2021-ci il 15 iyunda iki qardaş ölkənin liderlərinin Şuşada imzaladığı sənəd müttəfiqliyin daha da yüksəlməsidir. Ötən bir il ərzində Türkiyə-Azərbaycan qardaşlığı, müttəfiqliyi daha da inkişaf edib.
Biz bu yaxınlaşmanı Bakıda keçirilən möhtəşəm Teknofestlə bir daha gördük. Hər iki ölkənin “şahin”ləri Bakı səmasında qürurverici uçuşlar etdi, mənzərələr yaratdı. Cənab Ərdoğanın Bakıya gəlişi və festivalda iştirakı, Prezident İlham Əliyevlə birgə verdikləri açıqlamalar dünya ictimaiyyətinə bir siqnal idi. Bununla bir daha iki qardaşın bərabər olduğu nümayiş etdirildi. Ümumiyyətlə, Türkiyə və Azərbaycan arasında hərbi müttəfiqlik günbəgün yüksəlməkdədir. Bunu birgə təlimlər, Türkiyə müdafiə naziri Hulusi Akarın bəyanatları da təsdiqləyir. Şuşa Bəyannaməsi Azərbaycanın siyasi, diplomatik və iqtisadi uğurudur. Bəyannamədə nəzərdə tutulan hərbi əməkdaşlıq, regional əhəmiyyət daşıyan iqtisadi layihələr və bütün digər müstəviləri əhatə edən təşəbbüslər ölkənin beynəlxalq nüfuzunu artıracaq.
Şuşa Bəyannaməsinin himayəsi altında Türkiyə-Azərbaycan hərbi müttəfiqlik müqaviləsi imzalana bilərmi? Görülən bu işlər həm də Türkiyənin birgə hərbi bazalarının yaradılmasına gətirib çıxara bilərmi?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Azərbaycanla qardaş ölkə olan Türkiyə arasındakı münasibətlər bütün sahələr üzərə yüksək səviyyədə qurulub: “Burada əsas rol oynayan amillər var. Bunlardan ən başlıcası Rəcəb Tayyib Ərdoğanla cənab İlham Əliyev arasında şəxsi münasibətlərin yüksək səviyyədə olmasıdır. Hər iki liderdə yüksək harizma və iradə var. Xalqların və dövlətlərin taleyini ağıldan çox, xarakterlər idarə edir. Bu gün Azərbaycanın Türkiyə cümhuriyyəti ilə heç zaman olmadığı kimi hərbi əlaqələri mövcuddur. Burada əsas məqsəd ölkələrəmizi narahat edən problemlərdən birgə çıxış yollarını tapmaqdır. Prezident öz çıxışlarında elan edirdi ki, onun üçün ən önəmli olanı ordu quruculuğu ilə bağlı məsələdir. Çünki biz güclü ordu olmadan Qarabağ problemini həll edə bilməzdik. Təbiidir ki, bu istiqamətdə NATO-nun ən güclü ordusuna sahib olan Türkiyənin də bizə böyük köməyi oldu. Ordumuzun modernləşməsində qardaş ölkə bizə lazımi dəstəyi verib. Türkiyə ilə bizim bütün sevincimiz və kədərimiz eynidir. Cənab İlham Əliyev deyib ki, biz yalnız 21-ci əsrin deyil, gələcək nəsillərin də ordusunu qurmalıyıq. Ona görə də bizim komondolarımız yaranır. Türkiyə ilə hərbi sahədə müttəfiqlik müqaviləsinin imzalanması və həmin ölkə ilə birgə hərbi bazaların yerləşdirilməsi çox önəmlidir. İki qardaş dövlətin bir-birinə daha sıx inteqrasiyası üçün bu addımların atılmasına zərurət var. Buna Türkiyənin həm də mənəvi haqqı çatır. Çünki nə zaman büdrəmişiksə qardaş ölkə heç bir təmənna güdmədən bizim yanımızda olub. Hesab edirəm ki, bir il əvvəl imzalanan Şuşa Bəyannaməsi bu addımları atmaq üçün baza rolunu oynaya bilər”.
Məhəmmədəli QƏRİBLİ
