Rusiya mətbuatının, xüsusən də aparıcı telekanallarının Azərbaycana qarşı qərəzli mövqe tutduğu məlumdur. Biz bunu həm 44 günlük müharibə, həm də postmüharibə dövründə açıq şəkildə gördük. Dövlət olaraq öz növbəmizdə bu kimi hallara etirazımızı ortaya qoymuşuq. Bir sözlə, Azərbaycan dövlətinin və ictimaiyyətinin Rusiya mediasına qarşı sərt addımları Rusiya mediasını geriyə addım atmağa vadar edib.
“Rossiya-1” telekanalında “Vesti nedeli” proqramının efirində Azərbaycan haqda videoreportaj nümayiş etdirilib. Müxbir Aleksandr Buzaladze bildirib ki, Azərbaycan ərazisi 30 ilə yaxındır ki, işğal altında idi. O, Füzuli və Şuşa şəhərlərində olub, Qarabağda aparılan bərpa işlərindən tamaşaçılara məlumat verib. Rusiya telekanalında yayımlanan bu reportaj Ermənistanda böyük hiddətə səbəb olub. Erməni mediası və ictimaiyyət nümayəndələri Rusiyanın müvafiq orqanlarına və telekanal rəhbərliyinə “erməni-rus münasibətlərinə xələl gətirən” vəziyyətə baxmaq xahişi ilə müraciət ediblər.
“Rossiya-1” siyasətini hansı səbəbdən Azərbaycanın xeyrinə dəyişdi?
“...Ermənilər olmur, kim olur olsun, Rusiya mediası bizimlə hesablaşmalı olacaq”
Siyasi şərhçi Azər Həsrət “Bakı-Xəbər”ə bildirdi ki, sözügedən reportaja baxıb və belə reportajı təqdir edir. “Mənə elə gəlir ki, o reportajda Azərbaycan vətəndaşları olan rusların azərbaycanlı olmaqları ilə qürur duyduqlarını dilə gətirmələri Rusiya auditoriyası üçün çox gərəkli bir məqamdır. Yəni Rusiyadakı insanlar anlayır, görür ki, Azərbaycanda yaşayan ruslar burada Azərbaycan vətəndaşı olmaqdan məmnundurlar, xoşbəxtdirlər və bundan qürur duyurlar. Üstəlik də, Ermənistanın işğalına qarşı rus millətindən olan Azərbaycan vətəndaşları da açıq şəkildə savaşa giriblər və onların arasında şəhid olanlar da, qazi olanlar da var. Azərbaycanın Milli Qəhrəmanı Yuri Kovalyovun qızı Regina Kovalyova ilə 44 günlük Vətən müharibəsi qazisi Denis Quzlayevin toy mərasiminin həmin reportaja salınması da çox maraqlı oldu. Bunlar öz yerində. Ümumilikdə götürdükdə isə, niyə Azərbaycanla bağlı Rusiya TV-si belə obyektiv materiala yer verib? Bu onunla bağlıdır ki, son zamanlar Azərbaycan ictimai rəyi, ölkəmizin müvafiq rəsmi qurumları nəhayət ki, Rusiyaya ciddi təpkilər verdilər. Əlbəttə, ictimai rəy həmişə təpkilər verib. Bu yeni bir şey deyil. Lakin rəsmi dövlət qurumlarının təpkilər verməsi bir yenilik sayıla bilər”.
A.Həsrətin sözlərinə görə, çünki biz belə təpkilərə tez-tez rast gəlməmişik, amma gəldik. İctimai rəy Azərbaycanın müvafiq qurumlarından sərt şəkildə tələb edirdi ki, Rusiya mediasının belə dağıdıcı, pozucu yanaşmasına reaksiya verilsin deyən A.Həsrətin sözlərinə görə, sevindiricidir ki, Azərbaycan dövləti bunu etdi. “Bilirsiz ki, “RİA Novosti”nin bölücü ermənidən müsahibə alması səbəbindən həmin sayta Azərbaycanda giriş əngəlləndi. Bununla Rusiya mediasına göstərildi ki, biz bu addımı ata bilərik. Bu səbəbdən də Rusiya telekanalı belə obyektiv addım atıb. Telekanalın Azərbaycanla, Qarabağla bağlı obyektiv reportajından ermənilərin qıcıqlanmasına gəlincə, bu, erməni xislətinə xas haldır. Onlar ermənidir və onlar obyektivlik, həqiqət qarşısında aciz qaldıqları üçün həmişə əsəbiləşirlər. Elə hesab edirlər ki, Rusiya mediası birmənalı və təktərəfli şəkildə ermənilər üçün işləməlidir. Yəni onlar alışmayıblar ki, Rusiya mediası Azərbaycana münasibətdə obyektivlik nümayiş etdirsin. Ona görə də ermənilər yenə də kampaniyaçılığa başlayıblar. Bunu mən də müşahidə edirəm. Təbiidir ki, Azərbaycan dövləti və ictimai rəyi ayağını yerə möhkəm basarsa, Rusiya mediasına media etikası çərçivəsində obyektiv işıqlandırma tələbini davam etdirərsə, düşünürəm ki, ermənilər olmur kim olur olsun, Rusiya mediası bizimlə hesablaşmalı olacaq. Yəni biz mövqeyimizi möhkəmləndirməliyik. Dəfələrlə demişəm, Moskvadakı səfirliyimiz anti-Azərbaycan materialları yayımlandığı andan Rusiya dövlətinin rəsmi məqamlarına müraciət etməlidir, nota verməlidir, XİN-lə işləməlidir. Təəssüflər olsun ki, bunlar edilmir. Edilmədiyinə görə də, bizə qarşı kampaniyalar aparılır. Bax, indi bu televiziyanın bu cür obyektiv və kifayət qədər uzun materialı efirə verməsi, düşünürəm ki, Azərbaycanın verdiyi təpkilərin nəticəsidir. Biz bu təpkiləri davam etdirək. Ermənilər nə istəyirlər etsinlər, hansı kampaniyalar aparırlar aparsınlar, biz təpkilərimizi davam etdirməliyik” - deyə A.Həsrət vurğuladı.
İradə SARIYEVA
