Son günlər ərzində ABŞ-ın yüksək dövlət rəsmilərinin Azərbaycana səfərləri intensiv hal almağa başlayıb.
ABŞ dövlət katibinin Avropa və Avrasiya məsələləri üzrə köməkçisi doktor Karen Donfrid ABŞ-nin Cənubi Qafqaz regionunda sülh, demokratiya və firavanlığa sadiqliyini vurğulamaq üçün iyunun 14-dən 19-dək Azərbaycana, Gürcüstana və Ermənistana səfər edəcək. ABŞ-ın Azərbaycandakı səfirliyindən verilən məlumata görə, dövlət katibinin köməkçisi K.Donfrid iyunun 15-də və 16-da Bakıda səfərdə olacaq, ölkə rəsmiləri, digər hökumət məmurları və vətəndaş cəmiyyətinin nümayəndələri ilə görüşəcək. Dövlət katibinin köməkçisi Azərbaycanla Ermənistan arasında davamlı sülhün əldə olunmasına dair diplomatik səylərə ABŞ-ın dəstəyini vurğulayacaq, Ukraynaya humanitar dəstəyinə görə Azərbaycana təşəkkür edəcək və Avropanın enerji təhlükəsizliyinə dəstəyini, transmilli təhlükələrə qarşı mübarizəni, fundamental azadlıqların dəstəklənməsi və ikitərəfli ticarətin və investisiyaların təşviqi sahəsindəki tərəfdaşlığı vurğulayacaq.
Qeyd edək ki, bundan bir neçə gün əvvəl ABŞ-ın Energetika Resursları Bürosu katibinin köməkçisinin müavini Laura Lokman Azərbaycanda səfərdə oldu. Səfər çərçivəsində L.Lokman hökumət rəsmiləri ilə bir sıra görüşlər keçirib.
Son vaxtlar ABŞ-Azərbaycan münasibətlərində nə baş verir ki, ABŞ rəsmiləri bizə belə maraq göstərir?
Politoloq Əhəd Məmmədli “Bakı-Xəbər”ə açıqlamasında bildirdi ki, ABŞ-ın Azərbaycanla bağlı hər zaman marağı olub: “Çünki Azərbaycan Cənubi Qafqazın ən öndə gedən ölkəsidir. Həm də ərazi, əhali, iqtisadiyyat, təbii sərvətlər baxımından biz çox cəlbediciyik. Xüsusilə də Qarabağdakı müharibədən sonra yaranan reallıqlar və hazırda gedən Rusiya-Ukrayna müharibəsi fonunda bu maraq daha da artıb. Çünki artıq ABŞ anlayır ki, fərqli bir Azərbaycanla üz-üzədir. Hərbi və siyasi baxımdan daha inamlı olan Azərbaycanla əməkdaşlıq onlar üçün bir zərürətə çevrilib. Güclü Türkiyənin Azərbaycanın müttəfiqi olmasının da bu məsələdə ciddi rolu var. Eyni zamanda Azərbaycanın İranla həmsərhəd bölgədə yerləşməsi də ABŞ-ın diqqətini çox cəlb edir. Azərbaycanın ABŞ-la təhlükəsizlik sahəsində geniş əməkdaşlığı var. Bilirik ki, Azərbaycan antiterror koalisiyasının fəal üzvüdür və ABŞ-ın bu yöndə olan təşəbbüslərinə dəstək verib. Bununla yanaşı, iki ölkə arasında enerji sahəsində əməkdaşlıq var və ABŞ Azərbaycanın təşəbbüskarı olduğu və reallaşdırdığı enerji layihələrinə hər zaman öz dəstəyini verir. Hazırkı məqamda isə enerji ilə bağlı təminata görə Azərbaycanın dəstəyinə Avropanın ciddi ehtiyacı var. ABŞ çalışır ki, Cənubi Qafqaz bölgəsində sülh və sabitlik bərqərar olunsun. Qeyd etdiyim sahələrdə Azərbaycan-ABŞ əməkdaşlığı genişdir. ABŞ rəsmiləri çalışır ki, sadalanan istiqamətlər üzrə əməkdaşlıq daha da genişlənsin”.
Məhəmmədəli QƏRİBLİ
