Öyrənməyin yaşı yoxdur. İnsan hansı yaşda olursa-olsun, onun üçün öyrənmək gec deyil. Xüsusən də yaradıcı adamlar hər gün, hər an öz üzərində işləməlidir ki, özünü təkminləşdirə bilsin. Sözsüz, yaradıcı adam rahat durmur, hər an yeni ideyalar, yeni düşüncələr ümmanına baş vurur, düşünür, fikirləşir, onu yazıya, əsərə çevirmək üçün fürsət gəzir.
Əlbəttə, jurnalistin, publisistin öz sahəsində yeniliklərə yiyələnməsinə, dünyada mövcud olan yeni dəyərlərə sahiblənməsinə ciddi ehtiyac var. Biz klassik mətnlərdən, o mətnləri yaradanlardan çox şeylər əxz etmişik, onları işığında özümüzü ifadə etməyə çalışmışıq. Amma yenə də qeyd edim ki, yeniliklərə baş vurmağımız bizim təkminləşməmizə səbəb olur. Seminarlar, təlimlər yeni nəsil jurnalistlərlə yanaşı artıq bu sahədə öz sözünü deyənlərə, hətta yaşlı nəsil jurnalistlərə də çox faydalıdır. Öyrənmək heç zaman gec deyil…
İyunun 16-da Azərbaycan Respublikası Medianın İnkişafı Agentliyi və ADA Universitetinin İnkişaf və Diplomatiya İnstitutunun birgə təşkilatçılığı ilə “Publisistika və Köşə Yazarlığı” mövzusunda keçirilən seminarda biz bir sıra yeniliklərlə tanış olduq.
Bir sıra çap və onlayn media subyektinin nümayəndələrinin iştirak etdiyi seminara “Bakı-Xəbər” qəzetinin əməkdaşı olaraq mən də qatılmışdım. Səmimi və peşəkar bir ortamda təşkil olunan seminarın ilk bölümündə MEDİA-nın media subyektləri və jurnalistlərlə iş şöbəsinin müdiri Natiq Məmmədlinin “Azərbaycan ədəbi dilinin publisistik üslubu. Bədii publisistikanın janrları. Köşə yazarlığı təcrübəsi: köşə, yoxsa kolumnistika?” mövzusunda təqdimatı ilə tanış olduq. N.Məmmədlinin zəngin materiallar əsasında yüksək peşəkarlıqla hazırladığı təqdimatdan çox böyük zövq aldıq. Ədəbi dilin publististik üslubu, bədii, rəsmi publisistika, onun digər janrları, köşə yazısı və kolumnistika barədə ətraflı məlumat aldıq. Publisistikanın janrları barədə geniş danışan N.Məmmədli publisistik əsərlərlə bədii əsərin fərqini konkret mətnlərlə izah etdi. Natiq müəllim publisistikanın felyeton, oçerk və sair undulmaqda olan janrları barədə də ətraflı danışdı. Köşə yazısı ilə kolumnistikanın bir-birindən fərqləndiyini qeyd etdi. Çünki bəziləri bu iki janrı bir-birindən ayıra bilmir. Seminar iştirakçıları ilə canlı mükalimələr, fikir mübadiləsi aparan ekspert bizə müxtəlif tapşırıqlar da verdi. Əlbəttə, belə bir tanınmış qələm adamının təqdimatında eşidiklərimiz və əxz etdiklərimiz çox oldu. Biz bir çox məsələlərlə tanış olduq ki, bəlkə də onları bizə heç universitetdə öyrətməmişdilər. “Azərbaycan publisistikasında qadın hüquqları uğrunda mübarizə və gender bərabərliyi məsələləri”ni isə BDU-nun dosenti Aygün Əzimovanın təqdimatında dinlədik. Klassik mətbuata, klassiklərimizin yaradıcılığına istinadlarla başlayan Aygün müəllimə olduqca maraqlı, zəngin bir təqdimat keçirdi, əlbəttə yeniliklər də oldu. “Yeni mediaya konvergensiya şəraitində bədii publisistika, redaktə və hipermətn” təqdimatı ilə BDU-nun dosenti Vəfa İsgəndərova, “Qərb jurnalistikasında publisistik yazının strukturu, şərh vermənin etik qaydaları” mövzularında təqdimatla isə ADA Universitetinin Kommunikasiya və Rəqəmsal Media proqramının direktoru Şəfəq Mehrəliyeva çıxış etdi.
Həm N.Məmmədlinin, həm A.Əzimovanın, həm V.İsgəndərovanın, həm də Ş.Mehrəliyevanın çıxışları seminar iştirakçılarında xoş təəssüratlar yaratdı. Ən maraqlı cəhətlərdən biri o oldu ki, seminarın hər bölümündə jurnalistlərlə disskusiyalar, fikir mübadilələri aparılırdı. Hesab edirəm ki, MEDİA-nın maraqlı və faydalı layihələrindən biri olan bu seminarlar davamlı olmalıdır. Çünki bu seminarlar çağdaş çap, onlayn və sosial mediada çalışan jurnalistləri bu sahədəki yeniliklərlə tanış edir. Jurnalistika, dünyanın informasiya düzəni hər saniyə dəyişir və biz yeniləşən aləmə bələd olmaq, onun bir parçası kimi fəaliyyətimizi davam etdirmək üçün daima yenilənməliyik. Yenilənməliyik ki, cərgədən geri qalmayaq. Bu fürsəti isə bizə öz yeni təşəbbüsləri, layihələri ilə MEDİA verir, peşəkarların iştirakı ilə çox faydalı, səmərəli seminarlar düzənləyir. Bu seminarların faydalı cəhətlərindən biri də odur ki, müxtəlif media subyektlərində çalışan jurnalistlər bir-birini tanıyır, bir-birini öyrənir, bir-birinə daha da yaxınlaşır. Medianın ayrı-ayrı qollarında məkan tutan jurnalistlərin bir platformada birləşməsi çox əhəmiyyətlidir. Burada yeni imzalarla, yeni adlarla tanış oldum, yeni dostluqların təməlini qoydum. Əlbəttə, bizi öyrədənlərə, bizə bilik verənlərə, peşə fəaliyyətimizi təkmilləşdirməyə şərait yaradanlara təşəkkür edirəm.
İradə SARIYEVA
