və onların müavinləri, Milli Məclisin deputatları hər ay vəzifə maaşlarının bir misli məbləğində vəzifə maaşına əlavə alırlar.

Dəyişikliklə isə Milli Məclisin sədri 3550 manat miqdarında aylıq vəzifə maaşı alacaq.

Milli Məclis sədrinin birinci müavini Milli Məclis sədrinin aylıq vəzifə maaşının 90 faizi, Milli Məclis sədrinin müavini - 85 faizi, Milli Məclisin komitə və komissiya sədri - 80 faizi, Milli Məclisin komissiya sədrinin müavini - 75 faizi, Milli Məclisin deputatı isə Milli Məclis sədrinin aylıq vəzifə maaşının 70 faizi miqdarında aylıq vəzifə maaşı alacaq.

Milli Məclisin Sədri, onun birinci müavini və müavinləri, Milli Məclisin komitə və komissiya sədrləri və onların müavinləri, Milli Məclisin deputatları hər ay vəzifə maaşlarının iki misli məbləğində vəzifə maaşına əlavə alacaqlar.

Deputatların yalnız öz əmək haqlarını qaldırmaq istiqamətində göstərdiyi səyləri cəmiyyət necə qarşılayır?

Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, bu məsələ bir problem olaraq hər dəfə davam edir: “İctimai rəydə biz görürük ki, belə məsələyə görə ciddi narazılıq var. Çox təəssüflər olsun ki, bu məsələdə ictimai rəy çox da nəzərə alınmır. Bu hal silsilə vəziyyətdə davam edir. Büdcəyə dəyişiklik zamanı, təəssüf ki, korrupsiyaya yol aça biləcək infrastruktur layihələrinə əlavə vəsaitlər ayrılır. Parlament öz əmək haqqını qaldırmaq üçün tez-tez qanuna dəyişiklik edir. Belə çıxır ki, ancaq ayrıca bir zümrənin maddi ehtiyacları digərlərindən üstün tutulur. Bu məsələdə obyektivlik qorunmalıdır. Ən əsası da sosial ədalət prinsipinə riayət edilməlidir. Həkim və müəllimlərin maaşı aşağı olduğu halda deputatların əmək haqlarının qaldırılmasına nə ehtiyac var? Bu həm də o deməkdir ki, gələcəkdə onların pensiya təminatı da həmin maaşa görə hesablanacaq  və  çox yüksək olacaq. Quru sərhədlərin açılması, Naxçıvana biletlə bağlı vəziyyətin ağırlığı qətiyyən həmin deputatları narahat etmir. Bütün bunlar ictimaiyyəti dərindən narahat edir. İndiki bahalıq şəraitində xalqın səsi ilə formalaşan parlament bunu özünə rəva bilməməlidir. Yaxşı olar ki, həmin deputatlar öz seçicilərinin vəziyyətinin yaxşılaşması istiqamətində səylər göstərsin. Belə hallara qətiyyən yol verilməməlidir”.

Məhəmmədəli QƏRİBLİ

Peşə etikası

Son xəbərlər