Ötən həftə Rusiyanın xarici işlər naziri Setgey Lavrov Ermənistanda səfərdə olub. Ermənistan Prezidenti Vahaqn Xaçaturyan Rusiya Federasiyasının xarici işlər naziri Sergey Lavrovu və onun başçılıq etdiyi nümayəndə heyətini qəbul edib.
Rusiya xarici işlər naziri həmin görüşdə bildirib ki, Moskva Rusiya-Ermənistan müttəfiqlik münasibətlərini inkişaf etdirmək arzusundadır:
“Müttəfiqlik münasibətləri, əsasən, dövlətlərarası əməkdaşlıqla bağlıdır, amma bizim əslində insani münasibətlərimiz və sizin qeyd etdiyiniz kimi, onların əsrlərlə yaşı var. Bu, dövlətlərarası münasibətlər üçün ən yaxşı əsasdır. Ermənistan rəhbərliyi ilə ünsiyyət qurmaq, razılaşmaların necə həyata keçirildiyi, sizin qeyd etdiyiniz böyük sazişdən tutmuş, dövlətlər tərəfindən təsdiqlənən son qərarlar, parlamentlərimizdə ratifikasiya olunan sazişlər qədər fikir mübadiləsi aparmaq bizim üçün həmişə böyük şərəf olub. Bunlar artıq çoxdur və əslində, bütün sahələri, o cümlədən iqtisadi, hərbi-texniki, humanitar, təhsil, yüksək texnologiyalı sahələri əhatə edir. Ümumiyyətlə, məsələlər ikitərəfli münasibətlərimizin bütün gündəliyi, təbii ki, Azərbaycan, Rusiya prezidentləri və Ermənistanın baş nazirinin əldə etdiyi razılaşmalar əsasında bu gün Qarabağ məsələsinə dair göstərilən səylərlə bağlıdır. Bu regionda vəziyyətin tam nizamlanmasına yönəlmiş maksimum konkret olan üç saziş paketi mövcuddur”. Lavrov bildirib ki, Rusiya-Ermənistan dostluğuna xələl gətirmək istəyənlərin bütün cəhdləri boşa çıxacaq və həmin təşəbbüslər alınmayacaq. Bununla Lavrov kimə mesaj vermək istəyir?
Politoloq Rəşad Bayramov “Bakı-Xəbər”ə açıqlamasında bildirdi ki, son zamanlar Azərbaycanla sözdə müttəfiq olan Rusiya tərəfinin davranışlarında qeyri-səmimilik hiss edilir: “Əvvəlcə Rusiya dövlət agentliyi "RİA Novosti"də özünü Azərbaycan ərazilərindəki qanunsuz qurumun qondarma naziri kimi təqdim edən separatçı Artak Beqlaryanın müsahibəsini dərc edildi. Agentliyin təxribatçı addımı Azərbaycanda haqlı olaraq etiraz doğurdu. Rəsmi Bakı “RİA Novosti”də ölkəmiz əleyhinə müsahibənin yayımlanmasını Azərbaycan və Rusiya arasında Müttəfiq Əməkdaşlıq haqqında Bəyannamənin müddəalarının kobud şəkildə pozulması kimi qiymətləndirərək agentliyin Azərbaycanda yayımını blokladı. Bir neçə gün öncə isə Lavrovun Xocalı rayonunun Fərrux kəndi ilə əlaqəli vəziyyətin Azərbaycan və Ermənistan arasında sərhədlərin delimitasiyası kontekstində nəzərdən keçiriləcəyinə dair fikirləri birmənalı qarşılanmadı. İndi də Ermənistanın prezidenti ilə görüşdə səsləndirdiyi fikirlərdə sanki kimlərəsə acıq vermək istəyir. Mən güman etmirəm ki, Lavrov bu məsələdə məhz Azərbaycanı nəzərdə tutur. Çünki Azərbaycanla Ermənistanın münasibətləri bəllidir. Buna əlavə şərh verməyə lüzum yoxdur. Düşünürəm ki, Lavrov bu mesajı son vaxtlar bölgədə fəallaşan və ən əsası da, Ermənistanı Rusiyanın orbitindən çıxarmağa çalışan ABŞ və Qərbə verir. Azərbaycan heç vaxt həmin ölkələrin əlaqlərini qısqanmayıb. Çünki bizə gözəl məlumdur ki, Rusiya Ermənistanın birbaşa himayəçisidir. Uzun illərdi ki, bunu yaxından hiss edirik”.
Məhəmmədəli QƏRİBLİ
