Ermənistanın Milli Elmlər Akademiyası yenə də köhnə əməllərindən qalmır və revanşizmə dəstək vermək üçün dəridən-qabıqdan çıxır. Bir müddət səsi eşidilməyən Ermənistan MEA yenidən aktivləşib və qızışdırıcılıq mövqeyini gücləndirib.
“Hansı statusla olursa-olsun, “Arsax” Azərbaycanın bir hissəsi ola bilməz”. Azərbaycan mediasının erməni mətbuatına istinadən verdiyi məlumata görə, bu fikirlər Ermənistanın Milli Elmlər Akademiyasının “alimləri”nin absurd bəyanatında yer alıb. Eyni zamanda, həmin sərsəm bəyanatda deyilir:“Əgər “Arsax” Azərbaycan dövlətinin bir hissəsi olarsa, “Arsax” ermənilərin sürətlə qovulması, vətənlərinin əlindən alınması və soyqırımı ilə üzləşəcək. Hər hansı bir statusa malik “Arsax” bir neçə nəsildən bəri öz vətəndaşlarını qızğın ermənifobiya mühitində tərbiyə edən dövlətin bir hissəsi ola bilməz. Ermənistan “Arsax” xalqının təhlükəsizlik və öz müqəddəratını təyinetmə hüququnun həyata keçirilməsinin təminatçısıdır. Biz bu fundamental prinsipdən əl çəkə bilmərik”.
“Həmişə Ermənistan MEA şər, fitnə-fəsad, revanşizm çənbəri olub”
Ermənistan MEA-nın “alimləri”nin absurd bəyanatına AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyevin mövqeyi çox sərt oldu. Q.Hacıyev bildirdi ki, erməni alimləri hər zamankı kimi yenə də qərəzli, revanşist açıqlamalar verir. Q.Hacıyevin sözlərinə görə, uzun illərdir ki, Ermənistan Milli Elmlər Akademiyasının əməkdaşları fitnə-fəsad çıxarmaqla, saxta tarix yaratmaqla, ortaya qondarma xəritələr, ərazilər atmaqla məşğul olur. Xaricdəki erməni lobbisinin və anti-türk, anti-Azərbaycan qüvvələrinin maliyyəsi hesabına bu fitnə ocağında saysız uydurmalar, cəfəngiyyatlar meydana gəldiyini deyən Q.Hacıyev hesab edir ki, erməni alimlərinin hər an cavabı verilməlidir, yoxsa onlar daha da irəliyə gedib həqiqətə uyğun olmayan fikirlər səsləndirəcəklər. “Azərbaycanla Ermənistan arasında sülh danışıqları barədə söhbətlər getdiyi, müəyyən müsbət irəliləyişlər olduğu bir vaxtda Ermənistan Milli Elmlər Akademiyasının fitnəçi, revanşist “alimləri”nin ortaya boş və mənasız iddialar atması yolverilməzdir. Bütün dünya bilir ki, Azərbaycanda “ermənifobiya” deyilən bir anlayış yoxdur, ölkəmiz tolerant bir ölkədir, burada ermənilər də daxil olmaqla müxtəlif xalqların nümayəndələri yaşayır. Azərbaycanda yaşayan ermənilərin sayı məlumdur. Qarabağda yaşayan ermənilər də bizim vətəndaşlarımızdır. Azərbaycan dövləti Qarabağdakı ermənilərə Azərbaycan vətəndaşları kimi hər cür şərait yaradılacağını bəyan edib. Prezident bunu dəfələrlə qeyd edib. Bu halda Ermənistanın Elmlər Akademiyasının üzdəniraq alimləri yalançı, absurd hay-həşir salırlar. Məsələ burasındadır ki, Qarabağ Azərbaycanın tərkib hissəsidir, tarixi ərazisidir, ermənilər də bura məlum tarixdə köçürülüb. Burada erməni torpağı yoxdur ki, erməni “alimləri” həşir salırlar. Bir məqamı da vurğulayım ki, Qarabağdakı sadə ermənilər revanşistlərdən, separatçılardan beziblər, dinc yaşamaq istəyirlər. Lakin belə başabəla alimlər camaatı rahat yaşamağa qoymurlar”.
Q.Hacıyevin sözlərinə görə, Qarabağın ermənilərlə heç bir tarixi əlaqəsi olmadığı kimi, “Arsax” sözünün də erməni dili ilə heç bir əlaqəsi yoxdur. Q.Hacıyevin sözlərinə görə, Ermənistan MEA nə qədər saxtakarlıq edib “Arsax” sözünü erməniləşdirməyə çalışsa da, heç zaman buna müvəffəq ola bilməzlər, çünki bu söz birbaşa türk sözüdür. Q.Hacıyevin sözlərinə görə, indiyə qədər bu ifadə ilə bağlı konfranslar, tədbirlər keçirilib və birmənalı olaraq “Arsax” sözünün ermənilərlə bağlı olmadığı təsdiqlənib. “Erməni “alimləri” özləri də bilir ki, dedikləri absurddur. Sadəcə söz xatirinə söz danışırlar. Vaxtilə saxta tarixi yazıblar, 30 il müddətində miflər əsasında yazdıqları saxta tarixi bir az da möhkəmləndiriblər. İndi isə yazdıqlarının absurd olduğu üzə çıxır və bundan əndişəyə düşürlər. Onu da yaddan çıxarmaq olmaz ki, Ermənistan MEA-nın “alimləri”ni bu absurd iddiaları dilə gətirməyə xaricdəki qüvvələr, erməni lobbisi təhrik edir. Çünki həmin qüvvələr uzun illərdir ki, bölgədə sülhün bərqərar olmamasına çalışırlar və onlara sülh sərf etmir. Qarabağdakı ermənilər özləri də yaxşı bilirlər ki, onların nicatı Azərbaycandır və Ermənistan onlara heç vaxt kömək edə bilməz. Ermənistan MEA-nın əməkdaşları qarışıqlıq yaratmaqla revanşizimi alovlandırmaq istəyirlər, amma heç nəyə nail ola bilməyəcəklər. Həmişə Ermənistan MEA şər, fitnə-fəsad, revanşizm çənbəri olub. Bu gün də o cürdür. Soydaşlarımızın öz yurdlarından deportasiya olunmasında, Qərbi Azərbaycanın tarixinin, toponimlərinin, abidələrinin saxtalaşdırılmasında onlar “böyük rol” oynayıblar. Mənə elə gəlir ki, bu fitnə-fəsadın, revanşizmin regionun bəlasına çevirilməsində erməni “alimləri” heç də erməni siyasətçilərindən az günahkar deyil”- deyə Q.Hacıyev vurğuladı.
İradə SARIYEVA
