“Açılan bütün nəqliyyat infrastrukturları və yollar ərazisindən keçdikləri ölkənin suverenliyi və qanunvericiliyi çərçivəsində fəaliyyət göstərməlidir”. Bunu Ermənistanın xarici işlər naziri Ararat Mirzoyan bildirib.
Daha sonra Mirzoyan bunları əlavə edib: “Belə bir ortaq fikir mövcuddur ki, bütün açılan nəqliyyat infrastrukturu, avtomobil və dəmir yolları ərazisindən keçdikləri ölkənin suverenliyi və qanunvericiliyi çərçivəsində fəaliyyət göstərməlidir”.
Bununla, əslində İrəvan ermənilərin Qarabağa getmək üçün istifadə etdikləri Laçın dəhlizi üzərində nəzarətin Azərbaycana keçəcəyi ilə razılaşdığını təsdiq edir. Çünki Qarabağ Azərbaycanın suveren ərazisi olsa da, hələlik onun müəyyən hissəsi bizim nəzarətimizdə deyil. Həmin hissəyə Rusiya və ermənilər nəzarət edir. Ancaq Dağlıq Qarabağı Ermənistanla birləşdirən dəhliz Laçından keçir. Bu isə o deməkdir ki, Zəngəzurdan keçəcək yola Ermənistan dəhliz statusu verməkdən imtina edərsə, o zaman Laçından keçən yol dəhliz statusundan məhrum ediləcək.
O baxımdan bütün bunları ekspertlər necə dəyərləndirir?
“Mirzoyanın nə deməsindən asılı olmayaraq, təşəbbüs Azərbaycanın tərəfindədir”
Məsələyə münasibət bildirən hərbi ekspert İbrahim Rüstəmli hesab edir ki, Ermənistan yeni reallıqlardan çıxış edərək doğru qərar verməlidir: “Mirzoyanın nə deməsindən asılı olmayaraq, təşəbbüs Azərbaycanın tərəfindədir. Bu da Prezident İlham Əliyevin həyata keçirdiyi mükəmməl hərbi-siyasət, iqtisadi siyasət sayəsində mümkün olub. Yəni bütün parametrlər üzrə üstünlük Azərbaycanın tərəfindədir. Bu faktoru heç cür gözardı etmək olmaz. Ermənilər əvvəl-axır yeni reallıqların yaratdığı şərtləri qəbul etməlidirlər. Çünki başqa çıxış yolları yoxdur. Ermənistanda Azərbaycan və Türkiyə ilə optimal münasibət qurmaq istəyənlərin tərəfdarları var. Ancaq müəyyən dairələr bunu istəmir. Bura bəzi xarici dövlətlər və erməni lobbisi daxildir. Hər vasitə ilə çalışırlar ki, görülən işlər səmərə verməsin. Baxmayaraq ki, Ermənistanın Azərbaycana müqavimət göstərməyə nə hərbi, nə də siyasi-iqtisadi gücü var. Digər tərəfdən, bu gün Azərbaycan öz mövqeyini beynəlxalq hüququn tələbləri çərçivəsində qoyur. Azərbaycan ərazisindən keçən bütün yollar ölkəmizin suverenliyinə aiddir. Laçın dəhlizindən keçən yol bizim suverenliyimiz daxilində olmalıdır. Bu o deməkdir ki, yola nəzarət tam Azərbaycana məxsus olmalıdır. Ermənistandan Laçın vasitəsilə Qarabağa gələn ermənilər əsgərlərimizin yoxlanışından keçməlidir”.
Hərbi ekspert onu da əlavə etdi ki, zatən proseslər buna doğru gedir.
Vidadi ORDAHALLI
