“Müsəlman Birliyi” hərəkatının həbsdə olan rəhbəri Taleh Bağırzadə açlıq aksiyası keçirir. Ədliyyə Nazirliyi Penitensiar Xidmətdən bildirilib ki, Taleh Bağırzadə saxlandığı cəzaçəkmə müəssisəsində həkim nəzarəti altındadır və səhhətində ciddi problem yoxdur.
Taleh Bağırzadə və acliq aksiyasında ona qoşulan 11 nəfər iddia edirlər ki, yoldaşları polisdə dindirilərkən orada “Allah təhqir olunub”. Aclıq aksiyası keçirənlər bunu edənlərin cəzalandırılmasını istəyirlər.
Daxili İşlər Nazirliyi bütün ittihamları rədd edib.
İyirmi il müddətinə azadlıqdan məhrum edilən ilahiyyatçı Taleh Bağırzadə aclıq aksiyasına Qobustandakı həbsxanada mayın 26-da başlayıb. Aksiyaya daha sonra Abbas Hüseynov, Cabbar Cabbarov və başqaları da qatılıb.
Maraqlıdır, Taleh Bağırzadə həbsdə ola-ola polislərin Allahı təhqir etdiyini harada görüb? Bu aksiya Azərbaycana təzyiq üçün hansısa xarici dairələr tərəfindən təşkil edilə bilərmi?
İlahiyyatçı Tural İrfan “Bakı-Xəbər”ə açıqlamasında bildirdi ki, həbsdə olan bir şəxsin “polisdə Allahı təhqir ediblər” iddiası ilə çıxış etməsi çox absurddur: “Çünki şəriət tələb edir ki, bir iddianı əsaslandırmaq üçün sənin 4 şahidin olmalıdır. Bu ciddi ittihamı Talehin nəyə əsasən irəli sürməsi isə sual olaraq qalır. Buradan açıq bilinir ki, prosesi məqsədli şəkildə qızışdırırlar. 44 günlük müharibədən sonra İran ciddi narahatdır. Bir sıra təxribatçı addımlar atdı, biz cavabını verdik. Taleh Bağırzadənin İranın radikal dini dairələri ilə əlaqədə olmasına şübhə yoxdur. Bir vaxtlar yaranmış boşluqlar indi bizi belə problemlərlə üz-üzə qoyub. Onlar gedib İranda təhsil alıblar və sonra da həmin ölkənin təsiri altına düşüblər. Bu gün görünür ki, onlar dindən çox xarici sifarişləri icra edirlər. Əsl dindar olsaydılar bilərdilər ki, İslamda aclıq aksiyası deyilən bir məfhum yoxdur. Cana zərər yetirmək birbaşa haram sayılır. Kim bu səbəbdən ölərsə, yeri cəhənnəmdir. Allahı təhqir etmək əslində onun buyurduqlarına səhv əməl edib, insanları aldatmaqla olur. Lap götürək ki, hansısa polis səhv addım atıb. Buna görə bütün dövlət cavab verməlidir? Hətta nəzə alsaq ki, bu ittihamı sübut edən dəlil ortada yoxdur, onda məsələ bir qədər də başqa yön alır. Rusiya və İrandan bu aksiyaya dəstəyin ifadə olunması, Azərbaycanda bəzi radikal dindarların provakasiya cəhdləri bir daha bunun məqsədli siyasi təzyiq cəhdi olduğuna şübhə yeri qoymur. Bu aksiyanın fonunda İrandan idarə edilən səhifələrdə hətta kütləvi itaətsizliklə bağlı çağrışlar olur. Bu addımla bağlı din xadimləri ciddi maarifləndirmə aparmalıdır. Çünki bu təbliğatı onlar elə aparır ki, hətta neytral dindarları da cəlb edə bilirlər. Allahın adı ilə dini inanclı insanları provaksiyaya çəkirlər. Ermənilər Allahın evi sayılan məscidləri təhqir edəndə, bu dairələrin belə reaksiyasını görmədik. Allaha vəkillik etmək səlahiyyətini onlara heç kim verməyib. Bizim əlaqədar qurumlarımız bu məsələni ciddiyə alıb, lazımi addımlar atmalıdır ki, bu provakasiyanın qarşısı alınsın”.
Məhəmmədəli QƏRİBLİ
