Azərbaycan elə bir regionda yerləşir ki, dünyanın böyük gücləri hər zaman burada öz niyyətlərini həyata keçirmək istəyir. Bu səbəbdən də zaman-zaman dini təşkilatlar adı altında müəyyən radikal qüvvələr ölkəmizdə təxribat törətməyə cəhdlər ediblər. Azərbycan sabitliyin, dinc yaşayışın bərqərar olduğu bir dövlətdir, təəssüf ki, bunu gözü götürməyən qüvvələr var.
Bu günlərdə millət vəkili Ceyhun Məmmədov çox maraqlı və diqqət çəkən açıqlama verib. “Azərbaycanda xaricdəki radikal qruplara simpatiyası olan şəxsləri daim nəzarətdə saxlamalıyıq. Məscidlərdə monitorinqlər keçirilməli, kəndlərdə, qəsəbələrdə olan həmin şəxslərin siyahısı hazırlanmalıdır”-deyə bildirən C.Məmmədov olduqca vacib bir ideya verib.
Azərbaycana qarşı bu müstəvidə hansısa bir təhlükə ola bilərmi? İndiyə qədər məgər o şəxslərin siyahıyaalınması həyata keçirilməyib? Radikal qruplara simpatiya bəsləyənlərin məscidlərdə nəzarətdən kənar qalması nə dərəcədə mümkündür? Bu mövzunun maraqlı olduğunu nəzərə alaraq Ceyhun Məmmədovla əlaqə saxladıq. “Qeyd etmək lazımdır ki, bu gün Azərbaycanın bölgədəki mövqeyi, inkişafı, yeni yaratdığı reallıq bir sıra dövlətləri ciddi narahat etməkdədir. Bu gün xarici qüvvələr, müəyyən qruplaşmalar Azərbaycandakı dini duruma təsir göstərmək üçün zaman-zaman müxtəlif addımlar atırlar və bir sıra hallarda da bu istiqamətdə geniş təbliğat aparırlar. Əslində, Azərbaycan hüquq-mühafizə orqanları, aidiyyəti qurumlar bu istiqamətdə addımlar atırlar. Amma mən hesab edirəm ki, biz daha diqqətli olmalıyıq, daha çevik qərarlar qəbul etməliyik və bu proses tam nəzarətdə saxlanılmalıdır. Yəni biz nəzərə almalıyıq ki, bu qüvvələr münbit bir dövrü və zamanı gözləyir. Bu gün Azərbaycan güclüdür, hüquq-mühafizə orqanları müvafiq addımlar atır, tədbirlər görür, ona görə də bu qruplar, təriqətlər, onlara simpatiya bəsləyən şəxslər altdan-altdan fəaliyyət göstərirlər. Amma onlar nə zaman hesab edəcəklər ki, Azərbaycanda açıq mübarizə üçün imkanlar var, o zaman ölkəmizdə öz çirkin niyyətlərini həyata keçirməyə, müxtəlif addımlar atmağa başlayacaqlar. Ona görə də, biz maksimum dərəcədə diqqətli olmalıyıq, işimizi çox möhkəm tutmalıyıq ki, gələcəkdə belə təhdidlərdən, təhlükələrdən özümüzü sığortalayaq. Bu gün dünyanın ayrı-ayrı ölkələrində müxtəlif radikal qruplaşmalar, təriqətlər fəaliyyət göstərir. Onlar zaman-zaman çalışırlar ki, ölkənin daxilində də mövcud siyasi sabitliyə, dini duruma, vəziyyətə mənfi təsir göstərsinlər”.
C.Məmmədov hesab edir ki, bu səbəbdən də bizim hər gün daha diqqətli olmağımız vacibdir. O qeyd etdi ki, bu məsələyə çox həssas yanaşılmalıdır: “Bu məsələyə daha ciddi, həssas yanaşılmasına böyük zərurət və ehtiyac var. Müəyyən addımlar atılır, işlər görülür. Amma hesab edirəm ki, biz daha çox çalışmalıyıq, daha diqqətli olmalıyıq, daha ciddi səylər göstərməliyik”.
İradə SARIYEVA
