Qondarma Donetsk Xalq Respublikasının SPİEF Ticarət və Sənaye Palatası ilə İranın “Farnoush Trading” ticarət evi arasında ticarət-iqtisadi əlaqələrin inkişafını gücləndirəcək saziş imzalanıb.
Bu barədə Təbriz-Turan TV Teleqram kanalının yaydığı məlumatda bildirilir.
Qeyd olunana görə, saziş çərçivəsində qondarma respublikanın infrastrukturunun bərpasına köməklik göstərilməsi, ərzaq təminatının təmin edilməsi istiqamətində işlər aparılacaq. Kanal vurğulayır ki, İran qondarma respublikanı Azərbaycanın güneyindən taladığı mis, qızıl, mərmər məhsulları ilə təmin etmək niyyətindədir, əvəzində kömür və dəmir alacaq.
“Separatçı rejimlə ticarət etmək, hər hansı formada iqtisadi əlaqələr qurmaq heç bir dövlətə başucalığı gətirmir”
İran şirkətinin qondarma respublika ilə əməkdaşlıq sazişinin imzalamasını şərh edən Liberal İqtisadçılar Mərkəzinin rəhbəri Akif Nəsirli bizimlə söhbətində bildirdi ki, bu əslində İrana xas göstəricidir: “Bu məsələ İran İslam Respublikasının xarakterindən, mərəzindən asılı olan bir hadisədir. Yadınızdadırsa, Azərbaycan əraziləri işğalda olduğu dövrlərdə kifayət qədər informasiya var idi ki, İran Qarabağdakı separatçı rejimə yardımlar göstərir və onlarla iqtisadi əlaqələr qurur. İranın o dövrdə separatçı rejimlə həm dövlət, həm də şirkətlər səviyyəsində çoxşaxəli iqtisadi əlaqələri vardı. Yəni separatçı rejimlərlə əməkdaşlıq İran İslam Respublikasının rəsmi dövlət siyasəti kimi diqqəti cəlb etməkdədir. İran indi də Ukraynadakı separatçı qurumla oxşar münasibətlər qurmağa cəhd göstərir. Bu həm də İranın Rusiya ilə tərəfdaşlığından doğan bir məsələdir. Qondarma Donetsk Xalq Respublikasının SPİEF Ticarət və Sənaye Palatası ilə İranın “Farnoush Trading” ticarət evi arasında saziş imzalanıb. Belə qələmə verilir ki, guya hər iki təşkilat “müstəqil” ticarət subyektidir. Əslində isə hər ikisi də birbaşa dövlətin nəzarətində olan qurumlardır. Bu saziş ona görə qurumlar arasında imzalanır ki, sabah kimsə buna görə İranı ittiham etdikdə, İran “Farnoush Trading” ticarət evi müstəqil təşkilatdır, onun dövlətə heç bir aidiyyəti yoxdur, onun dünyanın istənilən ölkəsi ilə əlaqə yaratmaq, ticarət münasibətləri qurmaq səlahiyyəti var və burada dövlətin iradəsi ifadə edilmir” kimi bəyanat versin. Belədə isə bu, İran dövlətinin separatçı, beynəlxalq səviyyədə tanınmamış oyuncaq bir qurumla ticarət etməsidir. Separatçı rejimlə ticarət etmək, hər hansı formada iqtisadi əlaqələr qurmaq heç bir dövlətə başucalığı gətirmir”.
A.Nəsirlinin sözlərinə görə, istənilən dövlətin separatçı qurumla iqtisadi, siyasi, mədəni və sair sahədə əlaqə qurması dövlətin reytinqinə ciddi zərbə vurur. O qeyd etdi ki, İran İslam Respublikasının bu istiqamətdə reytinqi bəllidir. “Belə bir məsəl var: islanmışın yağışdan nə qorxusu”. İran dünyada kifayət qədər separatçı, terrorçu qurumları açıq və örtülü şəkildə dəstəkləyərək artıq özü üçün belə bir imic formalaşdırıb. Ona görə də, İranın imicinə zərər gəlmək problemi də yoxdur. Bu səbəbdən də İran İslam Respublikası dünyanın terrorçu, separatçı qurumları ilə əlaqə qurur. İndiki fakt isə İranın Rusiyaya dəstək verməsi kimi anlaşılmalıdır və bu, dünyada bu ölkənin siyasəti kimi qəbul ediləcək. Bu hadisəni ticarət evi adı altında nə qədər pərdəsələr də, dünya başa düşür ki, bu birbaşa İran dövlətinin özünün siyasətidir” deyə A. Nəsirli vurğuladı.
İradə SARIYEVA
