Azərbaycanın azad olunmuş ərazilərinə dünyanın hər bir tırəfindən maraq göstərən şəxslər, ictimai-siyasi təşkilatlar var. Uzun illər Ermənistanın silahlı birləşmələrinin işğalında qalan ərazilərimizin yenidən özümüzə qaytarılması, sözsüz ki, Ali Baş Komandan İlham Əliyevin siyasi iradəsi, diplomatik gücü, sərkərdəlik bacarığı ilə mümkün olub.
Müharibənin gedişində Azərbaycan Prezidenti təkcə döyüş cəbhəsinə rəhbərlik etmirdi, o həm də bizim informasiya cəbhəmizin mahir komandanı kimi böyük işlərə imza atdı. Məhz o təbliğatın nəticəsdir ki, bu gün dünyada Azərbaycanın haqlı mövqeyini dəstəkləyənlər günü-gündən artır.
Torpaqlarımız düşmən işğalından azad edildikdən indiyə qədər onlarla, yüzlərlə xarici qonaq azad ərazilərə səfərə gedib, erməni vəhşiliyini, vandalizmini öz gözləri ilə görüblər. Ölkəmizdə fəaliyyət göstərən xarici ölkə səfirləri, diplomatlar, eləcə də xarici ölkələrdən gələn beynəlxalq təşkilatların təmsilçiləri tez-tez azad ərazilərə, xüsusən də Şuşaya, Ağdama səfərlər edirlər. İndiyə qədər bu kimi səfərlərin sayı çox olub.
Xarici ölkə diplomatlarının, rəsmi şəxslərin, beynəlxalq təşkilatların Azərbaycanın azad olunmuş rayonlarına, şəhərlərinə səfər etməsi dövlətimizin ədalətli mövqeyinin təbliğində və erməni vandalizminin ifşasında nə dərəcədə rol oynayır?
4 qitənin diplomatları Şuşada...
İyunun 12-si 11 ölkə və 4 qitədən olan xarici diplomatlar Azərbaycanın Mədəniyyət Paytaxtı Şuşa şəhərinə səfər ediblər. Azərbaycan Respublikasının Beynəlxalq İnkişafa Yardım Agentliyi (AlDA) vasitəsilə Xarici İşlər Nazirliyi və ADA Universiteti nəzdində fəaliyyət göstərən İnkişaf və Diplomatiya İnstitutunun İxtisasartırma Proqramları tərəfindən birgə təşkil olunan “Əcnəbi Diplomatlar üçün Xarici Siyasət Proqramı - 2022” adlı beynəlxalq kursun iştirakçısı olan 14 xarici diplomat üçün Şuşa şəhərinə xüsusi səfər proqramı təşkil edilib.
“Qəbilə təfəkkürlü” ermənilərin vandalizm cinayətləri...
Ekspertlər qeyd edirlər ki, Azərbaycanda akkreditə olunmuş diplomatik korpusun, o cümlədən xarici ölkələrin səfirlərinin, hərbi attaşelərin, beynəlxalq təşkilatların nümayəndəliklərinin rəhbərlərinin də azad torpaqlarımıza mütəmadi səfərləri təşkil olunması erməni vandalizminin ifşa edilməsində mühüm rol oynayır. Onu da vurğulayaq ki, Prezident İlham Əliyevin tapşırığına əsasən, xarici diplomatik korpusun işğaldan azad olunmuş ərazilərə tanışlıq səfərlərinin davamlı şəkildə həyata keçirilir. Bu eyni zamanda Azərbaycan dövlətinin öz ərazilərində həyata keçirdiyi irimiqyaslı layihələrin, quruculuq-bərpa işlərinin, o cümlədən erməni vəhşiliyinə məruz qalan, talan olunan torpaqlarımızın harayının dünyaya çatdırılması baxımından çox əhəmiyyətdlidir.
Erməni vandalizmini beynəlxalq aləmdə ifşa edən diplomatlar...
