Ermənistanla İran arasında isti münasibətlər o səviyyəyə qalxıb ki, indi onlar birlikdə kulinariya festivalı keçirməyi də planlayıblar. Bu layihənin təşkilatçılarından biri Sedrak Mamulyan “SputnikArmenia”ya deyib ki, Zəngəzurda erməni-İran kulinariya festivalı keçiriləcək. Mamulyanın sözlərinə görə, “tədbir” iyunun 19-da “Zvartnots” məbədinin ərazisində olacaq.
Festivalın ideyasının isə Ermənistana məxsus olduğu vurğulanıb. Qeyd edilir ki, iştirakçılar “ənənəvi erməni yeməkləri”nin dadına baxacaqlar. 150 metr uzunluğunda dolma bişiriləcək, lavaş, paxlava və digər “milli” təamlar təqdim olunacaq. Festivalın İran-Ermənistan “dostluğu və qardaşlığı”nı bir daha nümayiş etdirdiyi vurğulanır.
Ekspertlər hesab edir ki, bu mətbəx məsələsi yox, birbaşa siyasi məsələdir. Burada təqdim edilən xörək və şirniyyatların erməni mətbəxt ilə heç bir əlaqəsi yoxdur, amma indiki halda bu xörəklər “erməni mətbəxi” adı altında təbliğ olunur.
“Əlbəttə, İranla Ermənistanın birgə kulinariya festivalı keçirəcəyi xəbəri bizi qıcıqlandırır, narazı salır...”
“Müasir İnkişaf” Birliyinin rəhbəri Mübariz Göyüşlü hesab edir ki, İran bölgədə dayanıqlı və perspektivli əməkdaşlıqla bağlı addımlar atmaq istəyirsə, Azərbaycanla əlaqələrini daha geniş şəkildə qurmağa çalışmalıdır, nəinki Ermənistanla. “Fikrimcə, İran istər siyasi, istər iqtisadi, istər mədəni, istərsə də hərbi və digər müstəvidə Azərbaycanla əməkdaşlıq etməlidir. Bu ölkənin Ermənistanla hər hansı bir mədəni münasibətlər qurması, yaxud Azərbaycanı narazı salacaq, qıcıqlandıracaq addımlar atması heç də onun özü üçün faydalı nəticələr doğurmayacaq. Bu heç Ermənistanın özü üçün də yaxşı olmayacaq. Çünki Azərbaycanla sərhədlərin müəyyənləşdirilməsindən, sülhdən danışan Ermənistanın bu cür təxribatçı addım atması sülh danışıqları ilə bağlı çalışmalara ziyan vurur. Biz bilirik ki, Ermənistan hələ də düşmənçilik mövqeyindən əl çəkmir. Ermənistanla bizim aramızda müharibə yeni bitib, bu səbəbdən də bu ölkədən hər cür təxribat gözləyirik. İranın Ermənistanın təşkil etdiyi kulinariya festivalına qatılması, hər iki ölkənin kulinarlarının burada Azərbaycan təamlarını hazırlaması mənfi nəticələr doğuracaq. İslam ölkəsi İranın Ermənistanın “mədəni” layihəsinə qatılması qəbuledilməzdir. Əlbəttə, İranla Ermənistanın birgə kulinariya festivalı keçirəcəyi xəbəri bizi qıcıqlandırır, narazı salır. İranla Azərbaycan mətbəxində bənzərliklər ola bilər, Ermənistanla İran mətbəxində nə bənzərlik ola bilər ki? Festivalda ermənilər bizim dolmanı və şirniyyatlarımızı bişirəcəklər”.
M.Göyüşlü qeyd etdi ki, son dövlər İran və Azərbaycan arasında çox yüksək səviyyədə görüşlər keçirilir, faydalı sənədlərdən danışılır, razılaşmalar əldə olunur, amma belə bir şəraitdə bu cür təxribatçı, qıcıqdoğuran, perspektivi olmayan festivalın keçiriləcəyi xəbərinin gündəmə gətirilməsi yalnız ziyanlı nəticə verə bilər: “Azərbaycanın tarixi ərazisi Zəngəzurda Ermənistan tərəfindən təşkil olunan bu festivalda İran tərəfin iştirak etməməsi, geri çəkilməsi ən azından islam həmrəyliyinə bir töhfə olardı. Hesab edirəm ki, biz İrana, onun aidiyyəti qurumlarına, təşkilatlarına çağırış etməliyik ki, Ermənistanın təxribatına uyub o festivala qatılmasınlar. Ümumiyyətlə, Azərbaycan mədəniyyətinə, Azərbaycan kulinariyasına aidiyyəti olan təamların, şirniyyatların Ermənistan “mətbəx”inə aid təamlar kimi təqdim edilməsi böyük təxribatdır. Ermənistan bu təxribatçı kulinariya festivalını bizi qıcıqlandırmaq üçün keçirir...”
İradə SARIYEVA
