“Türk axını” qaz kəmərinin planlaşdırılan illik texniki xidməti iyunun 21-dən 28-dək aparılacaq. Profilaktik işlərlə əlaqədar "Qazprom" bir həftə ərzində iki xətti üzrə qaz nəqlini dayandıracaq.
Xatırladaq ki, bundan əvvəl texniki işlərin aparılacağı vaxtla əlaqədar Türkiyənin “Botaş” və Bolqarıstanın “Bulqartransgaz” şirkətləri də məlumat vermişdi.
Qeyd edək ki, “Türk axını” vasitəsilə Rusiyadan Türkiyəyə Qara dənizdən keçməklə qaz ixrac olunur. Layihənın ötürücülük gücü ildə 31,5 milyard kubmetr təşkil edir. Boru xətti Türkiyəyə qaz tədarükü və Cənub-Şərqi Avropa ölkələrinə tranzit üçün nəzərdə tutulub.
Bu hadisəni texniki amillərlə izah edirlər. Ancaq baş verən hadisə maraqlı zamana təsadüf edir. Ərdoğan Suriyada ciddi antiterror əməliyyatlarına başlayacağını bəyan edir. Rusiya bu prosesə ciddi etiraz edir. Belə bir zamanda bu hadisənin baş verməsi Türkiyəyə Moskvanın Suriya ilə bağlı təzyiqi ola bilərmi?
Aydın Quliyev: “Bu qərarın Türkiyəni Suriyada əməliyyatlardan çəkindirmək üçün təzyiq xarakterində olması istisna deyil”
“Bakı-Xəbər” Media Qrupunun rəhbəri, siyasi şərhçi Aydın Quliyev mövzu ilə bağlı açıqlamasında bildirdi ki, əlbəttə, texniki təmir zərurəti hər zaman mümkündür: “Lakin bu hadisənin məhz indi baş verməsi təsadüf hesab edilməyə bilər. Çünki...
Hamı bilir ki, siyasətdə toqquşmalar, uzlaşmalar, davamlar, inkarlar heç bir halda təsadüf olmur. Bu günlərdə Türkiyə Suriyanın şimalında antiterror əməliyyatı aparacağını rəsmən bəyan etdi. Rusiya bu əməliyyata qarşı olduğunu dərhal və birmənalı bəyan etdi. Rusiyanın məntiqi ayındır. Rusiya kürd silahlılarını Suriyada Əsəd hakimiyyətinin tərəfdarına çevirmyə çalışır və bu üzdən kürdlərin əleyhinə Türkiyənin hər hansı əməliyyat aparmasını istəmir. Məhz bu üzdən birmənalı şəkildə Türkiyənin Suriyada son əməliyyat planlarına qarşı çıxdı və hətta rəsmi şəkildə Ərdoğana "Suriyadakı planlardan çəkinin” mesajını verdi...Təbii ki, Ərdoğan bu mesajı qəbul etmədi və hələlik öz bildiyi ilə hərəkət etməkdə israrlıdır...
Bax. belə bir vaxtda Rusiya Türkiyəyə qaz nəqlini 8 günlüyə dayandırmaq qərarı verir. Düşüncəmə görə, bunların üst-üstə düşməsi təsadüf deyil. Bu qərarın Türkiyəni Suriyada əməliyyatlardan çəkindirmək üçün təzyiq xarakterində olması istisna deyil... Xatırladım ki, “Türk axını” Qara dəniz üzərindən Rusiya qazını Türkiyəyə nəql edən qaz kəməridir və 2020-ci ilin əvvəlində istifadəyə verilib. İllik 31 milyard kubmetr qaz nəql etmək gücündədir”.
Elşən Mustafayev: “Rusiya qaz amilindən hər zaman siyasi şantaj vasitəsi kimi istifadə edib”
Politoloq Elşən Mustafayev qəzetimizə bildirdi ki, Rusiya Türkiyənin Suriyanın şimalında həyata keçirəcəyi əməliyyatdan imtina etməsinə çalışmağa davam edir: “Rusiya xarici işlər nazirinin müavini Mixail Boqdanov deyib ki, bu istiqamətdə Türkiyə ilə işləməyə davam edirlər. Ancaq ortada heç bir nəticə yoxdur. Türkiyə mediası ölkənin Suriyanın şimalında həyata keçirəcəyi hərbi əməliyyatın bütün hazırlığını başa çatdırdığını yazıb. Bu o deməkdir ki, Türkiyə Rusiyanın narazılığını nəzərə almadan bu işə gedir. Təbiidir ki, Rusiya da əlində olan rıçaqlardan istifadə edərək, onu bu yoldan çəkindirməyə çalışır. Biz bunu Rusiyanın Qazaxıstanla bağlı atdığı bəzi addımlarda da gördük. Rusiya qaz amilindən hər zaman siyasi şantaj vasitəsi kimi istifadə edib. Bu addımı da texniki deyil, siyasi amillərlə izah etmək olar”.
Məhəmmədəli QƏRİBLİ
