Qarabağa "ziyarəti" zamanı erməni "apostol" kilsəsinin Tavuş yeparxiyasının keşişi yepiskop Baqrat Qalustanyan Azərbaycan dövlət sərhədini pozaraq Kəlbəcər rayonunun Kolətək kəndinə gəlib. Bu barədə Xankəndidəki separatçı nəşrlər məlumat yayıb.
Təbii, onlara bu imkanı, şəraiti Rusiya sülhməramlıları yaradıb. Məlumata görə, Tavuş mərzinin keşişi B.Qalustanyan Qarabağ keşişi Vrtanes Abramyanla birlikdə “Akopavank” adlandırdıqları “erməni” məbədinə baş çəkib və həmin məbədin qanunsuz terrorçu keşişi Ovanes Ovannisyanla görüşüb. Erməni keşişləri torpağımızda Azərbaycana qarşı irqçi və revanşist çıxışlar edərək, Ermənistan və Qarabağdakı erməniləri “vətən torpaqlarının azad edilməsi uğrunda mübarizə”yə səsləyiblər.
Qarabağın qanunsuz keşişi Vrtanes Abramyan belə deyib: "Bizim düzən Qarabağa, Naxçıvana baxın, heç nə qalmayıb, hər şey dağıdılıb. Bu gün xalqımız özü ilə “müqavilə” imzalamalıdır ki, bizim düşmənə daha verəcək heç nəyimiz yoxdur. Hər kəs belə bir aydın qərar verərsə, bu, milli birliyə çevriləcək" .
"Onların Azərbaycan sərhədlərini qanunsuz olaraq keçib Kəlbəcərə gəlməsi təsadüfi deyil"
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, qondarma dindarların Kəlbəcərə buraxılmasının özü böyük qanunsuzluqdur: "Doğrudan da, bu artıq qırmızı xətlərin keçilməsi deməkdir. Bu onu göstərir ki, ermənilər heç zaman təxribatdan əl çəkməyəcəklər. Hərə öz növbəsində fəaliyyətlərini təqdim etməyə çalışır. Hazırda bütün sahələrdə dərin böhran keçirən, gənclərin tərk etdiyi Ermənistanda adını din xadimi qoyanlar da uzun illərdir təxribatla məşğul olurlar. Erməni "din xadimləri" təkcə indi deyil, hər zaman revanşist bəyanatlar səsləndirir, gəncləri revanşizmə, terrora səsləyir. Heç şübhəsiz, Qarabağ "yeparxiyası" deyilən bir anlayışın özü absurddur. Erməni kilsəsi də apostol kilsəsi deyil, Qriqorian kilsəsidir. Bu gün də terrorçu keşişlərin "din xadimi" qiyafəsində Qarabağda, Kəlbəcərdə peyda olması çox böyük təxribatdır və bu təxribatın qarşısının alınması üçün sülhməramlılar tədbir görməlidir. Onların Azərbaycan sərhədlərini qanunsuz olaraq keçib Kəlbəcərə gəlməsi təsadüfi deyil. İstisna etmək olmaz ki, "keşişlər" bura yeni terror planı hazırlamaq üçün gəliblər, çünki onlar terrorçudirlar. Çünki onlar ora məqsədli şəkildə gəliblər. Baxın, hər üç" keşiş" terrorçu kimi tanınır, onlar həm Birinci, həm də İkinci Qarabağ müharibəsində bizə qarşı döyüşüblər. Onların bir əlində xaç, bir əlində avtomat olub. Bu onların fotolarından da açıq görsənir. Ermənilər həmişə din faktorundan istifadə ediblər. Onlar Ermənistanı "xristian dinin" mərkəzi hesab edirlər. Bunların Qriqorian təriqətini yenidən canlandırmaqda məqsədləri aydındır, revanşizmi daha da qızışdırmaq istəyirlər".
Q.Hacıyev hesab edir ki, erməni "keşişləri" Kəlbəcərə gəlməklə buradakı monastırların "ermənilərə aid olduğunu" "sübut" etmək istəyirlər. Əslində isə bununla onların özlərini ifşa etdiklərini deyən Q.Hacıyev qeyd etdi ki, Kəlbəcər rayonunun Kolətək kəndindəki kilsəni ermənilər son vaxtlar çox qabardırlar. O qədim kilsənin isə ermənilərə heç bir aidiyyəti olmadığını deyən Q.Hacıyevin sözlərinə görə, bura "təyin olunan" keşiş"in də terrorçu olması ermınilərə imkan verir ki, o kilsələri terror yuvasına çevirsinlər." Biz görürük ki, bu üç üzdəniraq "din xadimi"nin məqsədi sülh danışıqlarının baş tutmasına mane olmaqdır. İstəyirlər ki, bu cür qanunsuz səfərlərlə və təxribatçı çıxışlarla revanşizmi daha da qızışdırsınlar. Yoxsa onların oradan səsləndirdiyi iddianın hansısa bir təsiri yoxdur. Belə hesab edirəm ki, onlar diqqəti cəlb etmək və gəncləri revanşizmə çəkmək üçün belə hərəkətlər edirlər. Bütün hallarda, erməni "keşişlər" in qanunsuz səfərlərinin qarşısı alınmalıdır".
Q.Hacıyevin bildirdiyinə görə, erməni mərəzi yeni deyil və onlar yüz ildir ki, Azərbaycan ərazilərinə qanunsuz iddialar edir və onlara da bu işdə Qriqorian kilsəsi başçılıq edir. Professor Hacıyevin fikrincə, ermənilər bir toplum olaraq işğalçılıq niyyətlərindən əl çəkməsələr, bu onların özlərinə ziyan vuracaq. Erməni kilsəsinin Naxçıvana, Qarabağa əsassız iddialarını "din xadimləri"nin dili ilə yenidən canlandırdığı deyən Q.Hacıyevin sözlərinə görə, bütün məqsəd Ermənistan və Azərbaycan arasında imzalanması gözlənilən sülh müqaviləsinin bağlanmasının ya ləngidilməsi, ya da qarşısını almaqdır, bu səbəbdən də "din xadimləri" Azərbaycan ərazilərinə qanunsuz səfər edirlər. Burada sülhməramlılarının da böyük məsuliyyət daşıdığını deyən professor hesab edir ki, bu halın qarşısı alınmalıdır.
İradə SARIYEVA
