Rusiya KTMT qüvvələrini Ukraynaya cəlb etməkdən niyə geri çəkildi...

Ramil Məmmədli: “Kreml bu məsələdə fiasko ilə üzləşəcəyini bildiyindən geri addım atıb”

img

Rusiya prezidentinin mətbuat katibi Dmitri Peskov bəyan edib ki, Kollektiv Təhlükəsizlik Müqaviləsi Təşkilatının (KTMT) hərbi qulluqçularının Rusiyanın Ukrayna və Donbasda keçirdiyi xüsusi hərbi əməliyyatda iştirakı nəzərdən keçirilmir.

Peskov bunu belə əsaslandırıb: “Bu seçim nəzərdə tutulmayıb. KTMT-nin əhəmiyyəti böyükdür, KTMT çox yaxın keçmişdə öz effektivliyini, səmərəliliyini və inkişafa ehtiyacı olduğunu nümayiş etdirdi. KTMT xarici siyasət və təhlükəsizlik sahəsində bizim prioritetlərimizdən biridir”.

Bundan əvvəl Çeçenistan rəhbəri Ramzan Kadırov KTMT ölkələrini Qərbin sanksiyalarından qorxmamağa və susmamağa, Ukrayna hadisələri ilə bağlı öz mövqeyini bildirməyə çağırıb. O vurğulayıb ki, Rusiya təşkilatdakı bütün tərəfdaşlarına yardım edib və indi özünün yardıma ehtiyacı olanda hamı susur.

Maraqlıdır, Peskovun məlum açıqlaması nə dərəcədə səmimidir? Necə olur ki, KTMT qüvvələrindən Qazaxıstanda istifadə olunur, amma Ukraynada istifadə edilməsi nəzərdən keçirilmir? Düzdür, Ukrayna KTMT üzvü deyil, amma Rusiya bu təşkilatın üzvüdür. Bununla belə, Rusiya hesab edir ki, bu ölkə Ukraynada xüsusi əməliyyat aparır və çətinlik var. Belə şəraitdə Rusiyanın KTMT-nin köməyindən istifadə etməsi məntiqli olardı. Başqa bir tərəfdən ona görə buna getmirlər ki, KTMT üzvləri arasında birlik yoxdur. Bir müddət əvvəl Ermənistan baş naziri Nikol Paşinyan verdiyi müsahibədə bəyan edib ki, olkəsi müttəfiqlərinə münasibətdə sədaqətli davranır. Söhbət Ukraynada sülhyaratma əməliyyatlarından gedirsə, biz iştirak edəcəyik. Ancaq əgər orada müharibəyə qoşulmaqdan söhbət gedirsə, biz müttəfiq olsaq da bu haqda düşünəcəyik. Məhz belə fikirlər Rusiyanı çəkindirir ki, müttəfiqlərin hamısı buna getməyəcək. Çox güman ki, Peskov da bunlardan çıxış edərək belə açıqlama ilə çıxış edir.

  • “Hansı KTMT qüvvələrindən söhbət gedə bilər ki, Rusiyanın ən yaxın müttəfiqi Belarus Ukraynaya müdaxilədə iştirak etmək istəmir”

Məsələyə münasibət bildirən hərbi ekspert Ramil Məmmədlinin fikrincə, Peskovun açıqlaması səmimi deyil: “Ona görə ki, Rusiya xaric digər KTMT üzvləri əslində Ukraynaya müdaxiləyə qarşıdılar. Sadəcə, Putindən çəkindikləri üçün açıq şəkildə buna qarşı çıxa bilmirlər. Hansı KTMT qüvvələrindən söhbət gedə bilər ki, Rusiyanın ən yaxın müttəfiqi Belarus Ukraynaya müdaxilədə iştirak etmək istəmir. Hansı ki, Putin Belarus prezidenti Aleksandır Lukaşenkonu bununla bağlı yola gətirmək üçün müxtəlif variantlara əl atdı. Ancaq bütün təzyiqlərə rəğmən, Lukaşenko buna getmir. Belarus buna getmirsə, digər KTMT üzvləri ümumiyyətlə buna getməyəcək. Ən azından ona görə ki, az-çox Rusiyanın Ukraynada üzləşdiyi əsgəri itkilərdən xəbərdardılar. Baxmayaraq ki, Rusiya bütün vasitələrlə hərbi itkilərinin böyük olmasını gizlətməyə çalışır. KTMT üzvləri müharibəyə qoşulsa, analoji vəziyyətlə üzləşəcəklər. Nəticədə əsgər ölümlərinə görə həmin ölkələrdə sosial narazılıqlar baş qaldıracaq. Başqa bir tərəfdən, KTMT üzvləri Ukrayna müharibəsinə qoşulacağı təqdirdə Qərbin sanksiyaları ilə üzləşəcəklər. Rusiyanın resursları zəngin olduğu üçün hələlik sanksiyalara duruş gətirə bilir. Ancaq biz nəzərə almalıyıq ki, digər KTMT üzvlərinin belə bir şansı yoxdur. Ermənistan kimi dövlətin isə heç yoxdur. Bu səbəbdən Rusiya rəsmiləri yaxşı bilir ki, KTMT üzvləri buna getməyəcək. O üzdən, belə açıqlama verməklə guya onların belə bir istəyi olmadığı görüntüsünü yaradır”.

Bir sözlə, hərbi ekspert hesab edir ki, Kreml bu məsələdə fiasko ilə üzləşəcəyini bildiyindən geri addım atıb.

Vidadi ORDAHALLI

Peşə etikası

Son xəbərlər