Ölkəmizdə dövlət-din münasibətləri çox yüksək səviyyədə tənzimlənir. Azərbaycanda qanunla din dövlətdən ayrı olsa da, dinimizin inkişafına, təbliğinə, məscidlərə, dini ocaqlara dövlət olduqca diqqətlə yanaşır, qayğı göstərir. Azərbaycanda dövlət-din münasibətləri başqa ölkələrə bir örnəkdir. Azərbaycan Prezidenti İlham Əliyevin, Birinci vitse-prezident Mehriban Əliyevanın dinə xüsusi diqqət və qayğısı var.
Bu gün Azərbaycanda məscidlərin, dini məbədlərin, dini ocaqların bərpasına böyük önəm verilir. Ölkə başçısının müsəlman dünyasının müqəddəs ünvanı Məkkəyə ziyarəti onun dinimizə bəslədiyi sonsuz sevginin, ehtiramın bir nümunəsidir. Dövlət səviyyəsində işğaldan azad olunmuş ərazilərdə dini məbədlərimizin bərpasına xüsusi diqqət göstərilir. Eyni zamanda dövlət başçısı və birinci xanım tərəfindən Ağdam, Şuşa məscidləri ziyarət edilib, Mehriban Əliyeva özü şəxsən o məscidlərə Quran gətirib. Şübhəsiz azad olunan ərazilərimizdə Heydər Əliyev Fondu həm tarixi abidələrin, həm də islam dini abidələrinin bərpasında önəmli rol oynayır, böyük işlər görür.
Onu da qeyd edək ki, yalnız bu gün deyil, əvvəlki dövrlərdə də ölkəmizdə məscidlərin əsaslı bərpa prosesi həyata keçirilib. Biz burada Bibiheybət, Təzəpir, Şamaxı cümə məscidi və başqa məscidlərin yüksək səviyyədə bərpa edilərək dindarların, əhalinin ixtiyarına verilməsini vurğulaya bilərik. Prezident İlham Əliyev dini təhsilin inkişafına da xüsusi əhəmiyyət verir. O, din sahəsində də milli kadrların yetişdirilməli olduğunu hər zaman önə çəkir. 2022-ci il aprelin 11- də Azərbaycanda İlahiyyat İnstitutunun yeni inzibati binasının açılışında Prezident İlham Əliyev iştirak edirdi və o, burada din sahəsində milli kadrların hazırlanmasına önəm verilməsini xüsusi bildirdi.
Azərbaycanda dövlət-din münasibətlərinin çox yüksək səviyyədə olduğunu, ölkə başçısının və Birinci vitse-prezidentin dini sahəyə misilsiz qayğı və diqqət göstərdiyini deyən Millət vəkili Ceyhun Məmmədov baki-xeber.com-a şərhində bildirdi ki, bütün bunlar dövlət-din münasibətlərinin səviyyəsini göstərir. “Bu gün Azərbaycanda bu sahəyə Prezident İlham Əliyevin və Birinci vitse-prezident Mehriban xanım Əliyevanın yüksək diqqət və qayğısı var. Ölkəmizdə bilavasitə onların diqqət və qayğısı ilə məscidlər tikilir, əsaslı şəkildə təmir və bərpa olunur. Bakıda Təzə Pir, Bibiheybət məscidləri ən yüksək səviyyədə təmir və bərpa olunub, onlar insanlarımızın istifadəsinə verilib. Bütün müsəlman ölkələrindən Bakıya gələn qonaqlar bu məscidlərin möhtəşəmliyindən, böyüklüyündən, gözəlliyindən heyranlıqla danışırlar, dövlətin bu sahəyə diqqət və qayğısını yüksək qiymətləndirirlər. Qeyd etmək lazımdır ki, eyni diqqət və qayğı bizim Qarabağdakı məscidlərimizə göstərilir. Bu gün Hadrutda, Suqovuşanda, Daşaltıda, Şuşada yeni məscidlər inşa olunur. Eyni zamanda Ağdam Cümə məscidi bilavasitə Prezident İlham Əliyevin və Mehriban xanımın diqqət və qayğısı ilə təmir-bərpa olunur. Bunu həmçinin də Zəngilan haqda da deməliyik. Zəngilanda məscid yüksək səviyyədə təmir və bərpa olunur”.
C.Məmmədov vurğuladı ki, ölkə başçısı və Birinci vitse-prezident davamlı olaraq Qarabağa səfər edərkən oradakı məscidlərə baş çəkirlər, məscidlərin vəziyyətilə yerində tanış olurlar: “Prezident və Birinci vitse-prezident məscidlərdə dua edirlər, məscidlərə Quran bağışlayırlar. Bunlar dövlətin bu sahəyə xüsusi önəm verdiyini göstərir. Eyni zamanda Prezident İlham Əliyevin bu sahədə ən böyük xidmətlərindən biri də bir neçə il bundan əvvəl Azərbaycanda İlahiyyat İnstitutunun yaradılması ilə bağlıdır. Azərbaycan İlahiyyat İnstitutu milli kadrların yetişdirilməsinə öz ciddi töhfəsini verir. Bu gün bu istiqamətdə dövlət tərəfindən davamlı olaraq müvafiq addımlar atılır. Prezident İlham Əliyev İlahiyyat İnstitutunun açılışında birbaşa iştirak etdi, tanış oldu. Bu gün də qeyd etdiyimiz kimi bu istiqamətdə fəaliyyəti davam etdirdi. Bu onu söyləməyə əsas verir ki, ölkəmizdə dini abidələrə, dini-mənəvi dəyərlərimizə dövlət səviyyəsində çox böyük diqqət və qayğı var. Dövlətimiz hər zaman olduğu kimi bütün bu məsələləri xüsusi diqqətdə saxlayır. Bu amillər Azərbaycanı bu gün dünyada tolerantlıq və multikulturalizmin, milli-mənəvi dəyərlərin yüksək səviyyədə müdafiə olunduğu bir məkana, bir əraziyə, bir bölgəyə çevirib”.
İradə SARIYEVA
