Bakıda Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə “Qlobal dünya nizamına təhdidlər” mövzusunda IX Qlobal Bakı Forumunun işə başlaması çox önəmli hadisədir. Ötən il Ermənistan silahlı qüvvələrinin 28 illik işğalından sonra azad edilmiş qədim Şuşa şəhərində keçirilən VIII Qlobal Bakı Forumunun mövzusu “COVID-19-dan sonrakı dünya” idi.
Qədim şəhərimizdə keçirilən panel iclasının adı da günümüzlə səsləşirdi: "Mədəni irsin qorunması”. Bu gün Bakı şəhərində keçirilən Qlobal Forum dünyada və regionda siyasi, qlobal və universal xarakter daşıması beynəlxalq gündəmdə olan siyasi, iqtisadi, humanitar və digər məsələləri əhatə edir. Görünən budur ki, Azərbaycan yalnız ölkədaxili proseslərə deyil, eyni zamanda dünyada gedən proseslərə öz töhfəsini verməyə çalışır, qlobal təşəbbüslərlə çıxış edir. Bu da onu göstərir ki, ölkəmiz bu gün dünyanın müxtəlif forumlarının, konfranslarının, mühüm tədbirlərinin keçirildiyi məkana və mərkəzə çevrilib. Bu baxımdan 9-cu Qlobal Bakı Forumu digər beynəlxalq forumlardan miqyasına və məzmun genişliyinə görə ciddi şəkildə fərqlənir. Hətta bu Forumu nüfuzlu Davos və Münhen kimi Gorumlarla da müqayisə edirlər? Bu Forumlar arasında bir bənzərlik varmı?
Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər” ə bildirdi ki, hətta Bakının ev sahinliyi etdiyi Qlobal Forum adlarını çəkdiyiniz platformalardan daha böyük sahələri əhatə edir: “Daha dəqiq desək, Davos Forumu sırf iqtisadi və ya Münhen Forumu sırf təhlükəsizlik məsələlərini özündə ehtiva edirsə, Bakı Qlobal Forumu bu mənada daha universal və daha əhatəlidir. Yəni bu forum beynəlxalq gündəmdə olan bütün siyasi, iqtisadi, humanitar və digər mövzulara açıqdır. Bu forumda Albaniya, Bolqarıstan, Gürcüstan və s. ölkələrin fəaliyyətdə olan rəhbərləri, çoxsaylı dövlətlərin keçmiş rəhbərləri, tanınmış ictimai-siyasi xadimlər, aparıcı ekspertlər, habelə, Ümumdünya Səhiyyə Təşkilatının, Ərəb Dövlətləri Liqasının rəhbərləri iştirak edir. Eyni zamanda, bir sıra dövlət başçıları Foruma müraciət ünvanlayıblar. Bu isə ondan xəbər verir ki, Azərbaycan, hər zaman olduğu kimi, yenə də qlobal xarakterli mövzuların, məsələlərin müzakirəsini təşkil edir, bu istiqamətdə yetərincə ciddi fəallıq göstərir, öz ev sahibliyi, təşkilatçılığı, təşəbbüskarlığı ilə beynəlxalq siyasətə növbəti tohfələr verir. Bakı Qlobal Forumu bir çox xüsusiyyətlərinə görə digər beynəlxalq forumlardan fərqlənir. Azərbaycanın dövlət başçısı Forumda bu çağırışı da etdi ki, indi Cənubi Qafqazda sülhü bərqərar etmək və əməkdaşlıq qurmaq vaxtıdır. Azərbaycan tərəfi sülh sazişi üzərində işə başlamaq təklifi irəli sürüb. Ermənistan buna cavab vermədi. Azərbaycan beynəlxalq hüququn beş əsas prinsipini, o cümlədən hər iki ölkənin ərazi bütövlüyünün tanınmasını, həmçinin indi və gələcəkdə qarşılıqlı olaraq hər hansı ərazi iddialarından çəkinmək təklifini irəli sürdü. Ermənistan yenə də qeyri-konstruktivlik edir. Belə tədbirlərdə biz həm də regionla bağlı həqiqətləri rahat şəkildə nüfuzlu nümayəndələrin diqqətinə çatdıra bilirik. Bu baxımdan da forumu çox əhəmiyyətli sayıram və əhatə baxımından digər nüfuzlu tədbirlərdən önəmini daha yüksək qiymətləndirirəm”.
Məhəmmədəli QƏRİBLİ
