Ermənistanın baş naziri Nikol Paşinyanın istefasını tələb edən “Müqavimət Hərəkatı”nda birləşən siyasi qüvvələr hələ də istəklərinə nail ola bilməyiblər. Bu fonda müxaliflərin fəaliyyətlərində iflasa uğramaları da diqqətdən yayınmır.
Baş verənlərdən təşviş keçirən müxalifət liderləri yenidən Qarabağ kartını qabartmağa başlayıblar. Ermənistan parlamentinin sədr müavini İşxan Saqatelyan bu xüsusda diqqəti Laçından keçən və Azərbaycan tərəfindən inşası həyata keçirilən yola yönəldir. Qeyd edək ki, tarixən Ermənistandan Azərbaycanın rayonlarına gedən avtomobil yolu Laçın şəhərinin mərkəzindən keçib. Hazırda da Qarabağda yaşayan ermənilərin Ermənistanla əlaqəsinin olması üçün həmin yol istifadəyə verilib. Hazırda ermənilər Laçın şəhərinə daxil olaraq hərəkət edirlər. Lakin tezliklə buna son qoyulacaq. 10 noyabr bəyanatının 6-cı bəndinə uyğun olaraq, Laçın şəhərinin içindən keçən yola altrernativ yol üç il ərzində inşa edilməli, bundan sonra şəhərin mərkəzi də Azərbaycanın nəzarətinə keçməlidir. İndi bəlli olur ki, Azərbaycan alternativ yolu bu ilin yayında istismara verməyə hazırlaşır. Bununla da ermənilərin Laçın şəhərinin mərkəzindən keçən yoldan istifadəsinə son qoyulacaq. Yeni yolun istifadəsindən sonra ermənilər bu əraziləri tərk etməli olacaq. Bununla yanaşı, Kiçik Qaladərəsi və Böyük Qaladərəsində yaşayan ermənilər hazırda istifadə etdikləri əkin və otlaq sahələrinin böyük hissəsini də itirmiş olacaq. İşxan Saqatelyan da bu fonda qeyd edir: “Azərbaycan tərəfindən alternativ yol çəkilir, deyəsən, Nikol Paşinyanın Azərbaycan lideri ilə konspirativ razılaşması var ki, nəticədə bugünkü Laçın yolunu itirəcəyik”. O qeyd edib ki, Xankəndiyə doğru Laçından yan keçən yol çəkilir və 2-3 ay sonra istismara təhvil veriləcək: “Əgər o yol işləsə, bu o deməkdir ki, biz Laçını, o cümlədən Zabuxu, bir neçə kəndi tamamilə itirəcəyik. Ən əsası isə, bütün kommunikasiyalarımız, yəni qaz, işıq rəqibin nəzarətində olacaq. Bu o deməkdir ki, biz tam asılı olacağıq. Ermənilərin Qarabağdan çıxarılması haqqında dediklərimiz bunu nəzərdə tutur”. Saqatelyan Laçına daxil ola bilməməyin ermənilər üçün təhlükələrindən danışıb: “Bütün elektrik və qaz kommunikasiyaları Azərbaycan tərəfinin nəzarətinə keçəcək. Nəticədə Ermənistan tamamilə Azərbaycandan asılı duruma düşəcək, Qarabağda erməni qalmayacaq”. “Şərəf duyuram” parlament fraksiyasının deputatı Tiqran Abramyan da vəziyyətin ağır olduğunu bildirir: "Laçından keçən mövcud yola alternativ yolun tikintisi 10 noyabr 2020-ci il tarixli üçtərəfli bəyanatda nəzərdə tutulub. Bakıda isə məlum səbəblərdən bu bəndi tez bir zamanda icra etməyə tələsirlər. Bakının məqsədi Laçından yan keçməkdir ki, şəhər tam olaraq onların nəzarətinə keçsin. Çünki alternativ yolun yaranması nəticəsində Rusiya sülhməramlılarının patrul marşrutu da dəyişəcək. Müvafiq olaraq Ermənistan və Qarabağ arasında yerüstü əlaqənin təmin edilməsi baxımından biz bugünkündən xeyli çətin vəziyyətə düşəcəyik”.
Beləliklə, qısa zaman sonra revanşist və separatçı erməni qüvvələrinə növbəti ağır zərbə vurulacaq. Laçından yan keçən yeni alternativ yolun istifadəyə verilməsi Azərbaycanın strateji üstünlüyünü daha da möhkəmləndirəcək. Bundan Ermənistanın radikal müxalif dairələri öz siyasi məqsədləri üçün istifadə etməyə, Nikol Paşinyan iqtidarına qarşı kampaniya aparmağa çalışır. Lakin hesab edilir ki, bu da müxalifətə hasnsısa dividend vəd etmir. Bunu tanınmış rusiyalı politoloq Oleq Kuznetsov da xüsusi qeyd edir: “Bəli, erməni ictimaiyyəti, xüsusən də onun bu gün erməni etirazlarının aparıcı qüvvəsini təşkil edən hissəsi tədricən o fikrə alışdırılır ki, Ermənistanla Azərbaycan arasında sülh sazişinin və ona müvafiq digər dövlətlərarası müqavilələr paketinin bağlanması sabahkı gün üçün qaçılmazdır. Bu gün cəmiyyət Paşinyanın əleyhinə olan müxalifətin küçələrə hansı sayda insan çıxara bilməsi onu göstərir ki, erməni ictimaiyyəti tədricən bu fikrə öyrəşir. Etiraz yürüşlərinə ən çoxu 10 min nəfər toplaşdığı halda, Ermənistan əhalisinin yarıdan çoxu, xüsusən də heç bir imkana malik olmayanlar Paşinyanı dinməzcə dəstəkləyir. Özü də 2020-ci il müharibəsində məğlubiyyətdən sonra. Etiraz aksiyalarının əsas sponsoru aktivləri Rusiyada olan Robert Köçəryandır. Lakin başa düşmək lazımdır ki, Rusiyaya sanksiya təzyiqi nəticəsində Köçəryanın aktivləri azalır və o, artıq öz tərəfdarlarını əvvəlki maliyyə səviyyəsində dəstəkləmək iqtidarında deyil. Üstəlik, Paşinyan hakimiyyətdə olduğu illərdə Köçəryanın Ermənistan prezidenti olduğu vaxt yerli və rusiyalı erməni oliqarxlar arasında yaratdığı kriminal-bank əlaqələrini qıraraq, Ermənistanın siyasi landşaftının Rusiyadakı erməni diasporundan maliyyə asılılığını əhəmiyyətli şəkildə azaldıb. Köçəryan və onunla həmfikir olanlar yoxsullaşır, onun ehtiyatları tükənir, deməli, onunla bağlı Ermənistandaxili müxalifətin etirazçı hissəsinin də ehtiyatları tükənir. Bu hissə indi fəallıq göstərməsə, iki ildən sonra bunu etmək imkanından ümumiyyətlə məhrum olacaq”.
Samirə SƏFƏROVA
