Bu günlərdə Ermənistanda səfərdə olan Rusiyanın xarici işlər naziri Sergey Lavrov bəyan edib ki, bu ölkədə rusdilli erməni məktəblərin sayı artacaq. Lakin Lavrovun bu fikri Ermənistan cəmiyyətində sərt tənqidlə qarşılanıb. Artıq ictimaiyyət nümayəndələri ciddi etirazlar bildirirlər.
“Asparez” Jurnalist Klubunun rəhbəri Levon Barseqyan yerli mediaya verdiyi açıqlamada yeni rus məktəblərinin açılmasını anormal addım kimi qiymətləndirib. “Biz vergi ödəyəcəyik ki, siz rus məktəbləri aça biləsiniz? Lavrov Ermənistan tərəfinin xahişi ilə ölkəmizdə rus məktəblərinin açılacağını bəyan etdi. Birincisi, həmin "erməni tərəfi" niyə və nəyə əsaslanaraq belə bir arzu ifadə edib? İkincisi isə, bu “erməni tərəfi” bəs Rusiyada erməni məktəbləri açmaq istəyini bildirməyibmi? Niyə hesabat vermirsiniz?”. O qeyd edib ki, İrəvan vergi ödəyən xalqın fikirlərini öyrənmədən, sanki Lavrovun gəlib ona söz deməsini gözləyib. “Artıq daha az vergi ödəmək üçün “texnologiya” haqqında düşünəcəyəm. Bunu daha sonra paylaşacağam, ey hörmətli “erməni tərəfi”. Gedib başqa hambal tapın, ona “qürurlu vətəndaş” deyin və vergi ödədərək həmin şəxslərə rus məktəbləri açın”- deyə Barseqyan bildirib.
Onu vurğulayaq ki, Rusiyanın forpostu olmasına baxmayaraq, son 30 ildə Ermənistanda rusdilli məktəblərin sayı bir neçə qat azalıb, bu dildə olan teatr basqı altına düşüb. Bu gün Ermənistanda çox ciddi anti-Rusiya əhvalı hökm sürür və monoetnik ölkə olan Ermənistanda erməni dilindən başqa dilə insanlar aqressiv yanaşır.
Ekspertlər deyir ki, Lavrovun bu bəyanatını Ermənistanda anti-Rusiya qüvvələrin etirazla qarşılaması təbiidir. Ekspertlərin sözlərinə görə, bir tərəfdən rusa sığınırlar, o biri tərəfdən rusdilli məktəblərə etiraz edirlər. Monoetnik dövlət olan Ermənistanda rusdilli tədris, demək olar ki çox aşağı səviyyədə olmasının səbəblərini şərh edən ekspertlər hesab edir ki, bu, ermənilərin ruslara bəslədiyi nifrətin təzahürüdür.
“Monoetnik dövlət olan Ermənistanda rusdilli tədris inkişaf edə bilməz, əksinə, bu dildə olan tədris də aradan qalxacaq”
Siyasi ekspert Rövşən Rəsulov baki-xeber.com-a açıqlamasında bildirdi ki, Ermənistan monoetnik bir ölkədir və bunu sübut edən minlərlə faktlar var. Bu ölkədə azsaylı xalqlara - yezidi kürdlərə, ruslara, yəhudilərə qarşı daimi basqılar olduğunu qeyd edən R.Rəsulovun sözlərində görə, Ermənistanda rus dilinə qarşı ciddi təpkilər var: “Lavrov Ermənistanda rus dilli məktəblərinin sayının artırılacağını deyib. Orada məhv olan, yoxsa çıxarılan rus provaslav kilsələrindən isə danışmayıb. O vaxt rusdilli məktəblərlə yanaşı rus provaslav kilsəsi də bağlanıb. Burada səslənməyib ki, rus provaslav kilsəsinin, rus icmasının fəaliyyəti üçün daha geniş şərait yaradılsın. Bu məsələ də vurğulansaydı lap yaxşı olardı. Fakt budur ki, Ermənistanda rusdilli məktəblərin açılmasına cəhdlər Rusiyaya yarınmağa xidmət edir. Ermənistan özünü Rusiyaya yaxın göstərmək üçün Lavrova rus dili məktəblərinin sayının artırılacağı ilə bağlı vəd verib. Onlar Rusiyaya yaltaqlanmaq üçün bu “müraciət”i Lavrova ediblər. Lavrov da sanki bundan qürrələnərək, sevinərək dərhal reaksiya verib ki, rus dilli məktəblər açılacaq, rus dili öyrəniləcək. İstərdim ki, bu məsələdə Ermənistanla Azərbaycanı müqayisə edək. Azərbaycanda nəinki rus dili, eləcə də digər xalqların dilində təhsil verilir. Eyni zamanda onların mədəniyyətləri, folklorları inkişaf etdirilir, yaşadılır. Bu bütün dünyaya bir örnəkdir ki, Azərbaycanda multikulturalizm ən yüksək səviyyədədir. Ermənistanda isə bundan danışmaq olmaz. Ermənistanda az sayda da olsa ruslar, yezidilər, aysorlar var, amma onların da dili, mədəniyyəti yox səviyyəsindədirlər, onlar erməniləşiblər. Onlar hər zaman siyasi basqı altındadır. Ermənistanda kimin hakimiyyətdə olmasından asılı olmayaraq ermənilər başqa xalqlar üzərində açıq formada nümayiş etdirir. Hətta rus dilli məktəblərin sayının artırılması ilə bağlı qərar qəbul edilərsə də belə, realda bu məktəblərin fəaliyyət göstərəcəyi inandırıcı görünmür. Etirazlar səbəbsiz deyil, çünki ermənilər öz övladlarını rus dilində oxutmaqda maraqlı deyillər, sadəcə rus dili “sevgisi” mənzərə yaratmaq üçündür. Açıq görsənən odur ki, Ermənistan cəmiyyətində rus dilinə qarşı ciddi təpki var. Ermənistanda baş verən məlum hadisələrdən sonra ümumiyyətlə Rusiya və Ermənistan arasında münasibətlərin kəskin şəkildə dəyişəcəyini indidən söyləyə bilərik”.
R.Rəsulovun sözlərinə görə, Lavrovun Ermənistana səfəri zamanı erməni müxalifətinin bir qolunun, “Qütb” hərəkatının birbaşa Lavrovu və Putini təhqir etməsi deyilənlərə kifayət qədər zəmin yaradır: “Monoetnik dövlət olan Ermənistanda rusdilli tədris inkişaf edə bilməz, əksinə bu dildə olan tədris də aradan qalxacaq. Lavrov ümid edə bilər, amma ümidinin doğru olacağına isə zəmanət verə bilməz. Biz Ermənistanın digər xalqlara qarşı mənfi münasibətinə çoxdan bələdik”.
İradə SARIYEVA