Xarici diplomatlar dəfələrlə etiraf ediblər ki, işğaldan azad edilən torpaqlara səfər edən hər bir şəxs kimi onlar da beynəlxalq ictimaiyyətin nümayəndələri olaraq ermənilərin ərazilərimizdə törətdikləri dağıntıların, talanın, təbiətə vurulan zərərin miqyasını gördükdə dəhşətə gəlirlər və bundan vahiməyə düşürlər. Xarici diplomatlar özləri ermənilərin necə vandal, vəhşi xalq olduqlarını indi yaxından hiss edirlər. Əlbəttə, onlar qəbilə təfəkkürlü ermənilərin törətdikləri insanlıq əleyhinə cinayətlərə qiymət verməyə söz tapa bilmirlər, dəhşətə gəlirlər ki, bunları edənlər insandırmı.
Hələ keçən ilin fevralında Ermənistan silahlı qüvvələrinin Azərbaycanın qədim yurd yerlərində törətdiyi vəhşiliklər və cinayət izləri ilə tanış olmaq üçün Azərbaycanda fəaliyyət göstərən səfirlər, hərbi attaşelər və beynəlxalq təşkilatların ölkəmizdəki nümayəndəliklərinin rəhbərləri işğaldan azad olunmuş Cəbrayıl və Zəngilan rayonlarına səfər edirdilər. Səfirlər Cəbrayıl şəhərində ermənilər tərəfindən dağıdılan qəbiristanlıqları və erməni vəhşiliyinə məruz qalmış digər əraziləri öz gözləri ilə görüblər. Onlar həmçinin Cəbrayılda qədim Xudafərin körpüsündə olan səfər iştirakçıları daha sonra Zəngilandakı erməni barbarlığına şahidlik etmiş, dağıdılmış şəhər məscidinə baş çəkiblər. Keçən ilin iyulunda da Azərbaycanda akkreditə olunmuş diplomatik korpusun və beynəlxalq təşkilatların, ümumilikdə 100-dən çox xarici diplomatik nümayəndənin Şuşa şəhərinə səfəri təşkil olunmuşdu. Səfərdə Türkiyə, Pakistan, İtaliya, Avstriya, İsveç, Polşa, İsrail, Çin, Yaponiya, Malayziya, Cənubi Koreya, Belarus, Ukrayna, Braziliya, Meksika, Səudiyyə Ərəbistanı, Qətər, Əlcəzair və digər ölkələrin səfirləri, həmçinin BMT-nin Qaçqınlar üzrə Ali Komissarlığının, Ümumdünya Səhiyyə Təşkilatının nümayəndələri də iştirak etmişdilər. Səfərin məqsədi xarici diplomatları Şuşa şəhərində həyata keçirilən bərpa və yenidənqurma işləri, Şuşa şəhərinin orijinal memarlıq üslubu və Azərbaycan xalqının milli-mədəni irsi ilə tanış etmək idi.
Ümumiyyətlə, ötən il Azərbaycanda akkreditə olunmuş diplomatik korpusun işğaldan azad olunmuş ərazilərə, o cümlədən Ağdam, Füzuli, Cəbrayıl, Zəngilan, Qubadlı, Laçın rayonlarına səfərləri təşkil olunmuşdu. Diplomatlar işğal dövründə erməni vandalizminin nəticələri və həyata keçirilməsinə başlanmış bərpa və yenidənqurma işləri ilə tanış olublar. Bu il də ənənə layqincə davam etdirilib. 2022-ci il daha çox Şuşada keçirilən beynəlxalq miqyaslı tədbirlərlə bağlıdır. Bu il azad olunmuş ərazilərimizə, Şuşaya saysız-hesabsız qonaqlar səfər edib. Burada hər şeyi öz gözləri ilə görüb. Bir tərəfdən ərazilərimizdə tikinti-quruculuq işlərinə şahidlik ediblər, o biri tərəfdən erməni vandalizmini canında yaşadan ərazilərimizin vəziyyətini müşahidə ediblər.
Bütün bu detalları ona görə vurğulayırıq ki, 2021 və 2022-ci illərdə bu sahədə çox mütəşəkkil, məqsədyönlü işlər görülüb. Hesab edirik ki, bu cür səfərlər erməni vandalizimin beynəlxalq miqyasda tam ifşasında mühüm rol oynayacaq və Azərbaycanın ədalətli mövqeyinə dəstək olacaq.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
